1 WAZURI 14 - Biblia Ilagho Jiboie Kwa Wandu Wose

Kifwa cha mwana wa Jeroboamu

¹ Ngelo iyo, Abija mwana wa Jeroboamu ukawuya mkongo.

² Jeroboamu ukamzera mkake, “Wuka kukughaluo kumoni, kusemanyike wei ko mka-Jeroboamu; kughende kwa mlodi Ahija ukaiagha Shilo, uo orenizerieghe kukaia nichakaia mzuri aighu ya Israeli.

³ Kumdwaie mikate ikumi, na keki rimu na chupa ya wuki, nao uchakughoria agho ghose ghichaampata uhu mwana.”

⁴ Nao mka-Jeroboamu ukabonya wokoni; ukawuka ukaghenda Shilo, ukacha hata nyumbenyi kwa Ahija. Ahija nderedimieghe kuwona kwa wundu ghwa wughosi ghwake.

⁵ BWANA ukamzera Ahija, “Ola mka-Jeroboamu waawuyacha kukotia malagho gha mwana wake uko mkongo. Idana kumzere wusiku na wusiku.” Mka-Jeroboamu uendacha, ukakubonya kukaia muka mzima.

⁶ Ela iji Ahija wasikira tiri rake ukicha mnyangonyi ukaghamba, “Karibu mka-Jeroboamu, kwaki kukughalusagha kukaia muka mzima? Neko na malagho ghizamie ghekughoria.

⁷ Ghenda kumghorie Jeroboamu kukaia BWANA, uo Mlungu wa Israeli waghamba, ‘Nerekusaghueghe oho aghadi ya wandu, na kukubonya kukaie kilongozi cha wandu wapo Israeli;

⁸ ngaghuwaghanya wuzuri kufuma kwa kichuku cha Daudi, na kukuneka oho; ela ndekorekaieghe kara kara na mdumiki wapo Daudi, uo oreiwadieghe memu yapo na kuninugha kwa ngolo yake yose, ukibonya agho gheni gherekoghe gha hachi imbiri kwapo.

⁹ Ela oho kwabonyere mawiwi kuchumba agho ghose gherebonyeroghe ni wazuri werekoghe imbiri kwako. Kwakubonyere kumoni milungu mizima na fwana rechana; kukanilegha kwa kuwusira machu ghapo.

¹⁰ Ola nichareda mawiwi aighu ya wandu wa nyumbenyi kwako. Nichabwagha kula mwana wa womi wa kivalwa chako, wikaiagha wazumba angu wakitina wiko andenyi ya Israeli; nani nichameria kichuku chako putu seji mundu ukoragha kitungasi na kuchimeria.

¹¹ Mundu uo ose wa kichuku chako ukafwa mzinyi uchajighwa ni koshi, na uo ose ufwagha mlambenyi, uchajighwa ni nderi; kwa kukaia ini BWANA najighora ilagho iji.’”

¹² Ahija ukachuria kumzera mka-Jeroboamu, “Idana wuka kuwuye nyumbenyi kwako, ela ngelo maghu ghako ghichaangia mzinyi, uja mwana wako uchafwa.

¹³ Wandu wose wa Israeli wichamlilia na kumrika, kwa kukaia uo mwana nuo moni uekeri wa kivalwa cha Jeroboamu uchaarikwa, angu BWANA Mlungu wa Israeli wawonie kindo chimu chiboie andenyi kwake aghadi ya kivalwa cha Jeroboamu chose.

¹⁴ BWANA uchawika mzuri mzima andenyi ya Israeli, uo uchaameria kivalwa chose cha Jeroboamu.

¹⁵ BWANA uchaikaba Israeli, nayo ichasughusika sa mrangi ghusukwaa-sukwa ni mbeo amachinyi. Uchawiinja wandu wa Israeli wifume ijo isanga jiboie orewinekagha weke wawae, na kuwisasara noko kimonu cha Moda ghwa Eufrate; kwa kukaia wawusirie machu ghake kwa kubonya fwana ra mlungu ghwa waka Ashera.

¹⁶ BWANA uchaisigha Israeli putu kwa wundu ghwa kaung'a ribonyero ni Jeroboamu, na kuwishekeria wandu wa Israeli wibonye kaung'a.”

¹⁷ Niko mka-Jeroboamu ukawuka, ukaghenda na kuvika Tirza. Hata iji wawadia kizingiti cha mnyango ghwa nyumba, uja mwana ukafwa.

¹⁸ Wandu wa Israeli wose wikamrika na kumlilia sa iji koni BWANA oreghorieghe kwa momu ghwa mlodi Ahija.

Kufwa kwa Jeroboamu

¹⁹ Maza rose rerebonyeroghe ni Jeroboamu, kuja kulwa wuda kwake, na seji orebonyereghe nguma, raandikilo andenyi ya Chuo cha Malagho gha Ngelo cha Wazuri wa Israeli.

²⁰ Jeroboamu orebonyereghe nguma kwa miaka mirongo iwi na iwi. Ukafwa, ukarikwa; mwana wake Nadabu ukabonya nguma wulalo ghwake.

Mzuri Rehoboamu wa Juda

²¹ Rehoboamu mwana wa Solomoni orekoghe ukibonya nguma isanga ja Juda, nao orekoghe na miaka mirongo ina na imweri ingelo orezoyagha kubonya nguma. Ukabonya nguma kwa miaka ikumi na mfungade aja Jerusalemu, ugho muzi ghoresaghuloghe ni BWANA aghadi vichuku vose va Israeli, eri utasoghe aho. Mae orewangwagha Naama Muamoni.

²² Wandu wa Juda wikabonya mawiwi imbiri ya BWANA. Wikam'bonya uwado ni iriso na kujokwa ni machu kwa wundu ghwa kaung'a rawo wereribonyereghe kuchumba ra weke ndee.

²³ Kwa kukaia nawo weni werekuaghieghe andu kotasira milimu; wikadunga nguro ra magho retasa, na kuwika fwana ra Ashera aighu ya kula mghondi na aisi ya midi ikambie.

²⁴ Ahoeni korekoghe na malaya gha womi na gha waka isangenyi. Wandu wa Juda wikabonya wuchafu ghose ghorebonywagha ni iro mbari zima BWANA oreriwingieghe imbiri ya wandu wa Israeli.

²⁵ Mwaka ghwa kasanu ghwa kubonya nguma kwa Mzuri Rehoboamu, Shishaki mzuri wa Misri ukacha kubonya wuda na wandu wa Jerusalemu.

²⁶ Ukawusa mali yose ya Hekalu ya BWANA na mali rose rerekoghe andenyi ya ngome ya mzuri. Wokoni ukawusa rija ngao ra dhahabu rerebonyeroghe ni Solomoni, ukaghenda naro.

²⁷ Mzuri Rehoboamu ukabonya ngao ra shaba wulalo ghwaro. Ukariwika rilindiloghe ni Wabaa wa walindiri, awo werelindiagha mbenge ya ngome ya mzuri.

²⁸ Kula ngelo mzuri orengiagha Hekalunyi, na walindiri werekoghe wikidwa iro ngao, na kuriwunja sena andenyi ya chumba charo.

²⁹ Mabonyo mazima ghose gha Mzuri Rehoboamu ghaandikilo andenyi ya Chuo cha Malagho gha Ngelo cha wazuri wa Juda.

³⁰ Korekoghe na wuda ngelo rose aghadi ya Rehoboamu na Jeroboamu.

³¹ Rehoboamu ukafwa, ukarikwa makaburinyi gha weke ndee mzinyi ghwa Daudi. Mae orewangwagha Naama Muamoni; mwana wake Abijamu ukabonya nguma wulalo ghwake.