1 WAZURI 13 - Biblia Ilagho Jiboie Kwa Wandu Wose

¹ Nao mlodi ukasea kufuma Juda wadumwa ni Mlungu kughenda Betheli. Ukamkua Jeroboamu uko kimusi madhabahunyi ufukire marumba.

² Niko uja mlodi ukaghikemia madhabahu kwa kunugha malaghiro gha BWANA ukighamba, “Ee madhabahu, madhabahu, BWANA waghamba huwu: ‘Mwana wa womi wa kivalwa cha Daudi uchavalwa na irina jake uchawangwa Josia. Uchawibwagha aighu yako wakohani widumikagha aighu yako, na maindi gha wadamu ghichakorwa aighu yako.’”

³ Nao ukawonyera alama ijo ituku jeni ukighamba, “Ihi niyo alama ewonyera kukaia ni Bwana waghora: Madhabahu ghichabarika, na maivu ghiko aighu yaro ghichadika.”

⁴ Mzuri uendasikira agho malagho gha mlodi, ukamloda ukighamba, “Mmbwadenyi uo mundu.” Nao mkonu ghwake ghukakelemia, ukalemwa ni kughukucha.

⁵ Agho madhabahu ghikabarika, na ivu jidadika sa iji koni mlodi oreghorieghe.

⁶ Mzuri Jeroboamu ukamzera mlodi, “Tafadhali nilombie kwa BWANA Mlungu wako, kumvoye mkonu ghwapo ghupate kuboa.” Mlodi wa Mlungu ukamlomba BWANA, na mkonu ghwa mzuri ghukaboa na kuwuya sa iji koni ghorekoghe.

⁷ Mzuri ukamzera mlodi, “Nndoko dighende mzinyi kupate vindo, nani nichakunosa.”

⁸ Mlodi ukamzera mzuri, “Sidimagha kughendanya na oho hata kukanineka nusu ya mali rako; sena sichaaja vindo hata kunywa machi aha;

⁹ kwa kukaia BWANA orenilaghirieghe niseje hata kunywa kindo chingi, hata nisewuye na ija chia nerechieghe nayo.”

¹⁰ Niko ukaghala kwa chia zima, hata nderewurieghe na ija chia orechieghe nayo anduangi.

Mlodi wa kala wa Betheli

¹¹ Ngelo iyo, korekoghe na mlodi wa kala orekoghe ukikaia Betheli. Wana wake wikacha na kumghoria malagho ghose uja mlodi oreghibonyereghe Betheli jija ituku na ghaja oremzerieghe mzuri.

¹² Ndee ukawikotia, “Wamaria hao?” Wana wake wikammbonyera ija chia mlodi wa Mlungu ufumie Juda uimare.

¹³ Ukawizera wana wake, “Nialienyi punda.” Wikamualia, nao ukamjoka.

¹⁴ Ukamnugha uja mlodi; ukamkua wasea kidombo aisi ya mwaloni. Nao ukamkotia, “Welee, oho ko uja mlodi ufumie Juda?” Ukatumbulia, “Ee ni ini moni.”

¹⁵ Niko ukamzera, “Nndoko diendeja vindo mzinyi.”

¹⁶ Mlodi ufumie Juda ukamtumbulia, “Ii hata, ndedighendagha kungi. Sijagha hata kunywa kindo chingi aha chiaimweri na oho.

¹⁷ BWANA wanikanie niseje vindo angu kunywa kindo chingi aha, hata nisewuye na ija chia nicherieghe nayo.”

¹⁸ Niko uja mlodi wa kala ufumie Betheli ukamzera “Ini wori ne mlodi sa oho; malaika wadedanya nani kwa ilagho ja BWANA ukinizera nikudo nyumbenyi kwapo kuje vindo.” Ela odemkalia.

¹⁹ Nao mlodi ufumie Juda ukawuyanya na uja mlodi wa kala, wikaja vindo nyumbenyi kwake.

²⁰ Nao iji werekoghe kidombo vindonyi, BWANA ukaghora na uja mlodi wa kala,

²¹ ukamkemia uja mlodi ufumie Juda ukighamba, “BWANA waghamba kukaia kwaleghie kumsikira, hata ndekughukatishire ghuja momu orekulaghirieghe.

²² Wulalo ghwa agho, kwawuya kukaja vindo andu nerekukanieghe kuseje. Kwa wundu ugho, kuchabwaghwa na mumbi ghwako ndeghuchaarikilwa makaburinyi mzenyu.”

²³ Wiendameria kuja, uja mlodi wa kala ukamualia punda uja mlodi ufumie Juda;

²⁴ nao uendafuma ughale, ukakwana na shimba chienyi ikam'bwagha. Mumbi ghwake ghukakumbwa achienyi; punda na shimba rikakaia kimusi mbai na mbai ya ghuja mumbi.

²⁵ Wandu wamu werekoghe wikiida wikaghuwona ugho mumbi chienyi, na shimba iko kimusi mbai na mbai yaro. Wikaghenda na kughora agho malagho mzinyi andu uja mlodi wa kala orekoghe.

²⁶ Mlodi wa kala uendasikira agho malagho, ukaghamba, “Uo ni uja mlodi oreleghieghe kumsikira BWANA. Kwa huwo BWANA wamfunyira shimba ikam'bwagha, sa iji koni oreghorieghe.”

²⁷ Nao ukawizera wana wake, “Nialienyi punda.” Wikamuala.

²⁸ Ukaghenda ukaghuwona mumbi ghwa uja mlodi wa Mlungu ghuko achienyi, na shimba na punda riko kimusi mbai na mbai ya ugho mumbi. Shimba ndeerejieghe ugho mumbi, hata kubwagha punda.

²⁹ Niko uja mlodi wa kala ukaghuduka ghuja mumbi ghwa mlodi, ukaghuwikiria aighu ya punda na kughureda mzinyi, eri um'bonyere ifwa na kumrika.

³⁰ Ukaghurika kaburinyi yake moni, na kumlilia ukighamba, “Weei ngai mwanidu ado!”

³¹ Nyuma ya kumrika ukawizera wana wake, “Ngafwa moonirika ikaburi cheni ihi; mumbi ghwapo na maindi ghapo mooghiwika kaavui na ghake.

³² Malagho ughighorie kwa irina ja BWANA aighu ya madhabahu ghiko Betheli, na aighu ya iro nyumba retasira riaghilo mghondinyi andenyi ya mizi ya Samaria, kwa loli ghichakatia.”

Kaung'a ichumbie ya Jeroboamu

³³ Hata nyuma ya huwo saki, Mzuri Jeroboamu nderesighieghe wuwiwi ghwake, ela ukachuria kuwika wakohani andu kotasira mighondinyi icho kisha kufuma kwa wandu wa ndonyi. Mundu uo ose orekundeghe wukohani, Jeroboamu wadammbika ukaie mkohani wa andu kotasira mighondinyi.

³⁴ Ilagho ijo jikawuya kaung'a emnona Jeroboamu na kivalwa chake, hata chikatoteshwa chisewoneke ndoenyi.