1 WAZURI 12 - Biblia Ilagho Jiboie Kwa Wandu Wose

Kukudumbua kwa vichuku va kaskazinyi

¹ Rehoboamu ukaghenda Shekemu andu Waisraeli wose werekwanyikieghe wipate kum'bonya mzuri.

² Nao iji Jeroboamu mwana wa Nebati wasikira agho, (angu orekoghe Misri kwa kumkimbia Mzuri Solomoni), ukawuya kufuma Misri.

³ Wandu wa Israeli wikamdumia Jeroboamu momu uche kwawo. Jeroboamu na ikwanyiko jose ja Israeli wikacha na kumzera Rehoboamu,

⁴ “Ndeyo Solomoni orediwikirieghe ghongolo ilemere. Idana dakulomba kudipunguzire rija kazi ndeyo oredinekieghe, rikakaia sa ghongolo ilemere aighu kodu, nesi dichakudumikia.”

⁵ Ukawitumbulia, “Ghendenyi mkaie matuku adadu ima muche nimtumbulie.” Niko awo wandu wikaghenda.

⁶ Nao Rehoboamu ukawikotia njama waja waghosi werekoghe wanjama wa ndee Solomoni ngelo orekoghe moyo, ukighamba, “Mwawona awa wandu niwitumbulia wada?”

⁷ Wikamzera, “Kukakunda kuwidumikie awa wandu, kudedanye nawo nicha, nawo wichakudumikia kwa wuloli matuku ghose.”

⁸ Ela Rehoboamu ukaimenya ija njama ya waghosi, ukaghenda kulola njama ya wandu wa irika wizoghuanye.

⁹ Ukawikotia, “Mwawona diwitumbulie wada awa wandu werenilombieghe niwipunguzire kazi werenekeloghe ni aba?”

¹⁰ Wikamtumbulia, “Kuwizere huwu: ‘Chala chapo cha mwanake ni kirifu kuchumba kiwonu cha aba.

¹¹ Aba oremdukishireghe misigo ilemere, ini nichamdukishira ilemere kuchumba; oremdamieghe na kiboko, ela ini nichamdama na kiboko cha mbela.’”

¹² Nao ituku ja kadadu, Jeroboamu ukawuya chiaimweri na waja wandu wose sa iji koni werelaghiriloghe ni mzuri Rehoboamu.

¹³ Mzuri ukamenya njama ya waghosi, ukadedanya na waja wandu kwa kubia.

¹⁴ Ukadedanya nawo kunughana na njama orenekeloghe ni wandu wa irika, ukighamba, “Aba oremdukishireghe misigo ilemere, ela ini nichamdukishira ilemere kuchumba; oremkabieghe na kiboko, ela ini nichamkaba na kiboko cha mbela.”

¹⁵ Ugho ghodeeka ni mpango ghwa Mlungu, eri malagho oremghorieghe Jeroboamu mwana wa Nebati kwa momu ghwa mlodi Ahija Mshiloni ghipate kukatia; niko Rehoboamu useredimieghe kuinugha ija njama ya waghosi.

¹⁶ Nao iji wandu wose wa Israeli wawona kukaia mzuri nderewisikireghe, wikamtumbulia mzuri, “Deko na ifunguki kwa Daudi? Isi ndediwadie ifwa jingi kwa mwana wa Jese. Kula Muisraeli ndewuye cha hemenyi kwake! Wen-Daudi ndewikuzighane weni.” Niko Waisraeli wikawuka na kughenda cha hemenyi kwawo.

¹⁷ Ela Rehoboamu ukawibonyera nguma wandu wa Israeli werekoghe wikikaia mizi ya Juda.

¹⁸ Niko Rehoboamu ukamduma Adoramu uo orekoghe mnyapara wa wandu wa kazi redumikishwa ughende kwa Waisraeli; ela wikamlasa na magho hata ukafwa. Rehoboamu kuwona huwo, ukashashira, ukajoka igarenyi jake, ukakimbia cha Jerusalemu.

¹⁹ Kufuma ngelo iyo, Wuzuri ghwa kaskazinyi ghwa Israeli wikakutanya na wuzuri ghwa Daudi hata linu.

²⁰ Hata iji wandu wa Israeli wose wasikira kukaia Jeroboamu wamerie kuwuya, wikamdumia momu uche ikwanyikonyi; nawo wikam'bonya ukaie mzuri aighu ya Israeli. Ndekuwadie mndungi wa Israeli orenughieghe nyumba ya Daudi ela mbari ya Juda.

Wulodi ghwa Shemaia

²¹ Hata iji Rehoboamu wavika Jerusalemu, ukawiwanga masikari ghiko mang'oni wa mbari ya Juda na Benjamini wandu elfu ighana na mirongo wunyanya, wipate kulwa na wuzuri ghwa kaskazinyi ghwa Israeli, upate kughuwunja ugho wuzuri kwa Rehoboamu mwana wa Solomoni.

²² Ela Mlungu ukamzera mlodi Shemaia

²³ umzere Rehoboamu mwana wa Solomoni, mzuri wa Juda na wandu wose wa kichuku cha Juda na Benjamini huwu:

²⁴ “Msejoke kulwa na wanyinyu wandu wa Israeli. Wuyenyi kula mundu mzinyi kwake, kwa kukaia ilagho iji jaafuma kwapo.” Nao wikamsikira BWANA, wikaghenda cha mizinyi kwawo.

Jeroboamu kumsigha BWANA

²⁵ Mzuri Jeroboamu wa Israeli ukaagha ngome Shekemu, isanga ja mighondinyi ja Efraimu, ukakaia aho. Ukafuma aho na kuagha Penueli.

²⁶ Jeroboamu ukaririkanya ngolonyi kwake, “Wuzuri ughu ghwadima kuwuya kwa nyumba ya Daudi.

²⁷ Awandu wikajoka kufunya vizongona kwa BWANA Hekalunyi Jerusalemu, wadima kughalusa maghesho ghawo wimmburie Mzuri Rehoboamu wa Juda, nawo winibwaghe.”

²⁸ Nyuma ya kujipima, ukachana ngache iwi ra dhahabu. Ukawizera wandu, “Mduajokali Jerusalemu; milungu yenyu hei ee wandu wa Israeli, iyo eremjosereghe kufuma isanga ja Misri.”

²⁹ Ukawika ngache imu Betheli, na imu ukaiwika Dani.

³⁰ Ilagho iji jikawuya kaung'a, kwa kukaia wandu wamu werekoghe wikighenda kutasa hata Dani.

³¹ Sena Jeroboamu ukaagha andu kotasira mighondinyi; ukawika wakohani icho kisha, wiseko wa kichuku cha Lawi.

Kutanywa kwa wutasi ghwa Betheli

³² Jeroboamu ukawika ndima ya kidini, ituku ja ikumi na isanu ja mori ghwa wunyanya, kara kara na iyo iwikwagha isanga ja Juda. Ukafunya vizongona madhabahunyi kwa iro ngache oreribonyereghe aho Betheli. Ukawika wakohani Betheli kwa wundu ghwa iro nyumba retasira oreriaghieghe mighondinyi.

³³ Ituku ja ikumi na isanu ja mori ghwa wunyanya, ituku ujiwikie moni, ukaghenda Betheli na kufunya vizongona aighu ya madhabahu kwa wundu ghwa ndima oreiwikieghe kwa wandu wa Israeli.