1 WAZURI 11 - Biblia Ilagho Jiboie Kwa Wandu Wose

Solomoni kumsigha Mlungu

¹ Mzuri Solomoni orekoghe warirwa ni waka wengi wa kighenyi kula na uja mwai wa mzuri wa Misri oremlowueghe. Ukalowua waka kufuma Moabu, na Amoni, na Edomu, na Sidoni, na kwa Wahiti.

² Ukalowua kufuma kwa mbari iro Mlungu orekanieghe wandu wa Israeli wiseloworane, wichewighalua ngolo rawo na kutasa milungu mizima.

³ Orelowueghe wai wa wazuri maghana mfungade, na waka wekanya maghana adadu. Waka awo wikaghalua ngolo ya Solomoni ukatasa milungu mizima.

⁴ Ngelo ya wughosi ghwake, waka wake wikaghalua ngolo yake kutasa milungu mizima hata nderekoghe mloli kwa Mlungu wake seji ndee Daudi orekoghe.

⁵ Ukatasa mlungu ghwa waka Ashtorethi ghwa Sidoni, na mlungu ghwa wuchafu ghwa Waamoni.

⁶ Kwa huwo Solomoni ukabonya wuwiwi imbiri ya BWANA, hata nderedimieghe kumnugha Mlungu putu seji ndee Daudi orebonyereghe.

⁷ Solomoni ukaagha aighu mghondinyi mashariki ya Jerusalemu andu kotasira ugho mlungu Kemoshi wuchafu ghwa Wamoabu, na mlungu Moleki wuchafu ghwa Waamoni.

⁸ Wokoni ukawiaghia waka wake wa kighenyi wose andu kotasira. Wikakaia wikifukira marumba na kufunya vizongona kwa milungu yawo.

⁹ BWANA uo Mlungu wa Israeli ukam'bonyera Solomoni machu angu oremsighieghe; nao oremfutukieghe mando awi.

¹⁰ Hata ngera oremkanieghe Solomoni usetase milungu mizima, ela nderewadieghe malaghiro agho BWANA oremlaghirieghe.

¹¹ Niko BWANA ukamzera Solomoni, “Kwa kukaia kwalemelo ni kujiwadia ilaghano japo na sharia rapo nerekulaghirieghe, loli nichaghuwagha wuzuri ghwako na kughuneka mdumiki wako.

¹² Ela kwa wundu ghwa ndeyo Daudi, sichaabonya huwo matuku ghako, ela nichabonya matuku gha mwana wako.

¹³ Elaima sichaaghuinja putu ugho wuzuri; nichamneka mwana wako uibonyere nguma mbari imweri kwa wundu ghwa mdumiki wapo Daudi, na kwa wundu ghwa ugho muzi ghwa Jerusalemu nereghusaghueghe.”

Wamaiza wa Solomoni

¹⁴ Niko BWANA ukammbusira Hadadi wa nyumba ya kiwuzuri ya Edomu ukaie m'maiza wa Solomoni.

¹⁵ Kwa kukaia iji Daudi orelwagha na Edomu, Joabu uja m'baa wa majeshi, iji oreghendieghe kurika wandu werebwaghiloghe, orewibwaghieghe womi wose wa Edomu.

¹⁶ Joabu na Waisraeli wose werekaieghe aho kwa meri irandadu, hata wikameria kuwibwagha womi wose wa Edomu.

¹⁷ Ela Hadadi uko mwana mtini chiaimweri na wadumiki wamu wa ndee, werekimbirieghe cha Misri.

¹⁸ Wikafuma Midiani na kughenda Parani. Wikadwa wandu wamu kufuma Parani wikaghendanya nawo hata kwa mzuri wa Misri. Mzuri ukamneka Hadadi isanga na nyumba ekaia, sena ukamneka vindo.

¹⁹ Hadadi ukakundwa ni mzuri wa Misri. Ukamlowora mlamu wake, nao ni mruna Malkia Tapenesi.

²⁰ Uja Tapenesi mruna, ukamvaia Hadadi mwana wa womi uwangwagha Genubathi; ukamlela andenyi ya nyumba ya mzuri, nao ukakaia aghadi ya wana wa mzuri.

²¹ Ela iji Hadadi wasikira aho Misri kukaia Daudi wamerie kufwa na Joabu uja m'baa wa majeshi wori wafue, ukamzera mzuri, “Nisighe niwuye isangenyi kwapo.”

²² Ela mzuri ukamzera, “Niki kwasowa kwapo hata chikubonye kukunde kuwuya isangenyi kwako?” Ukatumbulia, “Neekunda tu kunisighe nighende.”

²³ Sena Mlungu ukawusira Rezini mwana wa Eliada upate kubonya wumaiza na Solomoni; nao orekoghe wakimbia kufuma kwa bwana wake Hadadezeri mzuri wa Soba.

²⁴ Orekoghe wawikwanya wandu chiaimweri na kubonya izungu ja viting'a, uo moni ukikaia kilongozi wawo. (Malagho agha gherebonyekieghe ingelo Daudi oremsimieghe Hadadezeri na kubwagha ijeshi jake ja Siria.) Rezini na wandu wake wikaghenda na kukaia Dameshki, na wandu wake wikam'bonya ukaie mzuri aho.

²⁵ Orekoghe m'maiza wa wandu wa Israeli matuku ghose gha Solomoni; ukabonya maza rizamie sa iji koni Hadadi orebonyereghe; ukakaia ukizamilwa ni wandu wa Israeli, na kubonya nguma aighu ya Siria.

Ilaghiro ja Mlungu kwa Jeroboamu

²⁶ Mndumu ughalukie na kuwuya m'maiza wa Solomoni orekoghe umu wa wabaa wake moni, Jeroboamu mwana wa Nebati Muefraimu wa Sereda; mae orewangwagha Serua nao orekoghe muka ufulo ni mumi wake.

²⁷ Orebonyereghe wumaiza na mzuri kwa chia ihi: Solomoni oreaghieghe viluwatiro vemaziria, na kuboisa wurigha ghwa muzi ghwa ndee Daudi.

²⁸ Jeroboamu orekoghe mundu uko na kudima. Solomoni ukammbika ukaie mzighaniri wa wandu wose wa kazi redumikishwa wa isanga ja Efraimu na Manase.

²⁹ Ngelo iyo, iji Jeroboamu orekoghe ukifuma Jerusalemu, ukakwana na mlodi umu uwangwagha Ahija Mshiloni; nao orekoghe warwa nguwo mbishi, wikakaia kimusi wiekeri wawi chienyi amlambenyi.

³⁰ Nao Ahija ukaiwada iyo nguwo mbishi oreirwaeghe, ukairashua vibelele ikumi na viwi.

³¹ Ukamzera Jeroboamu, “Wada ivi vibelele ikumi, kwa kukaia BWANA Mlungu wa Israeli waghamba huwu, ‘Ola nalighisa kughuwaghanya wuzuri ghwa Solomoni ghufume kwake, nani nichakuneka oho vichuku ikumi.

³² Ela nichamsighia kichuku chimweri kwa wundu ghwa mdumiki wapo Daudi na kwa wundu ghwa Jerusalemu, muzi nereghusaghueghe aghadi ya mizi yose ya mbari ra Israeli.

³³ Kwa kukaia wanisighie ini, ukawoka kutasa Ashtorethi mlungu ghwa waka ghwa Wasidoni, na Kemoshi mlungu ghwa Wamoabu na Milkomu mlungu ghwa Waamoni; nao ndewuebonya agho ghiko gha hachi imbiri kwapo, kwa kuiwadia memu yapo na sharia rapo kara kara na ndee Daudi.

³⁴ Elaima sichaaghuinja ugho wuzuri kwake putu, ela nichamsigha ubonye nguma irangi jake jose, kwa wundu ghwa mdumiki wapo Daudi, uo neremsaghueghe, nao oreiwadieghe memu yapo na sharia rapo.

³⁵ Nichamsoka mwana wake wuzuri, na kukuneka oho vichuku ikumi.

³⁶ Ela nichamsighia mwana wake kichuku chimweri uchibonyere nguma, eri nikaie na kivalwa cha mdumiki wapo Daudi chebonya nguma Jerusalemu matuku ghose, ugho muzi nereghusaghueghe nitasoghe aho.

³⁷ Oho Jeroboamu nichakubonya mzuri aighu ya Israeli yose, na oho kuchabonya sa iji koni ngolo yako ikunde.

³⁸ Kukanisikira kwa agho ghose nikulaghiragha, na kukaia seji nikundagha, na kubonya agho ghiko gha hachi imbiri kwapo kwa kuiwadia memu yapo na sharia rapo, sa iji koni mdumiki wapo Daudi orebonyereghe, nichakaia andwamweri na oho, nani nichakubonya kukaie mzuri wa Israeli, na kivalwa chako chikaie chikibonya nguma nyuma yako, sa iji koni nerebonyereghe kwa Daudi.

³⁹ Nichachikaba kivalwa cha Daudi kwa wundu ghwa kaung'a ya Solomoni, ela si ngelo rose anduangi.’”

⁴⁰ Kwa ilagho ijo, Solomoni ukalola kum'bwagha Jeroboamu, ela Jeroboamu ukakimbiria kwa Mzuri Shishaki wa Misri; ukakaia aho hata Solomoni ukafwa.

Kufwa kwa Solomoni

⁴¹ Maza rose zima ra Solomoni, na kula ilagho ujibonyere, na hikima yake vaandikilo andenyi ya chuo cha mabonyo gha Solomoni.

⁴² Solomoni orebonyereghe nguma Jerusalemu aighu ya Israeli yose kwa miaka mirongo ina.

⁴³ Solomoni ukafwa ukarikwa andenyi ya muzi ghwa ndee Daudi; na mwana wake Rehoboamu ukabonya nguma wulalo ghwake.