1 WAZURI 10 - Biblia Ilagho Jiboie Kwa Wandu Wose

Kucha kwa Malkia wa Sheba

¹ Nao iji Malkia wa Sheba wasikira sare ya Solomoni, na seji umtasagha BWANA, ukacha Jerusalemu kumtima kwa makoto ghikurie.

² Orechanyeghe na wadumiki wengi, na ngamila raduka marumba, na dhahabu nyingi na magho gha zoghori mbaa. Hata iji wavika Jerusalemu, ukamghoria Solomoni agho ghose gherekoghe ngolonyi kwake.

³ Solomoni ukamtumbulia makoto ghake ghose; nderelemeloghe ni kutumbulia ilagho jingi jake.

⁴ Malkia wa Sheba ukasikira iyo hikima ya Solomoni, na kuwona iyo ngome oreiaghieghe.

⁵ Ukawona seji oredumikilwagha vindonyi, na nyumba rerekailwagha ni wabaa wa serikali yake, na seji wadumiki wake wererwaeghe wikidumika, na wanyoshi wake, na ivo vizongona orefunyagha Hekalunyi, ukashinika na ndighi.

⁶ Ukamzera Mzuri Solomoni, “Malagho gha kazi rako na hikima yako nighisikire isangenyi kwapo ni gha loli.

⁷ Ela sereghirumirieghe hata ngacha na kuwona kwa meso ghapo. Nawona sighorelo hata nusu yaro; hikima na mali rako rachumba malagho nighorelo.

⁸ Waka wako weko na bahati! Na wadumiki wako wikaiagha kimusi imbiri kwako wikisikiria iyo hikima yako weko na bahati!

⁹ BWANA Mlungu wako ndekaso! Wawonyera seji uboilo ni oho kwa kukuwika kukaie mzuri wa Israeli. Kwa kukaia Mlungu wawikunde Israeli kwa kala na kala, wakuwikie kukaie mzuri wawo, eri kupate kubonya gha loli na gha hachi.”

¹⁰ Nao ukamneka Mzuri Solomoni manosi agho oredwaeghe: dhahabu ichumbagha kilo elfu inya, na vilungo vingi nandighi, na lulu. Jingi mndungi ndemnekie mzuri vilungo vingi sa ivo.

¹¹ (Meli ra Hiramu rereredieghe dhahabu kufuma Ofiri, reredwaeghe midi ya msandali kwa wungi na lulu.

¹² Solomoni ukatumia iyo midi kwa kubonya ighombo ja Hekalu na ja ngome ya mzuri. Wokoni ukabonya vinubi na zeze kwa wundu ghwa wabori. Ndekuwadie misandali ingi iredelo angu kuwoneka sa iyo hata linu.)

¹³ Mzuri Solomoni ukamneka Malkia wa Sheba kula kilambo orechikundieghe, kula na ivo oremnekieghe kwa ishima. Niko Malkia wa Sheba ukawuka na kughenda isangenyi kwake chiaimweri na wadumiki wake.

Wuzuri ghwa mali ghwa Mzuri Solomoni

¹⁴ Dhahabu yose ereredeloghe kwa Solomoni andenyi ya mwaka ghumweri ni kilo elfu mirongo iwi na idadu,

¹⁵ kula na iro orekoghe ukipata kufuma kwa wandu wa biashara, na kufuma kwa wazuri wose wa Arabu na wabaa wa isanga.

¹⁶ Mzuri Solomoni ukabonya ngao mbaa ra dhahabu ichanilo maghana awi, kula ngao erekandiloghe dhahabu iko na wulemeri ghwa kilo mfungade.

¹⁷ Wokoni ukabonya ngao rimu ndini ra dhahabu maghana adadu riko na wulemeri ghwa kilo iwi kula imu. Ngao iro rose rikawikwa andenyi ya nyumba ya Msidu ghwa Lebanoni.

¹⁸ Wokoni mzuri ukabonya kifumbi cha nguma kibaa cha mbembe ra chovu; ukachikanda dhahabu ielie naighu.

¹⁹ Icho kifumbi cha nguma cherekoghe na viluwatiro virandadu vejokia; nanyuma yaro, korekoghe na fwana ya chongo cha ng'ombe, na kula luwaru lwaro koreboisiroghe andu kowikiria mikonu iko na fwana ya shimba mbai na mbai yaro.

²⁰ Kutuonyi kwa kula kiluwatiro ii chia na ii chia, korekoghe na fwana ya shimba imweri. Viluwatiro vose vikakaia na shimba ikumi na iwi. Ndekuwadie wuzuri ghungi jingi ghubonyere kifumbi sa icho.

²¹ Vilambo vose venywa va Mzuri Solomoni verekoghe va dhahabu, na vilambo vose verekoghe andenyi ya nyumba ya Msidu ghwa Lebanoni verekoghe va dhahabu ielie. Ndekorekoghe na kilambo chingi cha feza, kwa kukaia feza ndeeretaliloghe kukaia kilambo chingi matuku gha Solomoni.

²² Mzuri orekoghe na meli ra biashara rerekoghe rikidambanya baharinyi na meli ra Hiramu. Indo jimweri kula miaka idadu rerekoghe rikireda dhahabu, na feza, na mbembe ra chovu, na fuwe, na sawau.

²³ Mzuri Solomoni orekoghe wawichumba wazuri wose wa ndoenyi kwa mali na hikima.

²⁴ Ndoenyi kose wandu wikalola kummbona Solomoni, wipate kusikira iyo hikima Mlungu oreingirieghe andenyi kwake.

²⁵ Kula umu wawo ukareda manosi gha vilambo va feza na dhahabu; nguwo na maswagha, vilungo na farasi na nyumbu; maza iri rikakaia rikibonyeka mwaka-mwaka.

²⁶ Solomoni ukatumbanya magare na farasi. Orekoghe na magare elfu na maghana ana na farasi elfu ikumi na iwi. Ukariwika rimu Jerusalemu na rimu mizi mizima.

²⁷ Ngelo ra kubonya nguma kwa mzuri Solomoni, feza edeeka kilambo cha kawaida sa igho aho Jerusalemu, midi ya sida edeeka kwa wungi sa miku ya virimbenyi va mighondi.

²⁸ Farasi ra Solomoni rerekoghe rikiredwa kufuma Misri na Kilikia, na washami wa mzuri wikarighua kufuma Kilikia.

²⁹ Werekoghe wikireda kula igare kufuma Misri kwa vibelele va feza maghana arandadu, na farasi kwa ighana na mirongo misanu. Wikaridambisha kwa wazuri wa Wahiti na Wasiria.