1 WAKORINTHO 9 - Biblia Ilagho Jiboie Kwa Wandu Wose

Hachi na kazi ra mdumi

¹ Welee, ini siko huru? Ini se mdumi? Kwani simmbonie Jesu Bwana odu? Na inyo si mavalo gha kazi yapo andenyi ya Bwana anguwada?

² Ikakaia niseko mdumi kwa wazima, neko mdumi konyu; angu muhuri ghwa wudumi ghwapo, ni inyo andenyi ya Bwana.

³ Kukudederia kwapo kwa awo winikotiagha ni huwu:

⁴ Ndediko na hachi eja na kunywa?

⁵ Ndediko na hachi enughana na muka urumiriagha, karakara na wadumi wazima, na waruna Bwana, na Kefa anguwada?

⁶ Anguu, ni Barnaba na nimoni diekeri idifwane dibonye kazi, eri didime kukaia moyo?

⁷ Nani udumikagha sa asikari kwa gharama rake moni? Nani uwagha mizabibu usejagha matunda gharo? Nani ulishagha mfugho usenywagha mariwa?

⁸ Welee, naawuyaghora kidamu? Sharia ndeiwueghora wokoni anguwada?

⁹ Angu yaandikilo andenyi ya Sharia ya Musa, “Kusakefunga ng'ombe momu ngelo ikikuwida viro.” Huwo Mlungu waawuyaririkanya ng'ombe reni?

¹⁰ Welee, ndaawuyaghora ilagho iji kwa wundu ghodu ghonii anguwada? Nechi jedeandikwa kwa wundu ghodu; angu yamfwana uo ulimagha na uo ukuwidagha wibonye kazi kwa isuwirio jewaghana viro.

¹¹ Ikakaia diwae mecha gha kiroho aghadi konyu, ni ilagho ibaa dikakuwida fwaida renyu ra kimmbi?

¹² Ikakaia wazima wiko na hachi esuwiria maza iro kufuma konyu, isi si kuchumba anguwada? Elaima, ndedicheeritumia iro hachi anduangi. Wulalo ghwaro, darumaghia maza rose, kuchumba kuwika ikuwisho andenyi ya chia ya Ilagho Jiboie ja Kristo.

¹³ Welee, ndemmanyire angu awo wiandikilo widumike Hekalunyi wadaja vindo va Hekalunyi, na awo widumikagha madhabahunyi wadapata iwaghio ja ivo vizongona vifunywagha anguwada?

¹⁴ Ni huwo koni na Bwana walaghirie, angu awo wichilagha Ilagho Jiboie, wichakupatira vindo ahoeni.

¹⁵ Ela ini situmie ingi ya hachi iro anduangi; hata siwueandika huwu ngikunda kulawia iro hachi anduangi. Baa nifo, kuchumba mndungi kuniinjira hachi ya kukukasa kwapo.

¹⁶ Angu ngera najichila Ilagho Jiboie, ijo ndejininekagha hachi ekukasa; angu nawikilwa suti ejichila. Ni bugha kwapo ngakaia nisejichilagha Ilagho Jiboie.

¹⁷ Angu ngajichila kwa kukunda kwapo koni, nisuwiria mafungu; ela naawuyajichila kwa kukaia ni kazi yapo, angu Mlungu uninekie ugho wudumiki nighubonye.

¹⁸ Da mafungu ghapo niki sena? Ni agha gheni agha: Nijichile Ilagho Jiboie duu niselipwagha, hata kulawia hachi ringi ra kazi yapo ya Ilagho Jiboie.

¹⁹ Angu hata ngera siko mzumba wa mndungi, ela nakubonyere mzumba wa wandu wose, eri niwipate wandu wengi kuchumba.

²⁰ Kwa Wayahudi, nerewurieghe sa Myahudi; eri niwipate Wayahudi. Kwa wandu wiko aisi ya Sharia, nerewurieghe sa mundu uko aisi ya Sharia; (hata ngera ini moni siko aisi ya Sharia), eri niwipate awo wiko aisi ya Sharia.

²¹ Kwa wandu wisenughagha Sharia, nerewurieghe sa mundu usenughagha Sharia. Ini moni sikaiagha niseinughagha sharia ya Mlungu anduangi, ela neko aisi ya Sharia ya Kristo; eri niwipate awo wisewuyeinugha Sharia.

²² Kwa wanyonge, nerewurieghe sa mnyonge, eri niwipate wanyonge. Nawurie wa chia rose kwa wandu wose, eri niwikire wamu kwa chia iyo yose idimikagha.

²³ Maza iri naawuyaribonya kwa wundu ghwa Ilagho Jiboie, eri nipate iwaghio ja marasimio gharo.

²⁴ Wele ndemmanyire angu awo wose wikimbiagha msarighonyi wadaisana, ela uo upatagha zawadi ni umweri? Nenyo kimbienyi wokoni, eri mpate zawadi.

²⁵ Kula mundu ose wa misarigho wadakuzaisira kukumazira moni kwa maza rose. Wabonya huwo, eri wipate kirumbu chiseduagha; ela isi ni kupata kirumbu chiduagha.

²⁶ Nani moni naawuyakimbia, si sa mundu uko na ngera; naawuyakumba ngonde, si sa mundu ukabagha mbeo;

²⁷ ela naghubwaghishira mumbi ghwapo na kughumazira; isechekaia nyuma ya kuwichilia wazima, ini moni nilegho.