1 WAKORINTHO 8 - Biblia Ilagho Jiboie Kwa Wandu Wose

Ikoto aighu ya vindo vifunyiro kwa milimu

¹ Idana kwa wundu ghwa malagho gha vindo vifunyiro kizongona kwa milimu, damanya angu, “Isi diwose deko na kumanya.” “Kumanya,” kwadabandisha chongo, ela lukundo lwadaagha.

² Ngera mndungi waririkanya kukaia waichi kilambo chingi, waduagha useichi kilambo chingi seji imfwane umanye.

³ Ela uo mundu umkunde Mlungu, wamanyikie kwake.

⁴ Wokoni na kuja vindo vifunyiro kizongona kwa milimu, isi damanya angu “Milimu si kilambo chingi,” na angu Mlungu ungi mzima ndeuko, ela umweri.

⁵ Angu hata ngera veko vilambo mlungunyi angu ndoenyi viwangwagha “milungu,” sa iji koni loli iko “milungu,” milazi na weke “bwana,” walazi;

⁶ ela kodu isi Mlungu ni umweri, uja Aba, Muumbi wa vilambo vose; nesi kwa wundu ghwake, dadakaia moyo; na Bwana umweri Jesu Kristo, kwa chia yake uo, vilambo vose vereumbiloghe; na kwa chia yake uo, isi dakaia moyo wori.

⁷ Elaima si wandu wose wiko na uko kumanya anduangi. Wandu wamu kwa kuilisa milimu na ndighi, hata idime, iji wakaja vindo, wadaghesha seji loli veefunywa kwa mlimu; na nia rawo ra wunyonge radalushwa.

⁸ Elaima vindo ndevidimagha kudisoghora kaavui na Mlungu anduangi. Dikakaia disejie, ndedipungukilwagha ni kilambo chingi; hata dikaja, ndedichurikiagha kwa kilambo chingi anduangi.

⁹ Ela mlindie ugho wuhuru ghonyu ghobonya malagho ghusekuwishe wanyonge.

¹⁰ Ngera mundu wa nia ya wunyonge, wakuwona oho kumanyagha kwasea kidombo kukija andenyi ya hekalu ya milimu, welee, ndechaanekwa ngolo eja vindo vifunyiro kizongona kwa milimu anguwada?

¹¹ Na mundu uo mnyonge, nao ni mwanyinyu uo Kristo ufue kwa wundu ghwake, uchatota kwa wundu ghwa uko kumanya kwako.

¹² Na huwo, kwa kuwibonyera wanyinyu kaung'a na kurishoghonua nia rawo ra wunyonge, kwam'bonyera kaung'a Kristo.

¹³ Kwa huwo, ikakaia vindo viamshekeria mwanidu ubonye kaung'a, na jingi sichaaja nyama, nichemshekeria mwanidu kungia kaung'enyi.