1 WAKORINTHO 7 - Biblia Ilagho Jiboie Kwa Wandu Wose

Makoto aighu ya kulowua

¹ Idana dighizighane agho malagho moreandikieghe. Ni nicha mndwawomi uselowuo.

² Ela kwa kukaia matimo gha wulaki gheko, ni nicha kula mundu ukaie na mkake moni, na kula muka ukaie na mndwawomi wake moni.

³ Uo mndwawomi ndemneke muka wake iro riko hachi yake, na uo muka ndebonye wokoni kwa mumi wake.

⁴ Angu uo muka ndena nguma aighu ya mumbi ghwake moni, ela ni uo mumi wake. Wokoni na uo mumi ndena nguma aighu ya mumbi ghwake, ela ni uo muka.

⁵ Msakeimana mmbeni na mmbeni, isaakaia ngera moorumiriana kubonya huwo kwa ngelo; eri mpate wulalo ghokufunya kwa kulomba Mlungu, nyuma yaro mmburiane sena; Shetani usechepata wulalo ghomtima kwa kusowa kukumazira.

⁶ Ini naamneka njama, si malaghiro ghangi.

⁷ Nakundeghe kumangu wandu wose wadakaia seji niko; ela kula mundu oko na inosi jake ja chiaro kufuma kwa Mlungu; mndumu huwu na mndumu wuzima.

⁸ Kwa awa wiselowuane na waka wifulo ni womi wawo, niaghamba; ni nicha kwawo wikakaia sa iji niko.

⁹ Ela wikalemwa ni kukumazira weni, ni nicha wilowuo. Angu ni baa kulowua kuchumba kuaka modo kwa bea.

¹⁰ Kwa awo wilowue, nafunya momu; sena si ghwapo ghungi, ni ghwa Bwana; kukaia, muka usakemsigha mumi wake.

¹¹ (Ela ukamsigha, uselowolo; si huwo, uwuriane na mumi wake) na mndwawomi nao usakemsigha mkake.

¹² Kwa awo wazima niaghamba huwu, (ela si Bwana ungi ughambie); ngera mwanidu ungi oko na muka userumirie, na uo muka wakunde kuduanya nao, uo mwanidu usemleghe.

¹³ Na ngera muka ungi oko na mumi userumirie, na uo mumi wakunde kuduanya nao, uo muka usemleghe.

¹⁴ Angu uo mumi userumirie warumirilwa ni Mlungu kwa chia ya mkake, na muka userumirie warumirilwa kwa chia ya mumi wake. Ngera si huwo, kumangu wana wenyu ndewirumirilo; ela seji iko, warumirilwa.

¹⁵ Ela ikakaia umu wawo userumirie wakunda kutana na mmbao, ndebonye wokoni. Aho mwanidu wa womi angu wa waka ndefungilo kungi. Angu Mlungu oodiwangia sere.

¹⁶ Kwamanya wada oho muka, kewada kwadima kumkira mmigho? Na oho mndwawomi, kwamanya wada kewada kwadima kumkira mkako?

Kukaia seji koni Mlungu ukuwangie

¹⁷ Elaima kula mundu ndekaie sa iji koni Bwana umnekie, na sa iji koni Mlungu ummbangie. Na iji nijo ilaghiro japo kwa makanisa ghose.

¹⁸ Ikakaia mndungi orewangiloghe uko ushamishiro, usekelola kuinja alama ra kushamishwa kwake. Na ikakaia mndungi usereshamishiroghe ngelo ya kuwangwa kwake, usakelola kushamishwa.

¹⁹ Angu kushamishwa angu kulegha kushamishwa si kindo chingi anduangi; ela ilagho ni kuimazira iyo memu ya Mlungu.

²⁰ Kula mundu ndekaie sa iji koni orekoghe ngelo ya kuwangwa kwake.

²¹ Ikakaia kodeeka mzumba ingelo korewangwagha, kusesumbuke. Ela kukadima kufuma wuzumbenyi kughutumie ugho wuhuru.

²² Angu uo orewangiloghe ni Bwana ngelo uko mzumba, ni mundu ufungulo andenyi ya Bwana. Huwo koni uo orewangiloghe usefungilo, ni mzumba wa Kristo.

²³ Inyo moreghuloghe kwa ighuri; kwa huwu msakewuya wazumba wa wandu.

²⁴ Kwa wundu ugho wanidu, sa iji koni kula mundu orekoghe ingelo orewangwagha, ndekaie huwo koni na wungara na Mlungu.

Makoto aighu ya wandu wiselowue na waka wifulo ni womi

²⁵ Idana kwa wundu ghwa malagho gha wandu wiselowue, siwadie momu ghungi ghwa Bwana anduangi; ela niafunya maghesho ghapo ini moni sa mundu nirumirikie kwa wughoma ghwa Bwana.

²⁶ Niawona, kwa wundu ghwa wasi ghuko agha matuku, ni nicha mundu ukaie sa iji koni uko.

²⁷ Ikakaia kulowue, kuselole kufungulwa; na ikakaia kusewadie muka, kuselole kulowua.

²⁸ Ela kukalowua, ndekubonyere kaung'a ingi; na mwai ukalowolwa, ndebonyere kaung'a ingi. Ela sena, awo wilowuagha wichakaia na masumbuko gha wurumwengunyi; nani nedekunda mseghingie.

²⁹ Naawuyaghamba huwu wanidu, ngelo isigharikie ni ndini na ndighi. Kufuma idana, awandu wiko na waka wikaie sa wisewadie;

³⁰ awo wililagha, wikaie sa wiselilagha; awo wiboilwagha, wikaie sa wiseboilwagha; awo wighuagha, wikaie sa wisewadie vilambo;

³¹ na awo wawuyabonya maza ra ndoenyi, wikaie sa wisewueribonya. Kwa kukaia wurumwengu ughu seji ghuko ghwaawuyaida.

³² Neekunda mseje wasi kwa ilagho jingi. Mundu uselowue, wadasumbukia maza ra Bwana seji udimagha kum'boia Bwana.

³³ Ela mundu ulowue, wadasumbukia maza ra wurumwengu, seji udimagha kum'boia mkake;

³⁴ nao wakaia mundu orudwa ii chia na ii chia. Na muka uselowolo angu mwai, wadasumbukia maza ra Bwana seji udimagha ukaie uelie mumbinyi hata rohonyi wori. Ela muka ulowolo, wadasumbukia maza ra wurumwengunyi, seji udimagha kum'boia mumi wake.

³⁵ Naghora huwu kwa fwaida enyu, hata siwuemmbikia kighirio chingi anduangi; ela naawuyammbonyera iro maza rifwane kunugha, nenyo mpate kukufunya putu kwa kumdumikia Bwana.

³⁶ Ngera mndungi wawona ndewuekaia nicha na mchumba wake, ikakaia bea rake raamchumba ndighi, nao iawoneka suti wilowuane, ndebonye wokoni; ndewilowuane, si kaung'a ingi anduangi.

³⁷ Ela uo uko umange ngolonyi kwake, usewuesumbulwa ni ilagho jingi, ela oko na wundu ghwa kukumazira, na ngolo yake eekunda ukaie na mchumba wake wokoni; uchabonya nicha.

³⁸ Kwa wundu ugho, uo ulowuagha mchumba wake, uchabonya nicha; na uo uselowuagha, uchabonya nicha kuchumba.

³⁹ Muka wafungwa iji mumi uko moyo. Ela kasikira mumi wafwa, oko huru kulowolwa ni mundu uo ose umkundagha; ela andenyi ya Bwana tu.

⁴⁰ Ela seji niwonagha, uchakaia na kuboilwa kuchumba, ukadua sa iji koni uko. Nani namanya neko na Roho wa Mlungu.