1 WAKORINTHO 6 - Biblia Ilagho Jiboie Kwa Wandu Wose

Wakristo kushitakiana weni na weni

¹ Wele mndumu onyu ukakaia na ilagho aighu ya mruna, wadaghenda kotinyi ya wandu wisetalagha hachi wulalo ghoghenda kwa waeli?

² Huwu ndemmanyire waeli wichaghutanya wurumwengu? Na ikakaia mchaaghutanya wurumwengu-lee, mualemwa ni kutanya maza ndini ndini woruwu?

³ Huwu ndemmanyire dichawitanya weke malaika? Na ikakaia niko huwo, maza ra irangi iji si kuchumba!

⁴ Da mkakaia na maza sa iro, kwaki sena mrighenjagha kwa wandu awo wiseko kilambo chingi ikanisenyi?

⁵ Ughu ni waya konyu! Mndungi oosoweka putu loli aghadi konyu uko na hikima odima kuboisa maza aghadi ya mundu na mruna,

⁶ nao loli mundu udime wamwenja mruna kotinyi, sena icheni ya wandu wiserumirie?

⁷ Uko kushitakiana koni muko nako mmbeni na mmbeni, kuawonyera wori mwamerie kulemwa. Welee, si baa kukorongwa duu?

⁸ Si baa kusokwa? Ela inyo mwaawuyakoronga na kusoka wandu, sena aweni wiko wanyinyu.

⁹ Huwu ndemmanyire angu wawiwi ndewichaapata ifwa ja wuzuri ghwa Mlungu? Msakekalilwa; walaki, watasi milimu, wandu wiselagha na waka wa wandu, womi wikubonyagha weni sa waka, na womi wikanyagha na womi sa waka,

¹⁰ vitoi, wandu wibonyagha iriso, wawongeri, wandu wisholiagha, hata viting'a, ndewichaapata ifwa ja wuzuri ghwa Mlungu anduangi.

¹¹ Nenyo wamu modeeka woruwo; ela mwaoghoshero, mkaeleshwa, mkabonywa wahachi kwa irina ja Bwana Jesu Kristo na kwa Roho wa Mlungu odu.

Kuitumia mimbi kwa wubaa ghwa Mlungu

¹² “Vilambo vose kwapo vaboie,” ela si vilambo vose vifwanagha. “Vilambo vose kwapo vaboie,” ela sichaawikwa aisi ya kilambo chingi anduangi.

¹³ “Vindo veewikwa kwa wundu ghwa kifu na kifu kwa wundu ghwa vindo,” ela Mlungu uchavitotesha vose. Mumbi ndeghuwikilo kwa wundu ghwa wulaki, ela kwa wundu ghomdumikia Bwana, na Bwana kwa wundu ghwa mumbi.

¹⁴ Uo Mlungu oremrukishireghe Bwana kufuma kwa wafu, uchadirukisha na isi wori kwa ndighi rake.

¹⁵ Welee, ndemmanyire kukaia mimbi yenyu ni via va Kristo? Nao niwade via va Kristo, nivibonye via va ilaya? Najingi!

¹⁶ Angu huwo ndemmanyire uo ukuwadanishagha na ilaya wawuya mumbi ghumweri nao? Nechi ni sa iji iandikilo, “Waja wawi wichawuya mumbi ghumweri.”

¹⁷ Ela uhu uwadanishwagha na Bwana, uawuya roho imweri nao.

¹⁸ Kukimbienyi kulaka. Kula kaung'a mundu uibonyagha, wadaibonya shighadi ya mumbi; ela uo ulakagha, wadaghubonyera kaung'a mumbi ghwake ghoni.

¹⁹ Wele ndemmanyire mimbi yenyu ni hekalu ya Roho Mweli ukaiagha andenyi konyu, uo mumpatire kufuma kwa Mlungu? Nenyo ndemuko wenyu weni anduangi.

²⁰ Moreghuloghe kwa ighuri, kwa huwu itumienyi mimbi yenyu kwa wundu ghwa wubaa ghwa Mlungu.