1 WAKORINTHO 5 - Biblia Ilagho Jiboie Kwa Wandu Wose

Wulaki ikanisenyi

¹ Yawuyaghoreka wei ghoko wulaki aghadi konyu, nagho ni wulaki ima ghusekaiagha hata kwa watasi milimu; wei mndumu waawuyakanya na mka-ndee.

² Nenyo mooka na lubando. Ndeimfwaneghe mlile? Uo mundu ubonyere huwo, ndefunyo aghadi konyu.

³ Ini hata ngera sikwanye nenyo kwa mumbi, ela dekwanye kiroho; nani ngikaia seji deekanya, nameria kumtanya

⁴ kwa irina ja Bwana Jesu uo mundu ubonyere ilagho ijo. Mkakwana chia imweri, na roho yapo ikikaia chiaimweri nenyo, kwa ndighi ra Bwana odu Jesu,

⁵ mundu uo mumneke Shetani, mumbi ghutotesho, eri roho yake ikiro ijo Ituku ja Bwana Jesu.

⁶ Kukukasa konyu ndekuboie. Wele ndemmanyire chachu ndini yadawurusha idonge jose ja mufu?

⁷ Ifunyenyi na mbai ija chachu ya kala, mpate kuela na kukaia sa idonge iwishi ja mufu ghusengirilo chachu ingi. Angu Kristo, mwana wa ng'ondi odu wa Pasaka, wamerie kufunywa kizongona.

⁸ Kwa huwu ndedibonye ndima; si kwa chachu ya kala ya wuwiwi na wulaghe-laghe anduangi, ela kwa mkate ghusewadie chachu ghwa wueli na loli.

⁹ Andenyi ya barua yapo neremwandikieghe, nereghambieghe mserangane na walaki.

¹⁰ Huwo si kughamba wei ni walaki wa wurumwengu ughu putu, angu wandu wa iriso, viting'a, na watasi milimu; ngera ni huwo, ni suti mfume wurumwengunyi.

¹¹ Ela nedemwandikia ngimzera huwu: mserangane na mundu uwangwagha mwanidu iji wakaia mlaki, angu mundu wa iriso, angu mtasi milimu, angu mundu osholia, angu mmbongeri, angu kiting'a. Mundu ufwane huwo, msejanye nao putu.

¹² Anguu, ni kazi yapo kuwitanya wandu wa shighadi? Si awo wiko andenyi ya ikanisa ifwaneghe muwitanye?

¹³ Mlungu uwitanya waja wiko shighadi. “Mmbingenyi uja mundu mmbiwi ufume aghadi konyu.”