1 WAKORINTHO 4 - Biblia Ilagho Jiboie Kwa Wandu Wose

Wadumi wa Kristo

¹ Yafwane mundu udimanye huwu, kukaia isi de wadumiki wa Kristo, na wazighaniri wa iyo ngasu ya Mlungu.

² Sena yakundikie wazighaniri wikaie waloli.

³ Ela kwapo ini, ni ilagho itini nandighi kutanywa ni inyo, angu koti iyo yose ya kidamu; hata sikutanyagha nimoni anduangi.

⁴ Ini siichi ngera neko na ilagho jawuyanishitakia, ela ijo sijo jingi jiwonyeragha wei siwadie ikosa anduangi. Bwana nuo unitanyagha.

⁵ Kwa huwo msaketanya imbiri ya ngelo, Bwana usechee; uo uchaariwika mwengerenyi maza rivisiro kirenyi idana, nao uchaifunukua mipango ya ngolo ra wandu. Niko kula mundu uchapata kukaswa kwake kufuma kwa Mlungu.

⁶ Agho naghora gha Apolo na ini wanidu, ni kwa wundu ghonyu; ghipate kukaia fwana konyu, eri mkufundishe kodu; msakechachumba agho ghiandikilo, mndungi uchekukasa na mmbao, ukimmbona kukaia mucha kuchumba mzima.

⁷ Kwani-lee, nani ukubonyere kuwoneke wuzima? Anguu, niki kuko nacho icho kuserenekeloghe? Da ikakaia kodenekwa-lee, kukukasiraki sena seji ndekorenekeloghe?

⁸ Inyo mwamerie kughuda! Mwamerie kuwuya wazuri wa mali! Mwamerie kuwuya wazuri msekwanye nesi! Na loli kumangu mwabonya nguma, dipate kubonya nguma andwamweri nenyo.

⁹ Ini naawuyawona seji Mlungu oodiwika dikaie worinyi isi wadumi wa kutua, sa wandu ditanyiro kubwaghwa. Dakaia mazighano kwa wurumwengu, na kwa weke malaika, na kwa wadamu.

¹⁰ Dakaia wakelu kwa wundu ghwa Kristo, ela inyo moko na hikima andenyi ya Kristo. Dasowa ndighi, ela inyo mwawadie ndighi. Mwaawuyakaswa, ela isi daawuyasowelwa ishima.

¹¹ Hata huwu deeka njala, na kau; daawuyaenda na marasi, na kukabwa na ngonde, hata ndediwadie muzi;

¹² nesi dabonya kazi, dikitumia mikonu edu cheni. Dikasholelwa diarasimia, dikatirirwa, diarumaghia;

¹³ dikazighirilwa diavoya; hata idana deeka sa wuchafu wurumwengunyi, nesi dakaia sa makakala gha vilambo vose.

¹⁴ Namuandikia agha, si angu neekunda kumfusha waya anduangi, ela naawuyamfunda sa wana wapo nimkunde.

¹⁵ Angu hata ngera moko na waleli wengi andenyi ya Kristo, ela ndemmbwadie weke ndeyo wengi anduangi. Angu ini nawurie ndeyo andenyi ya Kristo Jesu kwa chia ya Ilagho Jiboie.

¹⁶ Niko namvoya mnughe mfwano ghwapo.

¹⁷ Kwa wundu ughu, namduma konyu Timotheo mwana wapo mkundwa, na mloli andenyi ya Bwana; nao uchamkumbusa chia rapo andenyi ya Kristo, seji nifundishagha andu kose, andenyi ya kula ikanisa.

¹⁸ Wandu wamu waawuyaka na lubando wikiwona wei ngera sichaacha konyu.

¹⁹ Ela nichacha konyu kafwani Bwana ukakunda, nani nichamanya ndighi ra awo wandu wiko na lubando, hata si agho wawuyaghideda anduangi.

²⁰ Angu wuzuri ghwa Mlungu ndeghuko kwa chia ya madedo, ela ni kwa ndighi.

²¹ Wele mwakunde wada? Nimchee na changu angu kwa lukundo na roho ya wumboa?