1 WAKORINTHO 2 - Biblia Ilagho Jiboie Kwa Wandu Wose

Malagho gha Kristo kusulubishwa

¹ Iji nerechieghe konyu wanidu, ngimchilia ngasu ya Mlungu, seretumieghe malagho gha ndighi angu gha hikima anduangi.

² Angu serekundieghe kumanya ilagho jingi konyu, ela Jesu Kristo usulubishiro.

³ Nani nerekanyeghe nenyo kwa wunyonge, ngiobua nandighi na kusughusika.

⁴ Madedo ghapo na kuchila kwapo ndekorekoghe kwa hikima eshingira wandu anduangi; ela korekoghe kowonyera kwa Roho, na kwa kudima.

⁵ Eri irumirio jenyu jisakeaghwa aighu ya hikima ya kidamu, ela aighu ya ndighi ra Mlungu.

Hikima ya Mlungu

⁶ Elaima daghoragha na hikima kwa awa wizoghue kiroho, si hikima ya ngelo iri, angu ya wabonyi nguma wa ngelo iri wiidagha anduangi.

⁷ Ela damfunukuya ngasu na hikima ya Mlungu ivisiro, iyo Mlungu oreilaghirieghe kwa wundu ghwa wubaa ghodu imbiri ya wurumwengu kuumbwa.

⁸ Ni hikima isetambulo ni m'bonyi nguma ungi wa ngelo ihi, ngera edewitambukia, kumangu ndeweremsulubishagha Uo Bwana wa wubaa anduangi.

⁹ Ela sa iji koni iandikilo, “Maza mndungi usereriwonieghe na kurisikira hata kurighesha jingi, niro reni Mlungu uwiboisire awo wimkundagha.”

¹⁰ Ela Mlungu oredifunukueghe isi kwa chia ya Roho; angu Roho wazighana maza rose ra Mlungu hata iro riko ndenyi na ndighi.

¹¹ Angu nani udimagha kumanya maza ra mundu useeka ni uja roho moni uko andenyi kwake? Huwo koni na mndungi ndedimagha kuritambua maza ra Mlungu, iseeka ni Roho wa Mlungu moni.

¹² Nesi ndediwusire roho wa wurumwengu, ela deewusa Roho ufumie kwa Mlungu; eri ditambukilo ni agho manosi dinekelo ni Mlungu.

¹³ Kwa huwu daghora agha, si kwa malagho ghifundishwagha kwa hikima ya kidamu anduangi, ela agho ghifundishwagha ni Roho; dikiwonyera loli ya kiroho kwa awo wiko na uo Roho.

¹⁴ Mundu wa tabia ya asili, ndedimagha kughiwusa manosi gha Roho wa Mlungu, angu kwake ni wukelu; nao ndedimagha kughitambua anduangi, angu ghiatambulwa kwa chia ya Roho.

¹⁵ Mundu wa kiroho wadatanya maza rose, ela uo moni ndetanywagha ni mndungi.

¹⁶ “Angu nani uichi maghesho gha Bwana udimagha umfundishe?” Ela isi deko na maghesho gha Kristo.