1 WAKORINTHO 16 - Biblia Ilagho Jiboie Kwa Wandu Wose

Mchango ghowitesia waeli

¹ Idana malagho gha mchango kwa wundu ghowitesia waeli, bonyenyi sa iji koni nereghilaghirieghe makanisa gha Galatia.

² Kula Ituku ja Njumwa, kula umu onyu ukuwikie kilambo chimu na kuchitumbanya seji koni wapata; eri msechewuyachanga ingelo nacha.

³ Na iji nacha, nichawiduma na barua awo mchaawisaghua wighenje mafunyo ghenyu Jerusalemu.

⁴ Ikawoneka nicha nani moni wori nighende, wichaghendanya andwamweri nani.

Mipango ya Paulo

⁵ Nichacha konyu ngameria kuida Makedonia; angu nakunde niidirie Makedonia.

⁶ Ngera nichakanya nenyo kwa ngelo imu, kewada hata kwari isie; eri mpate kunitesia andu kose nichaakunda kughenda kwa charo chapo.

⁷ Angu sikunde nimmbone idana ngiida; kwa kukaia nasuwiria kukanya nenyo luma koni, Bwana ukakunda.

⁸ Ela nichakaia Efeso hata ngelo ya Pentekosto;

⁹ angu narughuilwa mnyango m'baa nipate kubonya kazi nicha, na wamaiza nawo ni wengi.

¹⁰ Timotheo ukacha, mumkaribishe nicha; angu waawuyabonya kazi ya Bwana sa ini moni.

¹¹ Mndungi usemmenye, ela mumtesie ughende imbiri na charo chake kwa sere, upate kuniwuria; angu ini na wanidu, daawuyamsuwiria.

¹² Seji iko aighu ya malagho gha mwanidu Apolo, neremvoyeghe nandighi uchanye na waja wanidu wamu konyu, ela nderewonieghe nicha uche idana. Uchacha iji wapata wulalo.

Malagho gha kutua

¹³ Chereshenyi, mangenyi kwa irumirio jenyu; mkaie na ngolo na kufunga ndighi.

¹⁴ Bonyenyi maza rose kwa lukundo.

¹⁵ Idana wanidu, mwamanya angu wandu wa nyumba ya Stefano niwo werezoeghe kughaluka uko Akaya, nawo wafunga ndighi kuwidumikia waeli;

¹⁶ namvoya mkuwike aisi ya wandu sa awo, na kula mngara wawuyabonya kazi andwamweri nawo.

¹⁷ Neko na kuboilwa kubaa kwa wundu ghwa kucha kwa weke Stefano, Fotunato, na Akaiko, kwa kukaia wakaia wulalo ghonyu;

¹⁸ angu werenihoreshereghe ngolo seji werebonyereghe konyu. Muwitale wandu sa awa.

¹⁹ Mwarogholo ni makanisa gha Asia. Akula na Priska, chiaimweri na ikanisa ja nyumbenyi kwawo, wamroghua nandighi kwa ngolo andenyi ya Bwana.

²⁰ Wanidu wose wamroghua. Roghuanenyi mmbeni na mmbeni kwa msusugho ghwa wueli.

²¹ Ini Paulo, naandika voro iri kwa mkonu ghwapo.

²² Mndungi ukakaia usemkunde Bwana, ndewado ni njowe. Marana tha Choo Bwana odu.

²³ Mvono ghwa Bwana Jesu ndeghukaie andwamweri nenyo.

²⁴ Lukundo lwapo ndelukaie andwamweri nenyo mmbose kwa Kristo Jesu. Amen.