1 WAKORINTHO 13 - Biblia Ilagho Jiboie Kwa Wandu Wose

Lukundo

¹ Ngera nadeda na viteto va wadamu na va weke malaika, nani siwadie lukundo, niakaia sa lwaka lwa ibamba iduu, angu kengele chikabwagha.

² Na ngera nakaia nandighi ra wulodi, na kutambua ngasu rose, na kumanya kose; na ngera nakaia na irumirio jikatagha kuinja mighondi, nani siwadie lukundo, se kilambo chingi.

³ Ngera nafunya vose niko navo, na kuneka wakiwa, hata kufunya mumbi ghwapo ghukoro, nani siwadie lukundo, sipatagha fwaida ingi anduangi.

⁴ Lukundo lwadarumaghia, na kubonya nicha; lukundo ndeluwadie iriso hata ndelukukasagha;

⁵ ndelung'etere, hata ndelubandishagha chongo. Lukundo ndelulolagha chake cheni, hata ndeluwadie machu; ndelutalagha kiwiwi,

⁶ hata ndeluboilwagha ni kiwiwi; ela lwadaboilwa ni mecha.

⁷ Lukundo lwadarumaghia luma, lwadarumiria ghose, lwadasuwiria ghose, lwadarumaghia ghose.

⁸ Lukundo ndelusiagha; ela ngera ni wulodi ghuchaida, ngera ni viteto vichatua, na kumanya kuchaida.

⁹ Angu kumanya kodu ndekukate, na wulodi ghodu ndeghukate;

¹⁰ ela kasikira icho chikatie chacha, icho chisekate chichaida.

¹¹ Iji nerekoghe mwana, needuadeda sa mwana, ngadatambukilwa na kughesha sa mwana; ela niendawuya mundu m'baa, neesighana na maza ra wanake.

¹² Angu idana daawuyawona a kilolenyi miramira; ela ngelo iyo, dichawona wushu kwa wushu. Ngelo ihi, naawuyamanya kutinieri; ela ngelo iyo, nichatambukilwa putu sa iji koni ini nimanyiro ni Mlungu.

¹³ Kwa wundu ugho, iro riduagha ni iri idadu: Irumirio, isuwirio, na lukundo; ela m'baa wa rose, ni lukundo.