1 WAKORINTHO 12 - Biblia Ilagho Jiboie Kwa Wandu Wose

Manosi gha Roho Mweli

¹ Idana wanidu dighizighane malagho aighu ya manosi gha Roho Mweli; angu sikunde mkaie msemanyagha wuloli ghwa malagho agho anduangi.

² Inyo mwamanya angu iji morekoghe mserumirie, morelaghashiroghe mkighenjwa chia nyingi kwa kutasa milimu isededagha.

³ Kwa huwo nakunde mtambukilo angu ndekuwadie mndungi jingi udimagha kudeda na Roho wa Mlungu, nao ughambe wei “Jesu ndewasiro njowe;” na mndungi nao ndedimagha kughamba “Jesu ni Bwana” useeka ni kwa Roho wa Mlungu.

⁴ Gheko manosi mazima-mazima, ela Roho ni uja moni;

⁵ na sena ghoko wudumiki mzima-mzima, ela Bwana ni uja moni.

⁶ Sena koko kubonya kazi kuzima-kuzima, ela ni uja Mlungu moni wawuyadimisha kula mundu upate kuribonya.

⁷ Kula mundu wanekelo wufunuo ghwa Roho kwa wundu ghwa fwaida ya wandu wose.

⁸ Mndumu oonekwa madedo gha hikima, mzima ukaanekwa madedo gha kumanya kwa uja Roho moni;

⁹ mzima ukaanekwa irumirio kwa uja Roho moni, na mzima ukaanekwa manosi gheboisa wakongo, kwa uja Roho moni;

¹⁰ mzima ukaanekwa inosi jebonya weke mwakilimbiti, mzima ukaanekwa kuchila, mzima ukaanekwa inosi jetambua manosi gha Roho, mzima ukaanekwa kudeda na viteto vizima-vizima, na mzima ukaanekwa kughalusa viteto.

¹¹ Ela ni uja Roho moni umweri ubonyagha agha ghose; ukimmbaghia kula mundu inosi wuzima wuzima seji uo Roho ukundagha moni.

Mumbi ghumweri ghuko na via vilazi

¹² Angu sa iji mumbi ni ghumweri, nagho ghwawadie via vilazi, na via vose va mumbi hata ngera ni vingi, ela ni mumbi ghumweri, na Kristo ni huwo koni.

¹³ Kwa kukaia, isi diwose derebaputiziroghe dikaie wa mumbi ghumweri kwa uo Roho umweri; ikaiagha ni Wayahudi, angu Wagriki; ngera ni wazumba, angu wakitina; isi diwose derenyosheroghe uo Roho umweri.

¹⁴ Angu mumbi ndeghuko na kia chimweri anduangi, ela ni via vingi.

¹⁵ Ngera kughu kwaghamba, “Angu niseko mkonu, ini siko wa mumbi anduangi;” ijo ndejidimagha kukughalusa kusekaie kwa mumbi kungi.

¹⁶ Wokoni ngera kudu kwaghamba “Angu niseko iriso, ini siko wa mumbi anduangi;” ijo ndejidimagha kukughalusa kusekaie kwa mumbi kungi.

¹⁷ Ngera mumbi ghose ghodeeka iriso, kusikira kokaiagha hao? Angu ngera mumbi ghose ghodeeka kudu, kunukilwa kokaiagha hao?

¹⁸ Ela seji iko, Mlungu orevibonyereghe via mumbinyi kula chimu seji orekundieghe moni vikaie.

¹⁹ Ngera vose vedeeka kia chimweri, mumbi ghokaiagha hao?

²⁰ Ela seji iko, veko via vilazi, ela mumbi ni ghumweri.

²¹ Iriso ndejidimagha kughuzera mkonu, “Sine haja na oho.” Hata sena chongo ndechidimagha kughizera maghu, “Sine haja nenyo.”

²² Wulalo ghwaro, vija via va mumbi viwoneka kukaia va wunyonge, nivo vikundikie kuchumba;

²³ na vija via va mumbi diviririkanyagha kukaia ndevine ishima ibaa, nivo divitalagha kukaia na ishima kuchumba; na ivo via viwonekagha kukaia viseghokie, ivo davitala kuchumba;

²⁴ uko kutala, ivo via vighokie viseko na haja nako. Ela Mlungu ooghubonya mumbi kwa chia iyo, eri upate kuvineka ishima ibaa ivo via viwonekagha kukaia ndevine ishima;

²⁵ eri kusekaie kutana kungi mmbinyi; ela via vitalaneghe karakara kula chimu na mmbao.

²⁶ Ngera kia chimu chawawa, via vose viwawo chia imweri; ngera kia chimu chakumwa, via vose viboilo chia imweri.

²⁷ Inyo idana moko mumbi ghwa Kristo, na kula umu onyu ni kia cha ugho mumbi.

²⁸ Na Mlungu wawikie andenyi ya ikanisa: imbiri wadumi, kawi walodi, kadadu walimu; sena wabonyi weke mwakilimbiti, waboisi wakongo, watesia, wazighaniri, na waghori wa viteto vizima-vizima.

²⁹ Welee, wose ni wadumi? Wose ni walodi? Wose wawuyabonya weke mwakilimbiti?

³⁰ Wose weko na manosi gheboisa wakongo? Wose wawuyadeda na viteto vizima-vizima? Wose wawuyaghalusa viteto?

³¹ Elaima, kundenyi agho manosi ghiko mabaa. Na sena, nichammbonyera chia iboie kuchumba.