1 WAKORINTHO 11 - Biblia Ilagho Jiboie Kwa Wandu Wose

¹ Nisungenyi ini, sa iji koni nawuyamsunga Kristo.

Kufinikira chongo ngelo ya wutasi

² Namkuma, angu mwawuyanikumbuka kwa maza rose na kumaziriana na agho malaghiro neremnekieghe.

³ Ela nakundeghe mtambukilo angu Kristo ni chongo cha kula mndwawomi, na mdwawomi ni chongo cha muka, na Mlungu ni chongo cha Kristo.

⁴ Mndwawomi ungi ukachifinikira chongo chake ukilomba angu ukichila, uamfusha waya Kristo uo uko chongo chake.

⁵ Ela muka ungi ukalomba angu kuchila usechifinikire chongo chake, uamfusha waya mumi wake uo uko chongo chake; angu ni karakara na kuchiara.

⁶ Iji muka usekufinikaragha chongo chake, ni nicha ukunuo iridia. Ela ikakaia niwaya kwa muka kuara angu kukunua iridia jake, ni nicha uchifinikire chongo chake.

⁷ Ndeimfwane mndwawomi ufinikire chongo chake, angu uo ni fwana, na wubaa ghwa Mlungu; ela muka ni wubaa ghwa mndwawomi.

⁸ (Angu mndwawomi nderebonyeroghe kufuma kwa muka anduangi, ela muka nuo orefumieghe kwa mndwawomi.

⁹ Hata mndwawomi ndereumbiloghe kwa wundu ghwa muka anduangi, ela muka nuo oreumbiloghe kwa wundu ghwa mndwawomi.)

¹⁰ Kwa wundu ughu, yamfwana muka ufinikire chongo chake sa alama ya nguma kwa wundu ghwa weke malaika.

¹¹ (Elaima andenyi ya Bwana, muka ndekudimagha moni kuseko mndwawomi, na mndwawomi ndekudimagha moni kuseko muka anduangi;

¹² angu sa iji koni muka orebonyeroghe kufumanya na mndwawomi, ni huwo koni na mndwawomi wadavalwa ni muka. Na vilambo vose vadafuma kwa Mlungu.)

¹³ Tanyenyi mmbeni, loli ni nicha muka kulomba Mlungu na chongo chake chisefinikiro?

¹⁴ Kuja kuumba koni ndekummbonyeragha wori mndwawomi ndefwano ni iridia ilacha?

¹⁵ Ela muka ukakaia na iridia ilacha ni wubaa ghwake. Wanekelo iridia ijo ukufinikire najo.

¹⁶ Ela mndungi ukakunda kubonya nganyi, isi, hata makanisa gha Mlungu, ndediwadie mzango ghungi mzima anduangi.

Ndima ya Bwana

¹⁷ Ela kwa agho mafundisho ghinughagha, simkumagha kungi; angu kukwana konyu ndekukaiagha kwa wucha, ela kwa wuwiwi.

¹⁸ Ilagho ja imbiri, nasikire wei iji mwakwana sa ikanisa, gheko mawaghanyiko aghadi konyu; nani nakunderumiria wori ni loli.

¹⁹ Angu ni suti kukaie na kuleghawadana maghesho aghadi konyu, eri awo wiko waloli aghadi yenyu wipate kumanyika.

²⁰ Iji mwakwana chia imweri, ndemjagha Ndima ya Bwana kungi.

²¹ Angu mkakaja, kula mundu wadaja vindo vake moni; na mndumu ooka njala, na umu waawongia.

²² Ahuwo ndemmbwadie nyumba rejia na kunywa? Angu mwaawuyajimenya ikanisa ja Mlungu, na kuwifusha waya awo wisewadie kindo chingi? Da nimzera wada? Nimkase kwa wundu ghwa agho? Hata! Sidimagha.

²³ Angu agho mafundisho nereghiwusireghe kufuma kwa Bwana, nigho gheni neremnekieghe; kukaia, chija kio Bwana Jesu orefunyiroghe, orewadieghe mkate;

²⁴ hata iji wameria kufunya chawucha, ukaghuchikanya, ukaghamba, “Ughu nigho mumbi ghwapo, nagho ni kwa wundu ghonyu. Bonyenyi huwu kwa kunikumbuka.”

²⁵ Huwo koni, nyuma ya vindo, ukachiwada kikombe ukighamba, “Kikombe ichi ni ilaghano iwishi jibonyero kwa bagha yapo. Bonyenyi huwu kula indo mnywagha kwa kunikumbuka.”

²⁶ Angu kula ngelo mjagha mkate ughu, na kunywa kikombe ichi, mwaeresha malagho gha kifwa cha Bwana hata uche.

²⁷ Kwa huwu, mndungi ukaja mkate, angu kunywa kikombe cha Bwana kisha, uchakaia na ikosa jeghunonia ishima mumbi ghwa Bwana na bagha yake.

²⁸ Mundu ndekuzighane moni kande, ima uje ugho mkate na kunywa kwa kikombe icho.

²⁹ Angu uo ose ujagha na kunywa usetalagha nicha ghuja mumbi ghwa Bwana, wadaja na kunywa kutanywa kwake moni.

³⁰ Ihi niyo shekeria ya wandu wengi wenyu kukaia wanyonge na wakongo; na wamu wafue.

³¹ Na wei dadakuzighana diweni loli, kumangu ndeditanywagha anduangi.

³² Ela iji datanywa ni Bwana, dakabwa; eri disechetanywa andwamweri na wurumwengu.

³³ Kwa huwo wanidu, iji mwakwana andwamweri kwa wundu ghwa kuja Ndima ya Bwana, mmbeseriane.

³⁴ Ngera mundu oko na njala, ndeje nyumbenyi kwake; isechekaia kukwana konyu kumredie kutanywa. Aighu ya agho malagho mazima, nichaghiboisa ingelo nacha.