1 TIMOTHEO 6 - Biblia Ilagho Jiboie Kwa Wandu Wose

¹ Wandu wose wiko aisi ya ghongolo ya wuzumba, ndewiwitale weke bwana wawo kukaia wifwane kunekwa ishima jose, eri irina ja Mlungu na agho mafundisho ghisepate kudedelwa kiwiwi.

² Awo wazumba wiko na weke bwana wirumiriagha, wisakewisowia ishima angu wei wiko wanidu. Wulalo ghwaro suti widumike nicha kuchumba, kwa kukaia awa wipatagha fwaida kwa wudumiki ghwawo ni warumirii na wakundwa. Kurifundishe na kushashira maza iri.

Mafundisho gha tee, na mali ra loli

³ Ngera mndungi wafundisha wuzima, nao nderumiriagha malagho gha loli gha Bwana odu Jesu Kristo, na mafundisho ghiko na kuobua kwa Mlungu,

⁴ ookujosa na kukukasa; nao ndeichi kindo chingi, wakaia mkongo wa bea nyingi, ukibonya nganyi na marashano kwa madedo ghiredagha iriso, mawaghanyiko, kuzighiria, na maririkanyo ghizamie;

⁵ nao warashana na wandu wisene akili, wilagharilo ni iyo loli, wigheshagha wei kuobua kwa Mlungu ni chia reshama.

⁶ Kuobua kwa Mlungu na kukatwa kwawadie ishamo ibaa;

⁷ angu ndederechieghe na kindo chingi wurumwengunyi, hata dikakafuma wurumwengunyi, ndedidimagha kudwa kindo chingi anduangi.

⁸ Ela dikakaia na vindo na nguwo, dikato.

⁹ Na wandu wikunde kukaia na mali, waghwa na kungia matimonyi; wangia mdeghonyi, na andenyi ya bea nyingi ra ndengwa risewadie akili, iro riwinonagha, na kuwitotesha wandu.

¹⁰ Angu kuzoya kwa mawiwi ghose ni kuja kukunda mali; na kwa chia ya bea nyingi wandu wamu walaghaya na kujisigha ijo irumirio, nawo wavavira ngolo rawo kwa luwawo lubaa.

Mawonyero kwa Timotheo moni

¹¹ Ela oho mundu wa Mlungu, kuriinjikie na mbai maza iro, kuinughe hachi, kuobua kwa Mlungu, irumirio, lukundo, irumaghio na wumboa.

¹² Lwaa ghuja wuda ghuboie ghwa irumirio, kujiwadie jija irangi ja kala na kala, ijo korejiwangiloghe iji korerumirieghe nicha imbiri ya washahidi wengi.

¹³ Nakulaghira imbiri ya Mlungu uo uviwikagha moyo vilambo vose, na imbiri ya Kristo Jesu uo orefunyireghe wushuhuda ghwa irumirio jake imbiri ya Pontio Pilato;

¹⁴ kughiwadie agho malaghiro kuseko na kughiranganya na kuseko na ikosa jingi, hata Ituku ja kuwoneka kwake Bwana odu Jesu Kristo.

¹⁵ Na uko kuwoneka kwake, kuchawonyerwa worinyi kwa ngelo yaro ni uo ukaswaghwa uko M'baa uekeri, Mzuri wa wazuri na Bwana wa weke bwana.

¹⁶ Uo uekeri nuo uko na irangi jisenonekagha, nao wadakaia andenyi ya mwengere ghusedimagha kusoghoderwa, uo mndungi usemmbonie jingi, hata usedimagha kummbona; kwake uo ndejikaie ishima na kubonya nguma kwa kala na kala. Amen.

¹⁷ Kuwilaghire awo wandu wiko na mali andenyi ya wurumwengu ughu wisakekukasa, hata wisakewika isuwirio jawo kwa mali riidagha, ela wijiwike kwa Mlungu, uo udinekagha vindo vose kwa wungi dipate kuboilwanya navo.

¹⁸ Nawo wibonye nicha, wikaie na mali kwa wundu ghwa kubonya nicha, wifunyagha vindo vawo wikiwiwaghia wazima kwa ngolo ndicha.

¹⁹ Kwa chia ihi wichakubonyera weni msingi ghuboie ghwa ngelo richagha, eri wikupatire irangi ijo jiko irangi loli.

²⁰ Ee Timotheo, lindia icho cherewikiloghe mikonunyi kwako. Kughiinjikie na mbai madedo ghisewadie kuobua kwa Mlungu, na nganyi ra wukelu iro riwangwagha kumanya, ela ni tee;

²¹ angu kwa kurirumiria, wandu wamu waghosha na kulaghalwa ni irumirio. Mvono ndeghukaie nenyo.