1 TIMOTHEO 5 - Biblia Ilagho Jiboie Kwa Wandu Wose

Seji ifwane kuwibonyera warumirii

¹ Kusakemkemia mghosi ungi; ela kumvoye sa ndeyo, na wadawana sa wanyinyu wa womi;

² wakeku sa weke mayo, na wai sa wanyinyu wa waka kwa wueli ghose.

³ Wibonyere ishima waka wakiwa, awo wiko waka wakiwa loli.

⁴ Ngera muka mkiwa oko na wana, angu weke wawae, ndewikufundishe kande kubonya ugho wudumiki ghwa Kimlungu kwa wandu wa nyumbenyi kwawo weni; wipate kuwitesia wavi wawo, angu ilagho ijo jarumirikie imbiri ya Mlungu.

⁵ Uo uko muka mkiwa loli, nao oosighwa uekeri, oowika isuwirio jake kwa Mlungu; nao wadadua ukivoya na kulomba Mlungu kio na dime.

⁶ Ela uo unughagha bea rake reni, wafue hata ngera oko moyo.

⁷ Kuwilaghire agha malagho, wipate kukaia wisewadie ikosa jingi.

⁸ Ngera mndungi wakaia usetalagha wandu wa kichuku chake, na kuchumba awo wa nyumbenyi kwake, wajikana ijo irumirio, nao wakaia mmbiwi kuchumba mundu userumirie.

⁹ Muka ungi useandiko kukaia muka mkiwa, usevikie miaka mirongo irandadu; sena ukaie odeeka muka wa mndwawomi umweri.

¹⁰ Ukaie ushuhudilo kwa mabonyo ghake mecha ghelela wana, kukaribisha waghenyi, kuoghosha waeli maghu, kuwitesia awo wiko na wasi, na kukufunya moni kubonya nicha kwa kula chia.

¹¹ Ela waka wifuilo ni womi wawo wiko watini, kusewiandike; angu wikavikia kulemwa ni bea rawo, kuchumba kumkunda Kristo, wakunda kulowolwa;

¹² nawo wichatanywa kwa kujinona ilaghiro jawo ja imbiri.

¹³ Chiaimweri na agho, wakufundisha kukaia waghadi wikilunguwa nyumba kwa nyumba; hata si uko kughada kuekeri anduangi, ela wadeda wandu na kukungira andenyi ya maza ra wandu wazima; wikija malagho ghisefwane.

¹⁴ Kwa wundu ugho, niawona waka wifuilo ni womi wawo wiko watini, wilowolo, wive wana, wiribonyere nguma nyumba rawo; wisechemneka mmaiza wulalo ghodisholia.

¹⁵ Angu waka wamu wamerie kulaghaya, wikamnugha Shetani.

¹⁶ Ngera oko muka ungi mrumirii, uko na waka wifuilo ni womi wa kichuku chake, ndewitesie; ikanisa jisechelemerwa, eri jidime kuwitesia awo wiko waka wakiwa loli.

¹⁷ Awo waghosi wiko na wulongozi ghuboie, wafwana wineko malipo mando awi; na kuchumba awo wawuyadumika kwa kazi ya kuchila na kufundisha.

¹⁸ Angu Maandiko Ghielie ghaghamba, “Kusakefunga ng'ombe momu ikakakuwida viro na M'bonyi kazi wafwane uneko mafungu ghake.”

¹⁹ Jingi kuserumirie mashitakio aighu ya mghosi ungi, ghisaakaia na wushuhuda ghwa wandu wawi angu wadadu.

²⁰ Awo wibonyagha kaung'a kuwikemie imbiri ya wandu wose, eri wazima wiobuo.

²¹ Nakulaghira imbiri ya Mlungu, na imbiri ya Kristo Jesu, na weke malaika wisaghulo, kughiwadie malaghiro agha ghose, hata kusebonye ilagho jingi kwa kutala wandu.

²² Kusakekaia wa shwa-shwa kuwikiria mndungi mikonu kwa wundu ghwa wudumiki ghwa Bwana, hata kusekaie ngara na kaung'a ra mndungi; ela kukaie kuelie.

²³ Kufuma idana kusenyoghe machi gheni ghiekeri, ela kutumieghe divei ndini kwa wundu ghwa kifu chako, na kwa wundu ghwa agho makongo ghilalaakuwada shwa kwa shwa.

²⁴ Kaung'a ra wandu wamu rawoneka worinyi, naro rakiria kughenda kutanyonyi; ela kaung'a ra wandu wamu radachawoneka nanyuma.

²⁵ Huwo koni mabonyo mecha gheko worinyi; na hata agho ghiseko worinyi, ndeghidimagha kudua ghivisikie anduangi.