1 TIMOTHEO 2 - Biblia Ilagho Jiboie Kwa Wandu Wose

Kutasa kwa Ikanisa

¹ Ilagho ja imbiri, nakunde kulalama, malombi, kuvoya, na kufunya chawucha kwa Mlungu, kubonyo kwa wundu ghwa wandu wose;

² kwa wundu ghwa wazuri, na wandu wose wa veo va ighu; eri dipate kukaia na irangi jihorie, na ja sere, jiko na kuobua kwa Mlungu, jiko ja ishima kwa chia rose.

³ Ilagho iji jaboie, najo jarumirilo ni Mlungu Mkiri odu;

⁴ uo ukunde wandu wose wikie, na kuvikia kuimanya iyo loli.

⁵ Angu Mlungu ni umweri, na mpatanishi aghadi ya Mlungu na wandu ni umweri, uo mundu, Kristo Jesu;

⁶ uo orekufunyireghe moni ukaie wukomboli kwa wundu ghwa wandu wose, nagho ni wushuhuda ghufunyiro kwa ngelo yaro.

⁷ Kwa wundu ghwa ijo, ini nerewikiloghe nikaie mchili na mdumi, (Naghora loli sighoragha tee anduangi), mwalimu wa iro mbari zima, kwa irumirio na loli.

⁸ Niko nikunde angu womi wose wilombe kula andu, wikiwusira mikonu ielie, kuseko na machu angu kurashana kungi.

⁹ Wokoni na waka wiro marwao gha ishima. Si kwa kuluka maridia, angu kukupamba kwa dhahabu na lulu, na nguwo ra zoghori mbaa;

¹⁰ ela wikupambe kwa mabonyo mecha, seji iwifwane waka wimuobuagha Mlungu.

¹¹ Muka ndekufundishe ukikaia kima kwa kukusera kose.

¹² Simnekagha muka ungi rusa efundisha, hata kukaia na nguma aighu ya mndwawomi; ela yamfana ukaie kima.

¹³ Angu Adamu nuo orezoeghe kuumbwa, ima Hawa ukachaumbwa;

¹⁴ sena Adamu nderekaliloghe, ela muka orekaliloghe ukawuya mkosi.

¹⁵ Elaima, muka uchakia kwa chia ya kuva wana, ukadua andenyi ya irumirio, na lukundo, na wueli andwamweri na kukaia na ishima.