1 TIMOTHEO 1 - Biblia Ilagho Jiboie Kwa Wandu Wose

¹ Ini Paulo, mdumi wa Jesu Kristo uwikilo kwa amri ya Mlungu Mkiri odu, na ya Kristo Jesu isuwirio jedu.

² Nakuandikia oho Timotheo, mwanwapo tiki kwa irumirio. Mvono ndeghukaie kwako, na wughoma, na sere ifumagha kwa Mlungu Aba, na kwa Kristo Jesu Bwana odu.

Mawonyero aighu ya mafundisho gha tee

³ Seji nerekulaghirieghe ngighenda Makedonia, kaia ahoeni Efeso; eri kupate kuwilaghira wandu wamu wisefundishe mafundisho ghangi mazima.

⁴ Kuwilaghire wisakekungira andenyi ya maza ra chughano, na maandiko gha vichuku ghisewadie kutua; ghiredagha nganyi wulalo ghwa mafundisho gha kimlungu ghiko gha irumirio.

⁵ Na malaghiro ghedu isi ni kukunda wikaie na lukundo ulo lufumagha kwa ngolo ielie, na nia iboie, na irumirio ja loli.

⁶ Wandu wamu kwa kurisigha na mbai maza iri, walaghaya na kungia andenyi ya madedo gha duu;

⁷ wikikunda wikaie walimu wa Sharia wisetambukilwagha ni malagho ghawo gheni, hata na agho wawuyaghizitiria.

⁸ Idana isi damanya angu Sharia yaboie iji mndungi waitumia nicha,

⁹ ukimanya kukaia Sharia ndeerewikiloghe kwa wundu ghwa awo wibonyagha hachi, ela edewikwa kwa wundu ghwa waleghi sharia, na wandu wisesikiragha; kwa wandu wisemuobuagha Mlungu, na wakaung'a; kwa wandu wiseelie, na awo wisemwichi Mlungu; kwa wandu wibwaghagha weke ndee, na weke mae; kwa wabwaghi wandu,

¹⁰ na walaki; womi wilakagha na womi, waiwi wandu, watee, na waghemi wa tee, chiaimweri na maza zima rose risewadanagha na mafundisho gha loli;

¹¹ karakara na ijo Ilagho Jiboie ja wubaa, ja Mlungu ukaswaghwa; ijo nerenekeloghe nijidumikie.

Chawucha kwa wundu ghwa wughoma ghwa Mlungu

¹² Namfunyira chawucha Kristo Jesu Bwana odu, uo unidimishire kubonya iyo kazi, na kunitala kukaia mloli andenyi ya wudumiki ghwake;

¹³ hata ngera aho imbiri neremsholieghe, ngamkoronga na kumdukana, ela nerefuloghe wughoma, kwa kukaia nerekoghe ngibonya agho nisemanyagha, na kwa kusowa irumirio;

¹⁴ na Bwana oredirieghe mvono ghwake aighu yapo kwa wungi, chiaimweri na irumirio, na lukundo luko andenyi ya Kristo Jesu.

¹⁵ Ilagho iji ni ja loli, najo jafwana kurumirilwa putu, kukaia Jesu orechieghe wurumwengunyi kukira wakaung'a; na wa imbiri wa awo wakaung'a ni ini moni;

¹⁶ ela nerefuloghe wughoma kwa wundu ughu; kukaia andenyi kwapo ini niko wa imbiri, Jesu Kristo upate kuwonyera kurumaghia kwake kukatie, nipate kukaia fwana kwa awo wichaarumiria kwake, wipate irangi ja kala na kala.

¹⁷ Idana kwa uo Mzuri wa ngelo rose, useidagha, usewonekagha, Mlungu uekeri, ndejikaie ishima na wubaa kwa kala na kala. Amen.

¹⁸ Timotheo mwanwapo, nakuneka malaghiro agha karakara na ugho wulodi ghorededeloghe aighu yako; eri ghukikunyavurisha, kupate kulwa ugho wuda ghuboie,

¹⁹ kukijimazira ijo irumirio na nia iboie. Wandu wamu waleghie kuisikira iyo nia, wikadima wakunonia irumirio jawo;

²⁰ wamu wawo ni Humenayo, na Alekizanda; wandu nimnekie Shetani, wipate kukufundisha angu ndeifwane kumsholia Mlungu.