1 SAMUELI 7 - Biblia Ilagho Jiboie Kwa Wandu Wose

¹ Niko wandu wa Kiriath-jearimu wikaghenda na kuionda Sanduku ya Ilaghano ya BWANA, wikaiwika nyumbenyi kwa Abinadabu ukaiagha mghondinyi, wikammbika mwana wake Eleazari ukaie mlindiri wa iyo Sanduku ya BWANA.

Samueli kuwibonyera nguma Waisraeli

² Kufuma ngelo iyo, Sanduku ya Ilaghano ya BWANA ikakaia Kiriath-jearimu kwa miaka mirongo iwi. Waisraeli wose wikakaia wikimlilia BWANA.

³ Niko Samueli ukawizera wandu wa Israeli wose, “Mkamghalukia BWANA kwa ngolo renyu rose, nao muinje milungu ya kighenyi, na ghuja mlungu ghwa waka Ashtorethi aghadi konyu, na kukuwika kwa BWANA putu, eri mpate kumtasa uo moni uekeri, uchamkira msekorongoghe ni Wafilisti.”

⁴ Niko Waisraeli wikainja Baali na Ashtorethi, wikamtasa BWANA uekeri.

⁵ Nao Samueli ukaghamba, “Kwanyenyi Waisraeli wose aho Mispa, nani nichawilombia kwa BWANA.”

⁶ Niko wikakwanyika aho Mispa, wikadaya machi na kughidia sa kizongona imbiri ya BWANA; wikafunga tumu ituku ilazi wikaghamba, “Dam'bonyere BWANA kaung'a.” Samueli ukakaia ukiwitanya wandu wa Israeli aja Mispa.

⁷ Wafilisti wiendasikira kukaia wandu wa Israeli wakwanyika aja Mispa, waja wabaa wawo wikawijokia Waisraeli wipate kulwa nawo. Hata iji Waisraeli wasikira, wikawiobua Wafilisti;

⁸ wikamzera Samueli, “Kusesighe kumlilia BWANA Mlungu odu kwa wundu ghodu, eri udikire disekabo ni Wafilisti.”

⁹ Niko Samueli ukammbwada mwana wa ng'ondi uongagha, ukamfunya ose kwa BWANA ukaie kizongona chekora; ukamlilia BWANA kwa wundu ghwa Israeli, na BWANA ukamtumbulia.

¹⁰ Hata iji Samueli orekoghe ukifunya icho kizongona chekora, Wafilisti wikajoka wipate kuwikaba Waisraeli; ela ituku ijo, BWANA ukawidokia awo Wafilisti na lwaka lubaa lwa lukuwa kufuma mlungunyi, na kuwikambira chongo; hata wikakimbia kwa wowa kufuma kwa Waisraeli.

¹¹ Wandu wa Israeli wikafuma na kuwinugha Wafilisti kufuma Mispa, wikawikaba hata kuvika Beth-kari naisi.

¹² Nao Samueli ukawada igho na kujidunga ghadi na ghadi ya Mispa na Jeshana, ukajiwanga irina jake Ebenezeri, angu oreghambieghe, “Aha niko BWANA uditeserie.”

¹³ Kwa huwo Wafilisti wikasimwa ni Waisraeli, hata ndewerewurieghe kungia andenyi ya mano ya Israeli sena. BWANA ukawineka Waisraeli wusimi aighu ya Wafilisti matuku ghose gha Samueli.

¹⁴ Mizi yose ya Waisraeli erewusiroghe ni Wafilisti ikawunjwa kwa Waisraeli, kufuma Ekroni hata Gathi; Waisraeli wikawunja isanga jawo kufuma kwa Wafilisti. Korekoghe na sere aghadi ya Waisraeli na Waamori.

¹⁵ Samueli ukakaia ukiwitanya Waisraeli matuku ghose gha irangi jake.

¹⁶ Kula mwaka ukakaia ukighimaria masanga gha Betheli, Gilgali, na Mispa; ukakaia ukiwitanya Waisraeli andenyi ya agha masanga ghose.

¹⁷ Konyuma orekoghe ukiwuya Rama, angu niko muzi ghwake ghokaia ghorekoghe; na aho wokoni ukakaia ukiwitanya Waisraeli, ukamuaghia BWANA madhabahu aho.