1 SAMUELI 6 - Biblia Ilagho Jiboie Kwa Wandu Wose

Kuwunjwa kwa Sanduku ya Ilaghano Israeli

¹ Sanduku ya BWANA erekaieghe isangenyi ja Wafilisti kwa meri mfungade.

² Wafilisti wikawiwanga wakohani na walaghui wikawizera, “Dibonya wada na ihi Sanduku ya BWANA? Diiwunjanya naki andu kwaro? Dighorienyi?” Wikaghamba,

³ “Mkakawunja ihi Sanduku ya Mlungu wa Israeli mseiwunje duu, ela kwa ivo vose mumghenjere na mafunyo gha kizongona kwa wundu ghwa kaung'a; niko mchaboa na kumanya sababu ra BWANA kumkaba huwo.”

⁴ Wikakotia, “Icho kizongona kwa wundu ghwa kaung'a dimuenjeragha ni chiao?” Wikatumbulia, “Fwana ra mbama isanu ra dhahabu, na fwana ra mbewa isanu ra dhahabu, kunughana na mtalo ghwa wabaa wa Wafilisti; kwa kukaia agho makabo ghedempata inyo chiaimweri na wabaa wenyu.

⁵ Kwa huwo ni suti m'bonye fwana ra mbama renyu na fwana ra mbewa renyu iro rawuyanona isanga, nao mumneke Mlungu wa Israeli wubaa, aho kewada wadima kuleka kumkaba inyo, na milungu yenyu, na isanga jenyu.

⁶ Kwaki mkurishagha ngolo renyu sa Wamisri na mzuri wawo? Welee ndewerewilekerieghe Waisraeli wikaghenda nyuma ya Mlungu kuwiseka anguwada?

⁷ Idana wukenyi m'boise igare iwishi, na ng'ombe iwi rawuyakamwa, jingi risengirilo ghongolo ingi, nao rifungwanye na ijo igare, ela ngache rawo murighalishe cha mzinyi, eri risekaianye na weke mae;

⁸ nao mmbwade iyo Sanduku ya BWANA na kuiwika igarenyi, na iro fwana ra dhahabu mumghenjeragha rikaie mafunyo gha kizongona kwa wundu ghwa kaung'a, murikumbirie andenyi ya isanduku na kujiwika luwarunyi lwa Sanduku ya BWANA; nao mzoye kujighenjesha igare na kujisigha jighende jiekeri.

⁹ Mkaie mkizighanira; jikakaghenjwa cha isanga ja mzawo Beth-shemeshi, dichamanya kukaia ni Mlungu wa Israeli wadibonya iri maza rizamie redinona; na ikakaia jaghenjwa chia zima, wokoni dichamanya kukaia suo ungi wadikaba, ela ni malagho tu ghadichea.”

¹⁰ Nao wikabonya sa iji koni werelaghiriloghe, wikawada ng'ombe iwi rawuyakamwa wikaringira ghongolo na kuifunganya na igare; wikarughia ngache rawo mzinyi.

¹¹ Wikajosa Sanduku ya BWANA igarenyi, na ijo isanduku jerekoghe na fwana ra mbewa ra dhahabu na fwana ra mbama rawo.

¹² Iro ng'ombe rikawada chia eghenda Beth-shemeshi, iyo chia mbaa, rikaghenda rikidoka; nderereghalukieghe mkonu ghwa kiwomi angu ghwa kiwaka, na wabaa wa Wafilisti wikarinugha hata mpakenyi ghwa Beth-shemeshi.

¹³ Wandu wa Beth-shemeshi werekoghe wikikuwida ngano yawo vololonyi; hata iji wawusira meso ghawo na kuwona iyo Sanduku wikaboilwa.

¹⁴ Ijo igare jikacha hata mbuwenyi kwa Joshua mundu wa Beth-shemeshi; na iro ng'ombe rikadunga maghu aho. Korekoghe na igho ibaa aho; niko wikabara mbande ra midi ya ijo igare, wikafunya iro ng'ombe rikaie kizongona chekora kwa BWANA.

¹⁵ Walawi wikaiwada Sanduku ya BWANA, chiaimweri na jija isanduku jerekoghe kaavui na iyo Sanduku, andu iro fwana ra dhahabu rerekumbiloghe; wikarifunya na kuriwika aighu ya ijo igho ibaa; na wandu wa Beth-shemeshi wikafunya kizongona chekora. Ituku ijo wikabwagha vizongona kwa BWANA.

¹⁶ Hata iji wabaa wasanu wa Wafilisti werewonieghe agho, wikawuya cha mzawo Ekroni.

¹⁷ Fwana ra dhahabu rerefunyiroghe ni Wafilisti kulipia wuwiwi ghwawo kwa BWANA niro iri: fwana imweri kwa wundu ghwa Ashdodi, na imu kwa wundu ghwa Gaza, na imu kwa wundu ghwa Ashkeloni, na imu kwa wundu ghwa Gathi, na imu kwa wundu ghwa Ekroni.

¹⁸ Na wokoni fwana ra mbewa ra dhahabu, kunughana na mizi yose ya wabaa wasanu wa Wafilisti; mizi mibaa iaghilo na ngome, na iyo mitini isene wurigha. Ijo igho ibaa werejiwikirieghe iyo Sanduku ya BWANA, jiko mbuwenyi kwa Joshua wa Beth-shemeshi, ni wushuhuda ghwa iro maza hata linu.

¹⁹ BWANA ukawibwagha wandu mirongo mfungade wa Beth-shemeshi, angu werezighanireghe andenyi ya iyo Sanduku ya BWANA. Wandu wikalila kwa kukaia BWANA orewibwaghieghe wandu wengi aghadi yawo.

Sanduku ya Ilaghano aja Kiriath-jearimu

²⁰ Wandu wa Beth-shemeshi wikaghamba, “Nani udimagha kusimana na BWANA, uo Mlungu mweli? Dimuenja kwani udime kudiinjikia?”

²¹ Niko wikaduma wandu Kiriath-jearimu wikighamba, “Wafilisti wawunja Sanduku ya Ilaghano; choonyi muionde.”