1 SAMUELI 5 - Biblia Ilagho Jiboie Kwa Wandu Wose

Sanduku ya Ilaghano kukaia aghadi ya Wafilisti

¹ Nyuma ya Wafilisti kuwada Sanduku ya Mlungu, wikaidwa kufuma Ebenezeri hata Ashdodi.

² Wikaidwa na kuingira nyumbenyi kwa mlungu ghwawo ghuwangwagha Dagoni, wikaiwika mbai na mbai yake.

³ Nao ituku ja kawi nakesho kio, wandu wa Ashdodi wikawona kukaia Dagoni wamerie kughwa kiwushu-wushu imbiri ya Sanduku ya Mlungu. Niko wikammbusira na kummbika kimusi andu orekoghe.

⁴ Ela ituku jinughie iji werewukieghe nakesho, wikammbona Dagoni ughue kiwushu-wushu andonyi imbiri ya Sanduku ya BWANA; chongo chake na mikonu yake vimerie kukenyuka aho kizingitinyi cha mnyango; na kilughadi chake chasigharika chiekeri.

⁵ Iyo niyo shekeria wakohani wa Dagoni wisewadiagha kizingitinyi cha mnyango ghwa nyumba ya Dagoni aho Ashdodi hata linu.

⁶ BWANA ukawikaba wandu wa Ashdodi na wandu wiko mbai mbai kwa mbama, ukawikambira chongo.

⁷ Hata iji wandu wa Ashdodi wawona maza iro wikaghamba, “Ihi Sanduku ya Mlungu wa Waisraeli isekaie kodu, angu wadikaba chiaimweri na mlungu ghodu Dagoni.”

⁸ Nao wikawidumia wabaa wose wa Wafilisti, wikakwana chiaimweri wikaghamba, “Dibonya wada na Sanduku ya Mlungu wa Israeli?” Wikatumbulia, “Iyo Sanduku ya Mlungu wa Israeli ndeighenjo Gathi.” Niko wikaireda iyo Sanduku ya Mlungu wa Israeli aho.

⁹ Ela nyuma ya kuireda iyo Sanduku aho, BWANA ukazoya kughukaba ugho muzi na kuwibonya wandu wikaie na wowa; ukawitirira wandu watini na wabaa kwa kubukwa ni mbama.

¹⁰ Niko wikaighenja iyo Sanduku ya Mlungu Ekroni. Ela iji Sanduku ya Mlungu ereredeloghe Ekroni, wandu wa Ekroni wikakema wikighamba, “Wareda iyo Sanduku ya Mlungu wa Israeli wipate kudibwagha isi diwose.”

¹¹ Niko wikawikwanya wabaa wose wa Wafilisti wikaghamba, “Wunjenyi ihi Sanduku ya Mlungu wa Waisraeli noko andu koni erekoghe, isechedibwagha isi diwose.” Kwa kukaia muzi ghose wandu werekoghe wikiobua kifwa; na Mlungu orekoghe wawikaba wandu aho loli loli;

¹² awo wiserefueghe, orewikabieghe kwa mbama; hata kililo chawo chikajoka mlungunyi.