1 SAMUELI 4 - Biblia Ilagho Jiboie Kwa Wandu Wose

Kuwadwa kwa Sanduku ya Ilaghano

¹ Waisraeli wose wikamsikira Samueli. Nao Waisraeli wikafuma kulwa na Wafilisti; wikabonya kambi yawo aja Ebenezeri, na Wafilisti wikabonya yawo aja Afeki.

² Wafilisti wikakupanga kulwa na Waisraeli; hata iji wuda ghwabia, Waisraeli wikasimwa ni Wafilisti na kubwaghwa sa wandu elfu inya andu wereluyagha wuda.

³ Nao iji majeshi gha Waisraeli ghawuya kambinyi wikaghamba, “Kwaki BWANA wadisigha dikasimwa ni Wafilisti? Nndokonyi diendeonda Sanduku ya Ilaghano ja BWANA kufuma Shilo, eri BWANA upate kukaianya nesi na kudikira na wamaiza wedu.”

⁴ Niko wikaduma wandu kufuma aho, wikaireda kufuma Shilo Sanduku ya Ilaghano ja BWANA wa majeshi, uo ukaiagha ghadi na ghadi ya fwana ra makerubi ghighorue mawawa aighu ya iyo Sanduku; wana wawi wa Eli, Hofni na Finehasi, wikaireda iyo Sanduku.

⁵ Nao iji Sanduku ya Ilaghano yavika kambinyi, Waisraeli wose wikazuma kwa kuboilwa kwa lwaka lubaa, hata ndoe ikasughusika.

⁶ Hata iji Wafilisti wasikira iro chwaka wikaghamba, “Iri chwaka mbaa rabonywa ni Waebrania kambinyi kutambua kwaro niki?” Hata iji wamanya kukaia Sanduku ya Ilaghano yameria kuredwa kambinyi,

⁷ Wafilisti wikaobua na kughamba, “Mlungu wacha kambinyi!” Wikachuria kughamba, “Dapatwa ni mashaka! Jingi ndediwonie maza rifwane huwu.

⁸ Dapatwa ni mashaka! Nani uchaadikira na ihi milungu iko na ndighi huwu? Ihi milungu niyo cheni erewikabieghe Wamisri kwa kula kichuku cha saka aja kireti.

⁹ Mkufungishe ndighi m'bonye kiwomi ee Wafilisti, msechewuya wazumba wa Waebrania seji werekoghe konyu; mkufungishe ndighi sa womi mkulue.”

¹⁰ Niko Wafilisti wikalwa kwa ndighi mbaa, wikawisima Waisraeli hata kula umu wawo ukakimbia cha mzinyi kwake. Wandu wikabwaghwa nandighi, Waisraeli wikafwa masikari elfu mirongo idadu weghenda na maghu.

¹¹ Sanduku ya Mlungu ikawadwa, na wana wa Eli wawi, Hofni na Finehasi wikabwaghwa.

Kifwa cha Eli

¹² Nao mndumu wa kivalwa cha Benjamini ukakimbia kufuma wudenyi, ukaghenda na kuvika Shilo ijo ituku jeni; orekoghe warashua nguwo rake na kukudunga ndoe ra chongo kwa wasi.

¹³ Uendavika, ukamkua Eli uko kidombo kifumbinyi kwake achienyi ukilangaria, kwa kukaia orengiriloghe ni wowa kwa wundu ghwa Sanduku ya Mlungu. Uja mundu ungia mzinyi na kughora agho malagho ghabonyeka, wandu wose wikawoka kulila.

¹⁴ Hata iji Eli wasikira iro ngemi ukaghamba, “Iro ngemi ni ra indoki?” Uja mundu ukabonya shwa-shwa ukaghenda na kumghoria Eli.

¹⁵ Ngelo iyo, Eli orekoghe mundu wa miaka mirongo ikenda na wunyanya, na meso ghake gherekoghe ghameria kufwa usedimagha kuwona.

¹⁶ Uja mundu ukamzera Eli, “Ini ne uja mundu nakimbia kufuma wudenyi idime.” Eli ukamkotia, “Malagho ghaenda wada mwanwapo?”

¹⁷ Uja mundu ukatumbulia, “Waisraeli wasimwa ni Wafilisti, na wandu wabwaghwa loli loli, hata wana wako Hofni na Finehasi wabwaghwa, na Sanduku ya Mlungu yameria kuwadwa.”

¹⁸ Uendaghora maza ra Sanduku ya Mlungu, Eli ukawuduka kinyuma-nyuma kufuma kifumbinyi kwake mbai na mbai ya mbenge, ukachika singo yake, ukafwa; kwa kukaia orekoghe mghosi ulemere; nao orewilongozereghe Waisraeli kwa miaka mirongo ina.

Kifwa cha mka-mkiwa wa Finehasi

¹⁹ Eli mka-mwanwake, uo muka wa Finehasi, orekoghe na kifu chalighisa kuvalwa. Nao iji wasikira maza ra Sanduku ya Mlungu kuwadwa, na kukaia mghosi wake chiaimweri na mumi wameria kufwa, ukawokwa ni kulumwa, ukaghoghoma ukava mwana.

²⁰ Nao iji orekoghe ukifwa, waja waka werekoghe wikimtesia wikamzera, “Kusakeobua, kwa kukaia kwava mwana wa womi.” Ela nderetumbulieghe hata kusikira ilagho jingi anduangi.

²¹ Ukammbanga uja mwana Ikabodi ukighamba, “Ugho wubaa ghwameria kuinjika kufuma kwa Israeli!” Kwa kukaia Sanduku ya Mlungu yameria kuwadwa, na mghosi wake na mumi wameria kufwa.

²² Niko ukaghamba, “Ugho wubaa ghwameria kuinjika kufuma kwa Israeli, kwa kukaia Sanduku ya Mlungu yameria kuwadwa.”