1 SAMUELI 27 - Biblia Ilagho Jiboie Kwa Wandu Wose

Daudi kukaia aghadi ya Wafilisti

¹ Daudi ukaghamba ngolonyi kwake, “Ituku jimu wanidu nibwaghwa ni Sauli. Ndekuwadie ilagho jingi izima jinitesiagha kuchumba kukimbia cha kwa Wafilisti; aho niko Sauli uchaakoja kuninugha andenyi ya isanga ja Israeli, nani nichakaia banana.”

² Kwa huwo Daudi chiaimweri na wandu wake maghana arandadu ukawuka na kughenda cha kwa Mzuri Akishi mwana wa Maoki, wa muzi ghwa Gathi.

³ Daudi ukakaia aho Gathi kwa Akishi chiaimweri na wandu wake; kula mundu na kinyumba chake; nao moni na waka wake wawi; Ahinoamu wa isanga ja Jezreeli, na Abigaili uja muka mkiwa wa Nabali, wa isanga ja Karmeli.

⁴ Sauli uendaghorelwa kukaia Daudi wakimbirie cha Gathi ukasigha kumdiwa.

⁵ Nao Daudi ukamzera Akishi, “Ikakaia loli kunirumirie, nipatire andu kumu kokaia na wandu wapo andenyi ya imu ya mizi yako mitini isangenyi kwako. Kwaki ini mdumiki wako nikaiagha andenyi ya muzi ghwako m'baa chiaimweri na oho?”

⁶ Niko Akishi ukamneka Daudi muzi ghwa Siklagi ituku jija; na muzi ugho ghwaduagha ghwa wazuri wa Juda hata idime.

⁷ Daudi orekaieghe andenyi ya isanga ja Wafilisti kwa mwaka mlazi na meri ina.

⁸ Ngelo iyo, Daudi na wandu wake wikawikaba wandu wa Geshuri, na Wagerezi na Waamaleki; wandu awo werekoghe wikikaia aho kala; kufuma Shuri hata isanga ja Misri.

⁹ Daudi ukawikaba na kubwagha wandu wose hata nderesighieghe mndungi umoo wa womi angu wa waka; ela ukadwa ng'ondi, na ng'ombe, na weke punda, na ngamila, na marwao; ukawuya kwa Akishi.

¹⁰ Hata iji wakotelwa ni Akishi, “Ni wandu wiao kwawikaba idime?” Daudi orekoghe ukitumbulia, “Ni wandu wa Negebu ya Juda” angu “Negebu ya Wajerameeli,” angu “Negebu ya Wakeni.”

¹¹ Daudi orekoghe ukibwagha wandu wose, ikaiagha wa womi angu wa waka; mndungi usechepatika oghenja malagho Gathi, ukiririkanya wei uo mundu wadima kwendaghora malagho ghawo ukighamba, “Huwu niko Daudi wawuyabonya.” Huwo niko Daudi uduebonya matuku ghose ukaie andenyi ya isanga ja Wafilisti.

¹² Nao Akishi ukamrumiria Daudi ukiririkanya, “Wamerie kukubonya moni uzamie wandu wa Israeli putu; kwa huwo uchadua mdumiki wapo matuku ghose.”