1 SAMUELI 25 - Biblia Ilagho Jiboie Kwa Wandu WoseKifwa cha Samueli 1 Nao Samueli ukafwa, na Waisraeli wose wikacha kumlilia na kum'bonyera ifwa; wikamrika andenyi ya nyumba yake aho Rama. Niko Daudi ukawuka na kughenda kireti cha Parani. Daudi na Abigaili 2 Na aho Maoni korekoghe na mndumu orekoghe na ndoe aja Karmeli. Mundu uo, orekoghe mzuri wa mali; ng'ondi elfu idadu, na mburi elfu imweri. Orekoghe ukidumbua ng'ondi rake mafuri aja Karmeli. 3 Mundu uo orewangwaghwa Nabali, na irina ja mkake orewangwagha Abigaili. Muka uo orekoghe ughokie uko na suku, ela mumi orekoghe ung'etere usene adabu, nao orekoghe wa kivalwa cha Kalebu. 4 Nao Daudi ukasikira aho kireti kukaia Nabali wawuyadumbua ng'ondi rake mafuri. 5 Niko ukaduma wandu wa irika ikumi ukawizera, “Ghendenyi kwa Nabali aho Karmeli mumzere namroghua. 6 Na inyo mcharoghua huwu; ‘Sere ikaie kwako, na kwa nyumba yako, na vose kuko navo. 7 Nasikire kukaia koko na wandu wedumbua ng'ondi mafuri; nesi derekwaneghe na walisha wako dikakanya nawo; ndederewibonyereghe ilagho jingi, hata ndewerelaghashireghe kindo chingi ngelo iro rose werekoghe aho Karmeli. 8 Kukawikotia wandu wako, wichakughoria. Kwa huwo, karibisha wandu wapo wa irika, angu hoku dacha ituku ja karamu, kuwineke wadumiki wako na mwana wako Daudi kindo chingi kuko nacho.’” 9 Nao waja wandu wa Daudi wikaghenda kwa Nabali, na kumghoria agho malagho weredumiloghe ni Daudi; wikakaia wikiweseria. 10 Niko Nabali ukawitumbulia, “Daudi nani, na uo mwana wa Jese nani? Matuku agha wadumiki wengi wawuyawikimbia weke bwana wawo. 11 Nao niwade mkate ghwapo, na machi ghapo, na nyama rapo nabwaghia wandu wapo wedumbua ng'ondi rapo mafuri, nineke wandu nisewimanyagha andu wafuma?” 12 Wadumiki wa Daudi wikawuya na kumghoria agho malagho ghose. 13 Niko Daudi ukawizera wandu wake, “Kula mundu ndero lufu lwake!” Nao kula umu wawo ukarwa lufu lwake, na Daudi wori ukarwa lufu lwake; na wandu maghana ana wikamnugha Daudi, ela wandu maghana awi wikasigharika wikilindia vilambo. 14 Ela mndumu wa irika ukamghoria Abigaili mka Nabali ukighamba “Keni kwamanyire Daudi wadumie wandu kwa bwana odu kufuma kireti wichemroghua, na bwana odu ukawisholia awo wandu? 15 Na sena wandu awo werekoghe wecha kodu loli loli, hata ndederepatiroghe ni ilagho jingi, angu kulagharilwa ni kilambo chingi ngelo rose derekwanyeghe nawo mlambenyi; 16 weredilindirieghe chiaimweri na ng'ondi redu ngelo rose derekwanyeghe nawo nakio hata nadime. 17 Idana kumanye agho, nao kupime ngera kubonya wada; kwa kukaia wandu awo wakaia na nia em'bonya bwana odu kiwiwi chiaimweri na wandu wake wose; uo bwana odu nao ndefundwagha ni mndungi, oozama shuu.” 18 Niko Abigaili ukabonya shwa-shwa, ukawada mikate maghana awi na viriba va mrongo va divei viwi, na ng'ondi isanu riochelo, na kilo ikumi na mfungade ra viro viochelo, na vanga ighana jimweri va zabibu riomie, na keki maghana awi ra tini; ukavidukishira weke punda. 19 Nao ukawizera wandu wake wa irika, “Kirienyi, naawuyacha.” Ela nderemghorieghe mumi wake anduangi. 20 Hata iji orekoghe ukisea akonenyi ya mghondi uko aighu ya punda, ukakwana na Daudi ukicha na wandu wake. 21 Daudi orekoghe ukighamba ngolonyi kwake, “Kwa loli neebonya kazi nduu elindia mali ya umundu orekoghe nayo ichi kireti chose, hata nderelaghariloghe ni kilambo chingi chake; da hoyu wanilipa wuwiwi kwa ugho wucha nim'bonyere! 22 Ngamsighiagha mndungi wa womi nisem'bwaghie ndoe isetambukie, Mlungu unibwaghe.” 23 Nao iji Abigaili wammbona Daudi, ukasea shwa-shwa kufuma pundenyi, na kughwa imbiri ya Daudi kiwushu-wushu, ukadunga wushu ghwake andonyi. 24 Nao uko maghunyi kwa Daudi ukaghamba, “Ugho wuwiwi ndeghukaie aighu yapo bwana wapo, kunineke wulalo ghodedanya na oho, ini mdumiki wako; kusikire kililo chapo ini mdumiki wako. 25 Nakuvoya kusetale malagho gha umundu uzamie Nabali, angu sa iji koni irina jake jiko nikokoni nao moni uko. Uo wadawangwa Nabali, na wukelu oko nagho; ela ini mdumiki wako, siwonane na waja wandu korewidumieghe. 26 Idana bwana wapo, sa iji BWANA ukaiagha moyo, na sa iji koni roho yako ikaiagha moyo, nawona kukaia BWANA wakughiria kusebonye kiwiwi chedia bagha, hata kulipia kisasi chingi kwa mkonu ghwako ghoni. Kwa huwo, awo wamaiza wako, na wose wikundagha kukubonya kiwiwi, ndewikabo sa Nabali. 27 Idana wada agha manosi ini mdumiki wako nakuredia bwana wapo, kuwineke awo wandu mwawuyanughana. 28 Nakulomba kunilekie makosa ghapo ini mdumiki wako, kwa kukaia loli bwana wapo, BWANA uchakubonyera wuzuri ghwa kala na kala, angu kwawuyalwa wuda ghwa BWANA; na wuwiwi ndeghuchaawoneka kwako matuku ghose kuchaakaia moyo. 29 Wandu wikawuka kulwa na oho, wikikunda kujifunya irangi jako, BWANA uchajivisa irangi jako banana bwana wapo, na oho kuchalindilwa ni BWANA Mlungu wako; na marangi gha wamaiza wako uchaghikumba noko sa kukumbwa na kikuza. 30 Hata ingelo BWANA uchaakubonyera oho bwana wapo agho mecha ghose orekulaghirieghe, na kukubonya kukaie kilongozi aighu ya Israeli, 31 ndekuchaakaia na wasi ghungi bwana wapo, hata nia yako ndeichaavavirika kwa wundu ghodia bagha duu, angu kukulipishira kisasi kumoni. Ngelo BWANA wachakubonyera mecha bwana wapo, kunikumbuke ini mdumiki wako.” 32 Nao Daudi ukamzera Abigaili, “BWANA, uo Mlungu wa Israeli ndekaso, angu wakulongoza kukwane na ini idime! 33 Hikima yako ndeirasimilo, na oho kumoni wori; angu kwanitangala nisedie bagha duu, hata nisekulipie kisasi nimoni! 34 Kwa kukaia loli, sa iji BWANA Mlungu wa Israeli ukaiagha moyo, uo waniwadia ini nisekubonye kiwiwi, ngera kuseshashireghe kukwana na ini, kumangu kesho kokio, mndungi wa womi ndasigharikagha kwa Nabali uko moyo.” 35 Nao Daudi ukawada ivo vindo vose oredwaeghe, ukamzera, “Ghenda nyumbenyi kwako kwa sere; nameria kusikira agho kwaghora, nani nichakukatishira malombi ghako.” 36 Niko Abigaili ukawuya kwa Nabali, ukamkua ukija karamu nyumbenyi kwake, sa karamu ya mzuri. Nabali orekoghe wasikira raha ngolonyi kwake, angu orewongerieghe nandighi; na Abigaili nderemghorieghe ilagho jingi hata ndoe ikaela nakesho. 37 Nao iji ndoe yaela, nakesho yaro, iji wuwongeri ghwake ghwasia, mkake ukamghoria iro maza rose; ngolo yake ikaturukia, ukazimia; ukaoma sa igho; 38 na nyuma ya matuku sa ikumi huwu, BWANA ukamkaba, nao ukafwa. 39 Daudi uendaghorelwa kukaia Nabali wafue, ukaghamba, “BWANA ndekaso, uo wanilipia kisasi kwa wundu ghwa agho nibonyero ni Nabali; nao wanilindia ini mdumiki wake nisebonye kiwiwi; BWANA wammbunjira Nabali ugho wuwiwi ughubonyere aighu kwake moni.” Niko Daudi ukaduma momu ghomchumbia Abigaili, eri upate kumlowua. 40 Wadumiki wa Daudi wiendacha kwa Abigaili aja Karmeli, wikamzera, “Daudi wadiduma diche kuonda kukaie mkake.” 41 Nao Abigaili ukawuka, ukaghoghoma hata ukadunga wushu ghwake andonyi na kughamba, “Ola mdumiki wako oko aha kuoghosha maghu gha wadumiki wake bwana wapo.” 42 Abigaili ukabonya shwa-shwa, ukajoka aighu ya punda, na wai wake wa kazi wasanu wikanughana nao. Ukawinugha awo wadumwa wa Daudi, nao ukawuya muka wa Daudi. 43 Daudi orekoghe wamlowua Ahinoamu wa muzi ghwa Jezreeli, na Abigaili wori ukawuya mkake. 44 Sauli orekoghe wamfunya mwai wake Mikali, uo orelowologhe ni Daudi, uwuso ni Palti mwana wa Laishi, mundu wa muzi ghwa Galimu. |