1 SAMUELI 24 - Biblia Ilagho Jiboie Kwa Wandu Wose

Daudi kulegham'bwagha Sauli

¹ Sauli uendawuya kufuma kulwa na Wafilisti, ukaghorelwa kukaia Daudi oko kireti cha En-gedi.

² Niko Sauli ukadwa wandu wa Israeli wisaghulo elfu idadu, wiendemlola Daudi na wandu wake aho Magho gha Sarigha.

³ Ukacha ukakua maranu gha ng'ondi chienyi andu korekoghe na mbanga, Sauli ukangia ukutesie. Daudi na wandu wake werekoghe wangia kondenyi ya iyo mbanga, na kusea kidombo.

⁴ Nao wandu wa Daudi wikamzera, “Ola idime niko BWANA wakatisha ilaghiro jake aighu ya wamaiza wako seji orekuzerieghe, ‘Nichakuneka wamaiza wako, na oho kuchawibonya sa iji kukunde.’” Daudi ukawuka mboa, ukadumbua kidambi cha nguwo ya Sauli.

⁵ Konyuma, ngolo ya Daudi ikamtanya; angu oredumbueghe kidambi cha nguwo ya Sauli;

⁶ ukawizera wandu wake, “BWANA unitesie nisem'bonye kiwiwi bwana wapo, uo mshingwa mavuda wa BWANA; hata nisetime kum'bonya ilagho jingi jizamie, angu uo ni mshingwa mavuda wa BWANA.”

⁷ Daudi ukawibonya wandu wake witambukilo ni agho malagho, hata ndeweredimieghe kum'bonya Sauli ilagho jingi anduangi. Sauli ukawuka, ukafuma mbangenyi na kughenda chia rake.

⁸ Konyuma, Daudi wori ukawuka ukafuma nyuma yake na kummbanga Sauli ukighamba, “Ee bwana wapo mzuri!” Sauli uendazighana nanyuma, Daudi ukaghoghoma na kudunga chongo chake andonyi kwa ishima;

⁹ ukaghamba, “Kwaki kusikiragha malagho gha wandu wighoragha wei naawuyakunda kukubonya kiwiwi?

¹⁰ Ola idime iji kwawona kumoni na meso ghako seji BWANA ukungirieghe mikonunyi kwapo aja mbangenyi; hata wandu wamu wikanilomba wei nikubwaghe, ela ngalegha kukubwagha ngighamba, ‘Sidimagha kuwusira mkonu ghwapo aighu ya bwana wapo, angu uo ni mshingwa mavuda wa BWANA.’

¹¹ Wona nga aba, kidambi cha nguwo yako hechi! Kuwone loli seji neredimagha kukubwagha, ela ngadumbua tu kidambi cha nguwo yako, eri kuwonemanya kukaia sina ilagho jingi na oho, hata nia ingi ekubonya kiwiwi. Ini sibonyere kaung'a ingi hata ngera oho kwawuyanidiwa kupate kunifunya irangi.

¹² BWANA ndetanye aghadi yapo na oho; BWANA ndenilipie kisasi chapo kwako, ela ini sichaakubonya kiwiwi chingi.

¹³ Na sa iji koni ikatanisho ja wandu wa kala jighorie, ‘Wuwiwi ghwadafuma kwa Wawiwi,’ kwa huwo ini sichaakubonya kiwiwi anduangi.

¹⁴ Mzuri wa Israeli wawuyamlola ani? Mzuri wa Israeli wawuyamnugha ani? Ualola koshi ifue, angu uanugha sawa!

¹⁵ BWANA ndeditanye na kufunya hachi aghadi yapo na oho, uzighane nao unidederie, na kunikira kusenibonye kiwiwi.”

¹⁶ Daudi uendaghora malagho ghake, Sauli ukaghamba, “Loli nokumoni mwanwapo Daudi?” Sauli ukawoka kulila kwa lwaka,

¹⁷ ukamzera Daudi, “Oho koko na hachi kunichumba, kwa kukaia kwanilipa mecha, ingelo ini nawuyakulipa mawiwi.

¹⁸ Na idime kwawonyera seji kunibonyere nicha kwa kuleghanibwagha ingelo BWANA uningirieghe mikonunyi kwako.

¹⁹ Kwani mundu ukawona m'maiza wake wadima kumlekeria? Kwa huwo, BWANA ndekulipe mecha kwa wundu ghwa agho kwanibonyera idime.

²⁰ Na idana ola namanya kwa loli kuchawuya mzuri, na hata wuzuri ghwa Israeli ghuchaaghika kwa wulongozi ghwako.

²¹ Kwa huwo, nalomba kunibonyere ighemi kwa irina ja BWANA, kukaia ndekuchaainja kivalwa chapo nyuma yapo; na angu ndekuchaajinona irina japo andenyi ya kinyumba cha aba.”

²² Nao Daudi ukam'bonyera Sauli ighemi; niko Sauli ukaghala ela Daudi na wandu wake wikawuya cha andu kwawo kokuvisa.