1 SAMUELI 23 - Biblia Ilagho Jiboie Kwa Wandu Wose

Daudi kukira muzi ghwa Keila

¹ Nao Daudi ukasikira wei Wafilisti wawuyakaba muzi ghwa Keila, nawo waawuyawusa ngano rawuyachanwa achwalenyi.

² Daudi ukamlomba BWANA ukighamba, “Welee, nighende kulwa na awo Wafilisti?” BWANA ukamzera, “Ghenda kuwikabe awo Wafilisti, kughukire muzi ghwa Keila.”

³ Ela wandu wa Daudi wikamzera, “Wele aeni aha Juda daawuyaobua, ni kuchumba saki iji daghenda Keila kulwa na majeshi gha Wafilisti?”

⁴ Niko Daudi ukamkotia BWANA sena. Na BWANA ukamzera, “Wuka kusee cha Keila, kwa kukaia nichakubonya kuwisime Wafilisti.”

⁵ Niko Daudi ukawuka na wandu wake wikaghenda Keila; ukalwa na Wafilisti, na kudwa ng'ombe rawo wunyika; wikawibwagha wandu wengi nandighi. Daudi ukawikira wandu wa Keila.

⁶ Ngelo Abiathari mwana wa Ahimeleki orekimbiagha cha kwa Daudi aja Keila, oredwaeghe naivera.

⁷ Sauli ukasikira kukaia Daudi wachee Keila. Nao Sauli ukaghamba, “Mlungu wamngira mikonunyi kwapo; waendangia muzi ghuko na mbenge ra vuma na kukurughia andenyi!”

⁸ Sauli ukakwanya wandu wose kwa wuda; usee Keila kummaria Daudi na wandu wake chia rose.

⁹ Daudi uendamanya kukaia Sauli wabonya mpango ghom'bonya kiwiwi, ukamzera uja mkohani Abiathari, “Reda iyo Naivera aha.”

¹⁰ Nao Daudi ukamzera BWANA, “Ee BWANA, Mlungu wa Israeli; nasikira loli kukaia Sauli waawuyakunda kusea Keila, upate kughutotesha ughu muzi kwa wundu ghwapo.

¹¹ Welee, wandu wa Keila wichanifunya uniwade? Loli Sauli usea seji koni ini mdumiki wako nasikira? Ee BWANA Mlungu wa Israeli, nakuvoya kunimanyishe ini mdumiki wako.” Nao BWANA ukaghamba, “Sauli usea.”

¹² Daudi ukakotia sena, “Welee, wandu wa Keila wichanifunya ini na wandu wapo diwado ni Sauli?” BWANA ukamzera, “Wichakufunya.”

¹³ Niko Daudi na wandu wake maghana arandadu wikafuma Keila na kughenda andu uko kose weredimieghe kughenda. Sauli uendasikira kukaia Daudi wakimbia, ukabwagha icho charo chake.

Daudi kukaia isanga ja mighondinyi

¹⁴ Daudi ukakaia andu kokuvisa aighu ya isanga ja mighondinyi kireti cha Zifu, na Sauli ukamdiwa matuku ghose, ela Mlungu nderemfunyireghe ummbwade anduangi.

¹⁵ Daudi ukawona kukaia Sauli waawuyalola kum'bwagha. Daudi ukakaia kireti cha Zifu aja Horeshi.

¹⁶ Na Jonathani mwana wa Sauli ukawuka na kughenda kwake aja Horeshi; ukamkumba Daudi ngolo kukaia Mlungu oko chiaimweri nao.

¹⁷ Ukamzera, “Kusakeobua, aba ndechaadima kukubonya ilagho jingi; oho kuchakaia mzuri aighu ya Israeli, na ini nichakaia aisi yako; hata aba moni waichi huwo.”

¹⁸ Nao waja wandu wawi wikabonyerana ilaghano imbiri ya BWANA. Daudi ukasigharika aja Horeshi, na Jonathani ukaghala.

¹⁹ Nao wandu wamu wa Zifu wikajoka hata Gibea kwa Sauli wikaghamba, “Ola Daudi waawuyakuvisa aghadi kodu aja ngomenyi mghondinyi ghwa Hakila, isanga ja Horeshi cha kusinyi ya Jeshimoni.

²⁰ Idana sea ee mzuri, ngelo iyo yose kwakunda nesi dichamfunya kummbwade.”

²¹ Sauli ukaghamba, “BWANA ndemrasimie inyo, kwa kukaia mwaniwonia wughoma.

²² Idana ghendenyi mzighane nicha andu ukaiagha, sena mummanye uo oremmbonieghe aho; kwa kukaia naghorelo wakalie loli loli.

²³ Kwa huwo mzighane nicha, mmbone andu ukuvisagha; nao mmbuye munighorie malagho gha loli. Aho niko dichaaghendanya; na ikakaia uko aeni isangenyi, nichamlola aghadi ya maelfu ghose gha kichuku cha Juda.”

²⁴ Nao awo wandu wikawuya cha Zifu, wisekwanye na Sauli. Daudi na wandu wake werekoghe kireti cha Maoni, aho Araba noko cha kusinyi ya Jeshimoni.

²⁵ Sauli na wandu wake wikaghenda kumlola. Daudi ukaghorelwa; nao ukasea na kungia mbangenyi iko kireti cha Maoni. Sauli uendasikira huwo ukamnugha Daudi aho kireti cha Maoni.

²⁶ Sauli ukaghenda ukinugha mghondi ii chia, na Daudi na wandu wake wikaghenda wikinugha mghondi ija chia; Daudi ukakaia ukishashira kumkimbia Sauli, iji Sauli chiaimweri na wandu wake werekoghe wikifunga ndighi kuwisoghodera kukunda kuwiwada.

²⁷ Ahoeni mdumwa orechieghe kummanyisha Sauli kukaia Wafilisti wawada isanga, ubonye shwa shwa kuwuya.

²⁸ Sauli ukasigha kumnugha Daudi, ukawuya cha mzinyi kulwa na Wafilisti. Kwa huwo andu aho kukawangwa, “Igho jefufunukia.”

²⁹ Nao Daudi ukafuma aho ukaghenda En-gedi; ukakaia ukikuvisa aho.