1 SAMUELI 21 - Biblia Ilagho Jiboie Kwa Wandu Wose

Daudi kumkimbia Sauli

¹ Nao Daudi ukaghenda cha kwa mkohani Ahimeleki aja Nobu. Ahimeleki ukacha kummara Daudi ukisughusika, ukamzera, “Kwaki kwacha kuekeri kusekwanye na mndungi?”

² Daudi ukamzera mkohani Ahimeleki, “Naadumwa ni mzuri, ela waaghamba, ‘Mndungi usemanye ilagho jingi ja agha malagho nakuduma na kukulaghira.’ Napatana kukwana na wandu wa irika andu kumu.

³ Idana niki kuko nacho aha? Nneke mikate misanu angu icho chose chiko.”

⁴ Uja mkohani ukamtumbulia Daudi, “Siwadie mikate ingi mizima aha, ela mikate niko nayo ni ija ya wueli, kwadima kuiwusa ikakaia awo wadawana mkwanye wikuwikie weni kula na waka.”

⁵ Daudi ukatumbulia, “Kwa loli isi dakuwikie kula na waka, sa matuku mazima ghose nidambagha charonyi. Vilambo va awa wana vadakaia vielie, hata ingelo ikaiagha charo cha kawaida tu; welee, ni kuchumba saki idime vilambo vawo kukaia vielie?”

⁶ Niko mkohani ukamneka mikate ya wueli, kwa kukaia ndekorekoghe na mkate ghungi mzima ela iyo cheni mikate ifunyiro kwa Mlungu; nayo yamerie kuinjwa imbiri ya BWANA, eri mikate mizima ya modo ieleshero ipate kuwikwa; nyuma ya ija kuinjwa.

⁷ Korekoghe na mndumu wa wadumiki wa Sauli aho ituku jija; nao orekoghe wafungwa kunughana na sharia ra dini. Irina jake orewangwaghwa Doegi ufumie Edomu; nao orekoghe ni m'baa wa walisha wa Sauli.

⁸ Daudi ukamzera Ahimeleki, “Ndekuwadie ifumu angu lufu lungi aha? Ini sidwaeghe lufu hata iswagha jingi japo; angu nafuma shwa-shwa kukatisha wudumwa ghwa mzuri.”

⁹ Mkohani ukaghamba, “Lufu lwa uja Goliathi Mfilisti korem'bwaghieghe aja vololonyi ya Ela nilo luko aha; lwarighirilo nguwo lukawikwa aho nanyuma ya naivera. Kwadima kuluwusa iji kwakunda; ndediwadie lungi luzima.” Daudi ukaghamba, “Ndeluko lungi luzima sa ulo, nineke uloni ulo.”

¹⁰ Daudi ukawuka ituku jija, ukakimbia kufuma kwa Sauli; ukaghenda kwa Akishi mzuri wa Gathi.

¹¹ Wadumiki wa Akishi wikamzera, “Wele uhu si uja Daudi mzuri wa isanga jawo? Si uo moni waka wereboragha na kuvina wikitumbuliana, ‘Sauli wabwaghie maelfu ghake, na Daudi maelfu ikumi ghake?’”

¹² Agho malagho ghikamngia Daudi ngolonyi, nao ukamuobua Akishi mzuri wa Gathi loli loli.

¹³ Niko ukaghalusa tabia rake, imbiri kwawo, ukakubonya moni sa mundu wa isu ngelo werekundagha kummbwada, ukakaia ukisuwa-suwa vizingiti va minyango ya mbengenyi, na kulekeria mada ghake ghidike a sombenyi rake.

¹⁴ Akishi ukawizera wabaa wake, “Ai, u mundu ndeeka na isu; kwaki mwamreda kwapo?

¹⁵ A huwo neesowa wandu wa isu e munirediagha umundu wa isu nichemmbona? U mundu wadima kungia nyumbenyi kwapo?”