1 SAMUELI 20 - Biblia Ilagho Jiboie Kwa Wandu Wose

Jonathani kumtesia Daudi

¹ Nao Daudi ukakimbia kufuma Naiothi aja Rama, ukacha kwa Jonathani ukamzera, “Welee, nabonyere wada? Wuwiwi ghwapo niki? Ni kaung'aki nibonyere kwa ndeyo hata ukunde kunibwagha?”

² Jonathani ukatumbulia, “Agho ndeghikaie kula; ndekufwagha kungi. Ola Aba ndenivisagha ilagho jingi, jikaiagha ibaa angu itini. Idimika wada Aba univise ilagho sa iji; huwo siko kungi.”

³ Ela Daudi ukatumbulia, “Ndeyo waichi putu kukaia oho dakundane, nao waawuyaririkanya kukaia Jonathani ukamanya ilagho iji, uchakaia na wasi. Ela kughora loli, naghema kwako kwa irina ja BWANA uko moyo, naasighwa mlambo ghumweri tu aghadi yapo na kifwa.”

⁴ Niko Jonathani ukaghamba, “Ini nichabonya ilagho ijo jose kuchaanizera nikubonyere.”

⁵ Daudi ukamzera Jonathani “Ola kesho ni ituku ibaa ja Mori Lukombe; na ini siko osoweka vindonyi chiaimweri na mzuri, ela sigha niendekuvisa isakenyi, hata ituku ja kadadu luma lwa kenyi.

⁶ Iji ndeyo wanisowa putu, kumzere, ‘Daudi wanivoya nandighi nimneke rusa ughende mzinyi mzawo Bethlehemu, kwa kukaia kizongona cha kula mwaka chaawuyafunywa aho kwa wundu ghwa kinyumba chawo.’

⁷ Ndeyo ukaghamba ‘Ni nicha,’ aho ini mdumiki wako neko banana; ela ukajokwa ni machu, aho kumanye loli oko na nia enibonya kiwiwi.

⁸ Kwa huwo kunitesie kwa wughoma ghwako ini mdumiki wako, angu kwameria kunibonyera ini mdumiki wako ilaghano jielie. Ela ngera nakubonyere wuwiwi ghungi, kunibwaghe kumoni. Da eko hajaki ya kusindanighenja kwa ndeyo niendebwaghwa?”

⁹ Jonathani ukamzera, “Leka agho malagho. Kwani ngera nedemanya loli wei aba oko na nia izamie ekubonya kiwiwi, kumangu sikughorie?”

¹⁰ Daudi ukamzera Jonathani, “Nani uchaanighoria iji ndeyo wakutumbulia kwa machu?”

¹¹ Jonathani ukamzera, “Nndoko difume dighende cha mbuwenyi.” Wikafuma wose wikaghenda cha mbuwenyi.

¹² Nao Jonathani ukamzera Daudi, “BWANA, uo Mlungu wa Israeli, ukaie mshahidi! Nichazighana malagho gha aba kesho angu lawuke ngelo sa ihi, kukunda kumanya malagho ghako; ngawona ndena ilagho jingi na oho, nichakudumia momu.

¹³ Nako ngawona kukaia nia yake ni ekubonya kiwiwi, Mlungu unibonye kiwiwi na kuchumba, ngakaia nisechee kukumanyisha, na kukubarisha eri kughende na sere. BWANA ukaie nakumoni sa iji koni orekaieghe na aba.

¹⁴ Iji niko moyo, kukaie mloli na kuniwonyere wughoma ghwa BWANA eri nisefo;

¹⁵ sena kuduo mloli kwa nyumba yapo matuku ghose, ingelo BWANA wakainja wamaiza wako wisewoneke ndoenyi;

¹⁶ irina japo jiseinjike andenyi ya nyumba yako; na BWANA ndelipie kisasi kwa wamaiza wako wose.”

¹⁷ Nao Jonathani ukamghemesha Daudi sena, aighu ya ilaghano jekundana werejibonyereghe; kwa kukaia oremkundieghe seji koni ukukunde moni.

¹⁸ Niko Jonathani ukamzera Daudi, “Kesho ni ituku ibaa ja Mori Lukombe, na oho kuchamanyika ndekuko angu kifumbi chako chichakaia kiduu.

¹⁹ Ituku ja kadadu, kuchamanyika ndekuko putu, na oho kughende andu koni korekuvisireghe kiimbiri iji maza iri rerezoeghe, nao kukuvise aja kitungu cha magho chiko.

²⁰ Nani nichakumba mawanu adadu mbai na mbai yaro, seji niakumba bole.

²¹ Niko aho nichaduma mwana uendelola agho mawanu. Ngamzera, ‘Nechi mawanu gheeka ulo luwaru loni kuko, ghishoo;’ aho kuchafuma, angu ndengwa ingi ndeiko.

²² Ela ngamzera, ‘Agho mawanu gheeka naimbiri kwako cha kimonu,’ aho kooghenda, kwa kukaia BWANA waakuzera kughende.

²³ Na kwa wundu ghwa malaghano dabonya aghadi yako na ini, ola BWANA oko aghadi kodu matuku ghose.”

²⁴ Nao Daudi ukakuvisa mbuwenyi; hata iji ngelo ya ituku ibaa ja Mori Lukombe javika, mzuri ukasea kidombo kuja vindo.

²⁵ Ukaseria kifumbi chake cha matuku ghose kaavui na wurigha ghwa nyumba, na Jonathani ukasea kidombo kumlangaya; Abneri ukasea kidombo mbai na mbai ya mzuri, ela wulalo ghwa Daudi ghukakaia mduu.

²⁶ Elaima ituku ijo Sauli ndereghorieghe ilagho jingi, angu oregheshereghe, “Kewada Daudi waapatwa ni ilagho jimu jikam'bonya ukaie useelie kimzango.”

²⁷ Ela ituku ja kawi, nakesho ya ijo ituku ja Mori Lukombe, wulalo ghwa Daudi ghukakaia mduu. Sauli ukamkotia mwana wake Jonathani, “Kwaki mwana wa Jese usechee vindonyi ighuo na idime?”

²⁸ Jonathani ukamtumbulia Sauli, “Daudi odenivoya nimneke rusa ughende Bethlehemu;

²⁹ angu oreghambieghe wei, ‘Tafadhali nneke rusa nighende, kwa kukaia wandu wa kinyumba cha kedu wawuyafunya kizongona mzinyi, na mwanidu wanilomba nikaie aeni. Kwa huwo, iji kwaniwona kukaia mucha mesonyi kwako, nisighe niendewonana na wanidu.’ Iyo niyo sababu usewonekie vindonyi kwa mzuri.”

³⁰ Niko Sauli ukajokwa ni machu aighu ya Jonathani, ukamzera, “Oho mwana wa muka mng'eti, usesikiragha; siambie wori koowadana na mwana wa Jese uwonekufusha waya oho na mayo ukuvae.”

³¹ Ndekuichi iji mwana wa Jese uko moyo ndoenyi oho na wuzuri ghwako wori ndeghuchaakaia? Kwa huwo mdumirie uredo kwapo, angu ni suti ufo.

³² Jonathani ukamtumbulia ndee Sauli, “Ubwaghilwaki, wabonya wada?”

³³ Sauli ukamkumba Jonathani na ifumu upate kum'bwagha. Niko Jonathani ukatambua kukaia ni nia ya ndee kum'bwagha Daudi.

³⁴ Ukawuka vindonyi wajokwa ni machu nandighi; hata nderejieghe vindo vingi ijo ituku ja kawi ja Ndima ya Mori Lukombe, angu orewawiloghe nandighi kwa wundu ghwa Daudi seji ndee wamsowia ishima.

³⁵ Nakesho, Jonathani ukaghenda cha mbuwenyi sa iji koni werelaghaneghe na Daudi, ukamdwa mwana umu.

³⁶ Ukamzera uo mwana, “Kimbiaghaa kunilolieghe mawanu nawuyaghikumba.” Nao iji mwana orekoghe ukikimbia, ukakumba iwanu naimbiri kwake.

³⁷ Hata iji mwana wavika andu iwanu jeredungieghe, Jonathani ukammbanga na kumzera, “Wele nechi iwanu jeeka naimbiri kwako na kimonu.”

³⁸ Jonathani ukachuria kumzera uja mwana, “Bonya shwa-shwa kusedunge maghu.” Uja mwana ukashoa mawanu na kuwuya kwa bwana wake.

³⁹ Ela uja mwana nderemanyireghe ilagho jingi; agho malagho ghedemanywa ni Jonathani na Daudi uekeri.

⁴⁰ Jonathani ukamneka uja mwana maswagha ghake ukimzera, “Ghido cha mzinyi.”

⁴¹ Uja mwana uendaghenda, Daudi ukafuma aja ukuvisireghe kitungunyi cha magho, ukaghwa kiwushu-wushu imbiri ya Jonathani mando adadu; wikawadana na kususughana wikilila hata Daudi ukalila kuchumba.

⁴² Jonathani ukamzera Daudi, “Ghenda na sere. Kwa kukaia daghemiana kwa irina ja BWANA dikighamba, ‘BWANA ukaie aghadi kodu, na kwa kivalwa chedu matuku ghose.’” Daudi ukawuka ukaghenda; na Jonathani ukaghala cha mzinyi.