1 SAMUELI 2 - Biblia Ilagho Jiboie Kwa Wandu Wose

Ilombi ja Hana

¹ Na wokoni Hana ukalomba ukighamba, “Ngolo yapo yaboilwa andenyi ya BWANA, nani nachulwa ni ndighi ra BWANA; nawiseka wamaiza wapo, angu niboilwagha ni kukia kwake Mlungu.

² “Ndekuwadie mweli ungi uko sa BWANA, hata ndekuwadie ungi okatanishwa nao; ndekuwadie mlindiri ungi sa Mlungu odu.

³ Msedede malagho gha kukukasa sena, kukuduka kungi kusefume memunyi konyu; angu BWANA ni Mlungu wa kumanya, na uo wadaghipima mabonyo ghose.

⁴ Ndana ra wandu wiwadie ndighi rachikanywa, ela wanyonge wapata ndighi.

⁵ Awo werekoghe wighudie wabonya vibarua wipate vindo, ela awo werekoghe na njala waghuda. Kolowi wavae wana mfungade, ela uo muka uvae wana wengi wasighwa duu.

⁶ BWANA wadabwagha na kukaisha moyo, wadasera wandu Andu kwa Wafu na kuwirukisha.

⁷ BWANA wadawiwunja wandu wakiwa, sena wadawiwunja wazuri; wadawisera wandu na kuwijosa sena.

⁸ Wadamjosa mkiwa ufume terinyi, wadammbusira uo usowie ufume kitungasinyi cha ivu; upate kuwibonya wisee kidombo chiaimweri na wabaa, wipate ifwa ja malalo gha ishima. Angu nguro ra ndoenyi ni ra BWANA, na aighu yaro waghuwikirie wurumwengu.

⁹ “Uchawilongoza wandu wake wa loli, ela wawiwi wichalagharia kirenyi; angu mundu ndechaadima kusima kwa ndighi anduangi.

¹⁰ Wamaiza wa BWANA wichadumbulwa vipande vipande, uchawikaba na lukuwa kufuma mlungunyi BWANA uchatanya ndoenyi kose, uchamneka mzuri wake ndighi, na kumchuria ndighi uo msaghulwa wake.”

¹¹ Niko Elkana ukawuya cha mzinyi kwake Rama, na uja mwana Samueli ukasighwa ukimdumikia BWANA aisi ya mkohani Eli.

Wana wa Eli

¹² Wana wa Eli werekoghe wandu wisefwane, kwa kukaia ndeweremtalieghe BWANA,

¹³ hata ija sharia ya hachi ya wakohani kwa wandu werefunyagha vizongona. Wulalo ghwaro, iji mndungi wakafunya kizongona chake, mdumiki wa mkohani orekoghe ukicha na uma ya maghegho adadu ingelo nyama erekoghe ikidoghoda,

¹⁴ na kuingira sufurienyi angu birikenyi, angu kighombonyi, angu nyungunyi, na nyama iyo yose erekoghe yadungwa ni uma, yadawuswa ni mkohani. Huwo niko werekoghe wikiwibonyera Waisraeli wose werekoghe wikicha Shilo.

¹⁵ Na aighu ya agho, imbiri mavuda ghisekorelo, mdumiki wa mkohani orekoghe ukicha kwa uja mundu wafunya kizongona na kumzera, “Reda nyama mkohani upate kuocha; kwa kukaia ndechairumiria nyama yako yadoghoswa, ela ookunda mbishi.”

¹⁶ Iji uo mundu wamzera, “Kaduu kande wikore mavuda ima kuwuse sa iji koni kukunde;” wadamzera, “Sikunde!” Neeikunda idakoni; na kukalegha, nichaiwusa kwa ndighi.

¹⁷ Huwo iyo kaung'a ya waja wana erekoghe mbaa nandighi imbiri ya BWANA, kwa kukaia werevimenyereghe ivo vizongona verefunyiroghe kwa BWANA.

Samueli kukaia Shilo

¹⁸ Uja mwana Samueli orerushiroghe naivera ya kitani, ukakaia ukidumika imbiri ya BWANA.

¹⁹ Mae ukakaia ukimdungia ijoho itini, na kumredia kula mwaka ingelo werejokanyagha na mumi wake kufunya kizongona cha kula mwaka.

²⁰ Na Eli ukakaia ukiwirasimia Elkana na mkake ukighamba, “BWANA ndekuneke wana kufumanya na muka uhu, kwa wundu ghwa uo oremfunyireghe kwa BWANA;” na nyuma ya huwo werekoghe wikiwuya cha mzinyi kwawo.

²¹ BWANA ukamrasimia Hana, nao ukava wana wa womi wadadu na wa waka wawi. Uja mwana Samueli ukazoghua imbiri ya BWANA.

Eli na wana wake

²² Idana Eli orekoghe waghosia nandighi, ukakaia ukisikira iro maza rose wana wake werekoghe wikiwibonyera Waisraeli, na seji werekoghe wikilala na waka awo werekoghe wikidumika aho mbengenyi ya Hema ekwania.

²³ Nao ukawizera, “Kwaki m'bonyagha maza ring'ane huwu? Angu nasikira kufuma kwa wandu wengi seji mwawuyabonya maza rizamie.

²⁴ Huwo siko kungi wana wapo; maza nawuyarisikira rikiereshwa ni wandu wa BWANA nderiboie kungi.

²⁵ Mundu ukam'bonyera mdamu kaung'a uchadederelwa ni Mlungu, ela mundu ukam'bonyera Mlungu kaung'a, nani uchaamdederia?” Ela waja wana ndeweremsikireghe ndee kwa kukaia Mlungu odeeka na mpango ghowibwagha.

²⁶ Uja mwana Samueli ukachuria kuzoghua ukikundwa ni BWANA na wandu.

Wulodi aighu ya kinyumba cha Eli

²⁷ Nao mndumu wa Mlungu ukamchea Eli ukamghoria seji BWANA wamzera, “Nerekuwonyereghe ini moni kwa kinyumba cha wawayo Haruni iji werekoghe wazumba wa mzuri aja Misri.

²⁸ Ngamsaghua Haruni aghadi ya vichuku vose va Israeli ukaie mkohani wapo; ufukireghe marumba aighu ya madhabahu yapo ukirwa naivera imbiri kwapo. Ngachineka kinyumba cha wawayo hachi eja vizongona vose vekora verekoghe vikifunywa ni wandu wa Israeli.

²⁹ Kwaki sena oho kubonyagha iriso aighu ya vizongona vapo vekora na mafunyo, ivo nerevilaghirieghe; nao kuwitaleghe wana wako kunichumba ini, kwa kukubandisha mmbeni na kukusaghuya ivo vizongona viboie nifunyirwaghwa ni wandu wapo Israeli?

³⁰ Ini BWANA Mlungu wa Israeli nerelaghirieghe kukaia oho na kivalwa chako chichanidumikia kwa wukohani matuku ghose; ela idana, naghamba agho sichaaghibonya putu; kwa kukaia nadawitala awa winitalagha, na kuwimenya awo winimenyagha.

³¹ Ola matuku ghichacha, nichaapunguza ndighi rako na ndighi ra kinyumba chako; hata mghosi ungi usewoneke wa kinyumba chako.

³² Na oho kwa wasi kuchabwaghwa ni iriso jewona wandu wa Israeli wikikaia nicha kwa maza rose na oho kukisowa mndungi ughosere andenyi ya kinyumba chako.

³³ Mundu wako ungi uchaasigharika moyo nisemwinjire madhabahunyi kwapo, uchasigharika tu kwa kukubonya kodelilaghaa na kukaia na wasi ngolonyi; na wandu wa kivalwa chako chose, wichakaia wikibwaghwa ni wandu wudenyi.

³⁴ Na alama ekuwonyera wuloli ghwa maza iri ni ihi: wana wako wawi, Hofni na Finehasi, wichafwa wose kwa ituku jimweri.

³⁵ Nani nichawika mkohani mzima uchaakaia mloli kwapo, nao moni uchabonya agho nighikundagha. Nichamneka kinyumba chimange chichaadumika imbiri ya msaghulwa wapo matuku ghose.

³⁶ Kula umu wa kinyumba chako uchaasigharika, uchamghendia uo mkohani na kumvoya ukilomba pesa na vindo kwa kumlomba umngire andenyi ya wudumiki ghwa wukohani eri upate kindo chingi cheja.”