1 SAMUELI 19 - Biblia Ilagho Jiboie Kwa Wandu Wose

Sauli kutima kum'bwagha Daudi

¹ Nao Sauli ukaghora na mwana wake Jonathani chiaimweri na wabaa wake kukaia, wim'bwaghe Daudi. Ela Jonathani orekoghe ukiboilwa ni Daudi loli-loli.

² Jonathani ukamghoria Daudi, “Aba Sauli ookunda kukubwagha; kwa huwo kukulindie kumoni. Kesho kukuvise andu kumu kukaie aho;

³ nani nichaghenda na kukaia kaavui na aba aho andu kwakuvisa, na kudedanya nao aighu yako, na aho ngamanya ilagho jingi nichakughoria.”

⁴ Nao Jonathani ukamghora Daudi nicha kwa ndee Sauli, ukimzera, “Mzuri usebonye kaung'a kwa kum'bonyera mdumiki wako Daudi wuwiwi ghungi, angu nao moni ndekubonyere kaung'a ingi, na mabonyo ghake ghiboie gheekutesia oho;

⁵ kwa kukaia orewikieghe irangi jake ndengonyi, ukam'bwagha uja Mfilisti Goliathi; na BWANA ukareda wusimi m'baa kwa Waisraeli wose. Oho kumoni kwawonie kukaboilwa; kwaki sena kukunde kubonya kaung'a edia bagha isewadie ikosa jingi, kwa kum'bwagha Daudi duu?”

⁶ Nao Sauli ukaisikira njama ya Jonathani, ukaghema ukighamba, “Naghema kwa BWANA uko moyo, Daudi ndechaabwaghwa anduangi.”

⁷ Nao Jonathani ukammbanga Daudi, ukamghoria maza rose; ukamghenja kwa Sauli, nao moni ukawada wudumiki ghwake ghomdumikia mzuri sa iji koni orekoghe.

⁸ Wuda ghukabuka sena, na Daudi ukafuma ukalwa na Wafilisti, ukawibwagha nandighi, nawo wikakimbia.

⁹ Na roho mbiwi idumilo ni BWANA ikamchea Sauli uko kidombo nyumbenyi kwake, wawadia ifumu jake mkonunyi; na Daudi orekoghe ukikaba kinubi.

¹⁰ Sauli ukalola kumdunga Daudi na ifumu hata umkwanye na wurigha ghwa nyumba, ela Daudi ukamuepa na ifumu jikadunga wurighenyi. Daudi ukakimbia na kukia.

¹¹ Sauli ukaduma wandu nyumbenyi kwa Daudi chija kio cheni kumlindia wipate kum'bwagha nakesho. Ela Mikali uja mkake, ukamghoria ukighamba, “Kukalemwa ni kukukira ichi kio cheni ichi, kesho kuabwaghwa.”

¹² Nao Mikali ukamsera Daudi wurighenyi kwa kuidiria idirishenyi, ukakimbia na kukia.

¹³ Mikali ukararisha fwana ya mundu wulinyi, ukawika mto ghwa mafuri gha mburi chongonyi na kuifinikira nguwo.

¹⁴ Hata iji Sauli waduma wandu kuchamuonda Daudi, Mikali ukaghamba, “Ooka mkongo.”

¹⁵ Niko Sauli ukaduma wandu wiendemzighana Daudi, na kumreda kwa Sauli uko wulinyi, upate kum'bwagha.

¹⁶ Waja wadumwa wiendangia chumbenyi wikawona fwana yararishwa wulinyi, na mto ghwa mafuri gha mburi ghwawikwa chongonyi kwake.

¹⁷ Sauli ukamzera Mikali, “Kwaki kwanikalia huwu, nao kukalekeria m'maiza wapo kakimbia na kukia?” Mikali ukatumbulia, “Nechi waanizera wei nimlekerie usechenibwagha.”

¹⁸ Daudi ukafufunuka na kukimbia cha kwa Samueli aja Rama; ukamghoria maza rose Sauli orekundieghe kum'bonya. Wikafuma wose na Samueli, wikaghenda na kukaia Naiothi.

¹⁹ Sauli ukaghorelwa kukaia Daudi oko Naiothi, aja Rama.

²⁰ Ukaduma wandu wiendemuonda Daudi. Nao iji wawona izungu ja walodi wikifunya wulodi, na Samueli uko aghadi kwawo sa m'baa wawo, Roho wa BWANA ukawiseria awo wandu wa Sauli, nawo weni wikazoya kufunya wulodi.

²¹ Sauli uendaghorelwa huwo, ukaduma wandu wazima; nawo weni wori wikafunya wulodi. Sauli ukaduma wandu wamu indo ja kadadu; nawo weni wori wikafunya wulodi.

²² Nao ukaghenda moni Rama, ukavika chija kisima kibaa chikaiagha Seku; ukakunda kumanya andu Samueli na Daudi wiko. Mndumu ukaghamba, “Ola weko Naiothi aja Rama.”

²³ Hata iji wazoya kughenda aho, Roho wa BWANA ukamchea aighu kwake wokoni, ukazoya kufunya wulodi ukighenda hata ukavika Naiothi aja Rama.

²⁴ Ukafunya nguwo rake wokoni; nao ukaasindafunya wulodi imbiri ya Samueli nadime dii, sena nakio chee uko duu. Hata na wandu wikaghamba, “Huwo Sauli nao moni ni umu wa walodi?”