1 SAMUELI 15 - Biblia Ilagho Jiboie Kwa Wandu Wose

Wuda aighu ya Waamaleki

¹ Nao Samueli ukamzera Sauli, “BWANA orenidumieghe nikushinge mavuda kukaie mzuri aighu ya wandu wake Israeli; idana sikira seji BWANA Uwadie-Ndighi-Rose waghora.

² Uchawikaba Waamaleki angu werewitangalieghe Waisraeli chienyi ngelo werefumieghe isanga ja Misri.

³ Idana ghenda kuwikabe Waamaleki; kunone kula kilambo wiko nacho, kusewilekerie; ela kubwaghe mndwawomi na muka, mwana mtini na uo uongagha, ng'ombe na ng'ondi, ngamila na punda.”

⁴ Niko Sauli ukakwanya ijeshi chiaimweri aja Telaimu; ukatala masikari elfu maghana awi weghenda na maghu wifumie Israeli, na masikari elfu ikumi wifumie Juda.

⁵ Sauli na masikari ghake ukaghuchea ghuja muzi ghwa Amaleki na kughulaliria avololonyi.

⁶ Ukawizera Wakeni, “Fumenyi mkutanye na Waamaleki, nisechemtoteshanya nawo; angu inyo morekoghe na wughoma kwa wandu wose wa Israeli ingelo werejokagha kufuma Misri.” Nao Wakeni wikafuma na kukutanya na Waamaleki.

⁷ Sauli ukalwa na Waamaleki; kufuma Havila hata Shuri, iko chia ya mashariki ya Misri ukawisima.

⁸ Ukammbwada Agagi mzuri wa Waamaleki uko moyo, na kuwibwagha wandu wose kwa lufu.

⁹ Ela Sauli chiaimweri na wandu wake wikamsigha Agagi kimoyo, na ng'ondi na ng'ombe ribandie; na wana wa ng'ondi chiaimweri na vose verekoghe viboie; hata nderebwaghieghe kula kilambo putu putu, ela iveni vizamie na va kisha kisha.

BWANA kumlegha Sauli usekaie mzuri

¹⁰ Niko ilagho ja BWANA jikamchea Samueli jikighamba,

¹¹ “Nasirimika kukaia nam'bonyere Sauli ukaie mzuri; kwa kukaia wameria kuwuya nyuma na kunisigha, hata ndenughie malaghiro ghapo anduangi.” Samueli ukawawa nandighi, ukamlilia BWANA kio chee.

¹² Nao Samueli ukawuka kokesho kio, upate kuwonana na Sauli. Samueli ukaghorelwa kukaia Sauli wavika Karmeli na kuagha tumbitumbi ya lukumbuso kwa wundu ghwake, nao waghaluka ukaida cha Gilgali.

¹³ Niko Samueli ukamghendia Sauli. Nao Sauli ukamzera, “BWANA ukurasimie! Nameria kughukatisha ghuja momu ghwa BWANA.”

¹⁴ Samueli ukamzera “Kwaki sena nawuyasikira ng'ondi rikidaya, na ng'ombe rikidoka?”

¹⁵ Sauli ukatumbulia, “Ni wandu waridwa kufuma kwa Waamaleki; kwa kukaia werekoghe wasaghua ng'ondi na ng'ombe iro rerekoghe riboie, wipate kufunya kizongona kwa BWANA Mlungu wako. Ela vizima vose damerie kuvitotesha putu.”

¹⁶ Niko Samueli ukamzera Sauli, “Nyama kima. Leka nikughorie agho BWANA unighorie ikwau.” Nao ukamzera, “Ghora.”

¹⁷ Nao Samueli ukaghamba, “Hata ngera kwawuyakumenya kumoni, na kukuwona ndekufwane, ela uko nechi ni oho kumoni m'baa aighu ya vichuku va Israeli BWANA odekushinga mavuda kukaie mzuri aighu ya Israeli.

¹⁸ Na BWANA ukakuduma ukighamba, ‘Ghenda kuwitoteshe putu wakaung'a, awo Waamaleki; kulo nawo hata wisie putu.’

¹⁹ Ni kwaki sena kuseremsikireghe BWANA? Kwaki koresaragha vilambo na kuvidwa wunyika hata kukabonya wuwiwi imbiri ya BWANA?”

²⁰ Niko Sauli ukamzera Samueli, “Namsikira BWANA putu, ngaghenda sa iji koni BWANA orenidumieghe; nani namreda Agagi mzuri wa Amaleki, na kuwitotesha Waamaleki wose putu.

²¹ Ela wandu niwo widwae ng'ondi na ng'ombe wunyika, na vilambo vimu viboie ivo verekoghe vetoteshwa, vifunyo kizongona kwa BWANA Mlungu wako aha Gilgali.”

²² Nao Samueli ukaghamba, “Kwani BWANA wadaboilwa ni mafunyo na vizongona vekora kuchumba seji uboilwagha ni kusikirwa? Ola kumsikira BWANA kwaboie kuchumba kizongona, na kusikira kwaboie kuchumba mavuda gha bauru.

²³ Angu kuleghasikira kooka sa kaung'a ya wusawi, na kughilika kooka sa wuwiwi na kaung'a etasa milimu. Kwa kukaia kwalegha kusikira momu ghwa BWANA, nao moni wori wakulegha kusekaie mzuri.”

²⁴ Nao Sauli ukamzera Samueli, “Nabonya kaung'a; kwa kukaia nalegha kusikira momu ghwa BWANA, na malagho ghako; angu nawiobua wadamu na kusikira mawoni ghawo.

²⁵ Kwa huwo nakulomba kunifuye wughoma kaung'a yapo, diwuyanye niwonemtasa BWANA.”

²⁶ Samueli ukamzera Sauli, “Ndediwuyanyagha kungi, angu kwajilegha ilagho ja BWANA, nao moni wakulegha kusekaie mzuri aighu ya Israeli.”

²⁷ Nao iji Samueli waghaluka ughale, Sauli ukawada kidambi cha nguwo yake, nayo ikarashuka.

²⁸ Samueli ukamzera Sauli “BWANA waghurashua wuzuri ghwa Israeli kufuma kwako idime, na kughuneka mmbenyu uko mucha kukuchumba.

²⁹ Sena Mlungu, uo uko Wubaa ghwa Israeli ndeghoragha tee hata ndeghalukagha sa mdamu anduangi.”

³⁰ Sauli ukatumbulia, “Nabonya kaung'a elaima leka sinda niposhua imbiri ya wabaa wa wandu wapo, na imbiri ya Israeli. Nisighe dighendanye niwonemtasa BWANA Mlungu wako.”

³¹ Nao Samueli ukaghaluka wikawuyanya cha Gilgali, na Sauli ukamtasa BWANA.

³² Nao Samueli ukaghamba, “Niredienyi Agagi, uo mzuri wa Waamaleki aha.” Agagi uko usirilo ukaghamba, “Kifwa chabirie!”

³³ Samueli ukaghamba, “Sa iji koni lufu lwako loreshekerieghe waka wengi kusowekelwa ni wana wawo, huwo koni mayo uchakusowa aghadi ya waka wambao.” Nao Samueli ukamdema Agagi vipande-vipande madhabahunyi imbiri ya BWANA aho Gilgali.

³⁴ Nao Samueli ukaghala cha Rama, na Sauli ukaghala cha nyumbenyi kwake aja Gibea.

³⁵ Nao Samueli ukafwa usemmbonie Sauli; ela orekoghe ukisirimika kwa wundu ghwake, na Mlungu ukawawa kwa kukaia oremsaghueghe Sauli ukaie mzuri aighu ya Israeli.