1 SAMUELI 14 - Biblia Ilagho Jiboie Kwa Wandu Wose

Wuwana ghwa Jonathani

¹ Ituku jimu, Jonathani mwana wa Sauli ukamzera uo mdawana orekoghe ukimdukia maswagha, “Nndoko diruwuke ija chia cha ngomenyi ya Wafilisti.” Ela Jonathani orekoghe usemghorie ndee.

² Sauli orekoghe ukikaia aisi ya mkomamanga aja Migroni kutua kwa Gibea; nao orekwanyeghe na wandu maghana arandadu;

³ aghadi yawo, orekoghe mwana wa Ahitubu mruna Ikabodi mwana wa Finehasi, wawae Eli uo orekoghe mkohani wa BWANA aja Shilo; nao orekoghe ukirwa naivera. Wandu ndeweremanyireghe wei Jonathani waghenda.

⁴ Ugho mwanya ghwa Mikmashi, andu Jonathani oreidiriagha kuvikia ngome ya Wafilisti, korekoghe na mchombololo ghwa magho ii chia na mchombololo ghumu ghwa magho ii chia. Mchombololo ghumu ghorewangwaghwa Bosesi, na ghumu Sene.

⁵ Mchombololo ghumu ghorewukieghe chia ya kaskazinyi naimbiri ya Mikmashi, na ghumu chia ya kusinyi naimbiri ya Geba.

⁶ Nao Jonathani ukamzera uja mdawana oremdukiagha maswagha, “Nndoko diruwuke ija chia cha ngomenyi ya awa wandu wiseshamishiro, kewada BWANA wadima kuditesia; kwa kukaia ndekuwadie ilagho jingi jidimagha kumghiria BWANA usekire kwa kutumia wandu wengi angu watini.”

⁷ Uja mdawana oremdukiagha maswagha ukatumbulia, “Bonya ijo jose kwajiririkanya kukaia icha; dekwanye chiaimweri, sa iji koni kwaririkanya nikokoni.”

⁸ Jonathani ukaghamba, “Oke ndediruwuke dikuwonyere kwa awo wandu.

⁹ Wikadizera, ‘Weserenyi diche konyu,’ dichakaia aeni diko.

¹⁰ Ela wikadizera, ‘Choonyi,’ dichaghenda; kwa kukaia BWANA wameria kuwingira mikonunyi kodu. Iyo ichakaia niyo alama yedu.”

¹¹ Niko wose wawi wikakuwonyera weni aja ngomenyi kwa Wafilisti, na Wafilisti wikaghamba, “Wonenyi Waebrania waawuyafuma mirumenyi, andu wikuvisireghe.”

¹² Nao waja wandu wa ngomenyi wikawiwinga Jonathani na mduki maswagha wake wikaghamba, “Ola choonyi dimmbonyere ilagho jimu.” Niko Jonathani ukamzera uja mduki maswagha wake, “Ninughe, kwa kukaia BWANA wameria kuwingira mikonunyi kwa Israeli.”

¹³ Jonathani ukazoya kujoka na mikonu na maghu na uja mduki maswagha ukakaia ukimnugha. Jonathani ukakaia ukiwighusha wamaiza, na uo mundu oremdukieghe maswagha ukakaia ukiwibwagha ngelo orenughagha nanyuma.

¹⁴ Na uko kubwagha kwa imbiri korebonyeroghe ni Jonathani na uo mduki maswagha korekoghe kwa wandu mirongo iwi, andenyi ya andu korekoghe na kipimo sa cha nusu eka.

¹⁵ Wafilisti werekoghe kambinyi, na awo werekoghe cha shighadinyi na ngomenyi, wikangilwa ni kiture kibaa; hata na awo widwagha wandu wunyika wikaobua, na ndoe ikasughusika; na wandu wose wikangilwa ni wowa m'baa.

Kusimwa kwa Wafilisti

¹⁶ Walindiri wa Sauli awo werekoghe Gibea isanga ja Benjamini, wikawusira meso wikazighana; nao wikawona Wafilisti wasaghisika ii chia na ii chia.

¹⁷ Niko Sauli ukawizera wandu wake orekwanyeghe nawo, “Talenyi wandu dipate kummanya umundu usekwanye nesi.” Wikatala wandu wikakua Jonathani na uja mundu oremdukiagha maswagha wiseko.

¹⁸ Sauli ukamzera Ahija, “Reda Sanduku ya Mlungu aha.” Kwa kukaia iyo ngelo Sanduku ya Mlungu erekoghe ikikaia kwa wandu wa Israeli.

¹⁹ Nao iji Sauli orekoghe ukidedanya na mkohani, ndoghoi ikachurikia andenyi ya kambi ya Wafilisti; na Sauli ukamzera mkohani, “Sigha.”

²⁰ Niko Sauli na wandu wose orekwanyeghe nawo, wikafuma na kungia wudenyi gholwa na Wafilisti; wikawona kukaia Wafilisti wedeeka wikibwaghana weni na weni wisemanyagha.

²¹ Hata na Waebrania wamu werekoghe wikikaia kwa Wafilisti kiimbiri, na kujokanya cha kambinyi kwawo wikaghaluka na kukukwanya na awo Waisraeli werekanyeghe andwamweri na Sauli na Jonathani.

²² Na wokoni wandu wose wa Israeli werekuvisireghe mighondinyi ya Efraimu wiendasikira kukaia Wafilisti waawuyakimbia, wikafuma na kungia wudenyi ghowiwinga Wafilisti.

²³ Niko huwo ituku ijo BWANA ukawikira Israeli. Wuda ghukaenda imbiri hata kuida kimonu cha Beth-aveni.

Maza ribonyekie nyuma ya ugho wuda

²⁴ Waisraeli wikasirimika kwa wundu ghwa njala ituku jija, kwa kukaia Sauli orewighemeshereghe wandu ukighamba, “Mndungi ukaja vindo nisemerie kulipa kisasi aighu ya wamaiza wapo hata luma lwa kenyi, uwado ni njowe.” Kwa huwo mndungi ndechetoa vindo ijo ituku.

²⁵ Wandu wose wikacha na kuvika kilembenyi, na aho wikawona wuki andonyi.

²⁶ Wandu wose wiendangia andenyi kilembenyi wuki ghukakaia ghukitonya andonyi, ela ndekorekoghe na mndungi oredimieghe kughushoa na kughutoa; angu wandu wose wereobueghe ijo ighemi.

²⁷ Ela Jonathani nderekoghe wasikira iji ndee oreghemeshagha wandu. Kwa huwo ukaghorua mzata ghorekoghe mkonunyi kwake, ukaghungira andenyi ya indo ja wuki na kuleta, na meso ghake ghikaela.

²⁸ Nao mndumu ukamzera, “Nechi ndeyo waghemesha wandu wei Mndungi ukaja vindo idime, uwado ni njowe; na huwu wandu wasilwa nandighi.”

²⁹ Niko Jonathani ukatumbulia, “Aba waawuyasumbua wandu; wona seji ini meso ghapo ghaela niendatoa wuki mtinieri.

³⁰ Kwamanya yakaiagha nicha saki ngera wandu wedesighwa wikaie huru kuja vindo va wamaiza wawo wawidwa wunyika idime; kumangu wabwagha Wafilisti wengi kuchumba.”

³¹ Ituku jija wikawikaba Wafilisti kufuma Mikmashi hata Aijaloni. Na wandu werekoghe wasilwa nandighi;

³² nawo wikaramia vilambo wavidwa wunyika, wikawada ng'ondi, na ng'ombe, na ngache; wikaribwagha ahoeni, wikaja nyama chiaimweri na bagha yaro.

³³ Nao wikamghoria Sauli wikighamba, “Zighana wandu wakam'bonyera BWANA kaung'a kwa kuja nyama chiaimweri na bagha yaro.” Sauli ukaghamba, “Mwabonya kiwiwi, ning'arishirenyi igho ibaa idime.”

³⁴ Sauli ukachuria kughora, “Fumenyi muwizere wandu, ‘Kula mundu nderede ng'ombe yake angu ng'ondi yake, uche uibwaghe aha, uje; ela msakem'bonyera BWANA kaung'a kwa kuijanya na bagha yaro.’” Niko kula mundu ukareda ng'ombe yake chija kio na kuibwaghia aho.

³⁵ Sauli ukamuaghia BWANA madhabahu, nayo erekoghe madhabahu yake ya imbiri oremuaghieghe BWANA.

³⁶ Niko Sauli ukawizera wandu wake, “Nndokonyi diwinughe Wafilisti nakio, diwikabe na kuwisoka vilambo hata ndoe kuelenyi; diwibwaghe na kuwimeria.” Nawo wikaghamba, “Bonya ijo jose kujiwonagha kukaia icha kwako.” Ela mkohani ukaghamba, “Dimkotie Mlungu kande.”

³⁷ Nao Sauli ukamkotia Mlungu ukighamba, “Welee, niwiserie Wafilisti? Kuchawifunya wikabo ni Waisraeli?” Ela ijo ituku Mlungu nderemtumbulieghe anduangi.

³⁸ Nao Sauli ukaghamba, “Choonyi aha inyo vilongozi vose va wandu dipate kumanya ngera ni kaung'aki yabonywa kodu idime.

³⁹ Angu naghema kwa BWANA uko moyo, uo uwikiragha Israeli, hata eewoneka kwa mwana wapo Jonathani, kwa loli uchabwaghwa.” Ela ndekorekoghe na mndungi aghadi ya awo wandu oremtumbulieghe ilagho jingi anduangi.

⁴⁰ Sauli ukawizera Waisraeli wose, “Kaienyi luwaru lonyu, na ini na mwana wapo Jonathani dikaie luwaru lodu.” Na wandu wikamtumbulia, “Bonya ijo kujiwonagha kukaia icha.”

⁴¹ Niko Sauli ukalomba, “Ee BWANA Mlungu wa Israeli, kwaki idime kusenitumbulie ini mdumiki wako? Ikakaia wuwiwi ghooka kwapo angu kwa mwana wapo Jonathani, ee BWANA Mlungu wa Israeli kufunye Urimu; ela ikakaia ghooka kwa wandu wako Israeli, kufunye Thumimu.” Nao matumbulio ghikawonyera kukaia ni kwa Jonathani na Sauli, hata si kwa wandu anduangi.

⁴² Sauli ukaghamba, “Idana tanya aghadi yapo na mwana wapo Jonathani.” Nao Jonathani ukawadwa.

⁴³ Niko Sauli ukamzera Jonathani, “Nighorie seji kwabonya.” Jonathani ukamghoria, “Naaleta wuki mtinieri kwa kutumia mdo ghwa mzata nighuwadieghe; na idana neko tayari kufwa.”

⁴⁴ Sauli ukaghamba, “Kwa loli kawona kusefwagha idime Jonathani, Mlungu unibwaghe.”

⁴⁵ Niko wandu wikamzera Sauli, “Ado Jonathani uabwaghwa umoni wawiredia Israeli wusimi m'baa? Agho ghikaie kula putu! Sa iji BWANA ukaiagha moyo, ndekuwadie hata luwiriro lwa iridia jake luchaakulwa na kupotolwa andonyi, kwa kukaia Jonathani waateselwa ni Mlungu idime.” Nao wandu wikamvuvua Jonathani usebwagho.

⁴⁶ Niko Sauli ukasigha kuwiwinga Wafilisti, na Wafilisti wikawuya cha mzawo.

Kubonya nguma kwa Sauli na kinyumba chake

⁴⁷ Sauli uendawada wuzuri aighu ya Israeli, ukalwa na wamaiza wake kula andu; ukalwa na Wamoabu, na Waamoni, na Waedomu, na wazuri wa Soba, na Wafilisti; andu kose orelueghe nawo ukakaia ukiwisima.

⁴⁸ Ukalwa kwa wuing'oni na kuwikaba Waamaleki, hata ukawikira Waisraeli kufuma kwa makorongo gha awo wandu wose.

⁴⁹ Wana wa Sauli ni awa: Jonathani, na Ishvi, na Malkishua; marina gha wai wake wawi ni: Merabu mwai wake wa imbiri, na uo mtini orewangwaghwa Mikali.

⁵⁰ Mkake Sauli orewangwaghwa Ahinoamu, mwai wa Ahimaazi. M'baa wa majeshi ghake orewangwaghwa Abneri mwana wa Neri, na uo Neri ni mruna ndee Sauli.

⁵¹ Sauli ndee, uo Kishi, na Abneri ndee, uo Neri, ni wana wa Abieli.

⁵² Sauli orekoghe ukilwa na Wafilisti irangi jake jose, na kula ngelo, iji oremmbonieghe mndungi uko ing'oni jiwadie ndighi, orekoghe ukimsaghua na kum'bonya ukaie asikari wake.