1 SAMUELI 10 - Biblia Ilagho Jiboie Kwa Wandu Wose

¹ Niko Samueli ukawada chupa ya mavuda, ukamdiria Sauli chongonyi kwake; ukamsusugha ukighamba, “Nechi BWANA nuo wakushinga mavuda kupate kuwibonyera nguma wandu wake Israeli. Kuchabonya nguma aighu ya wandu wa BWANA, na oho kuchawikira wisekabo ni wamaiza wawo wiko mbai mbai yawo. Alama ewonyera kukaia BWANA wakushinga mavuda kukaia mzuri aighu ya wandu wake ni ihi:

² Dikameria kusighana idime, kuchakwana na wandu wawi aho kaburinyi ya Raheli, mpakenyi ghwa Benjamini aho Selsa; nawo wichakughoria kukaia weke punda awo korewilolagha wamerie kuwoneka; na idana ndeyo wasighie kughesha maza ra weke punda, waawuyakambwa ni chongo kwa wundu ghwako ukighamba, ‘Nibonya wada kwa wundu ghwa mwanwapo?’

³ Aho kuchaghenda imbiri kufuma aja, na kughuvikia mwaloni ghueleshero ghwa Tabori, na aho kuchakwana na wandu wadadu wawuyaendafunya kizongona kwa Mlungu aja Betheli; umu udwae ndaghina idadu, na umu udwae mikate idadu, na umu udwae kiriba cha divei.

⁴ Wichakuroghua na kukuneka mikate iwi, na oho kuchaiwada.

⁵ Konyuma kuchacha na kuvika Gibeathelohimu, andu kuko na ngome ya masikari gha Wafilisti; hata iji kwakangia mzinyi kuchakwana na walodi wamu wafuma mghondinyi andu kotasira wikikaba kinubi, na kayamba, na msherembe na zeze, wikifunya wulodi.

⁶ Ahoeni Roho wa BWANA uchakuchea aighu kwako kwa ndighi mbaa; na oho kuchafunya wulodi chiaimweri nawo na kughaluswa wuzima.

⁷ Kukameria kuwona alama iri rose, kubonye ijo jose kwasikira kujibonya, kwa kukaia Mlungu oko andwamweri na oho.

⁸ Na oho kunikirie cha Gilgali, nani nichacha ahoeni nipate kufunya vizongona vekora, na vizongona va mafunyo gha mapatano. Kuniweserie kwa matuku mfungade hata nacha, nani nichakuwonyera agho ghikufwanagha kughibonya.”

⁹ Sauli uendasighana na Samueli, Mlungu ukamghalua wuzima, na alama rija rose rikabonyeka ijo ituku jeni.

¹⁰ Wiendavika Gibea, wikakwana na walodi wamu, na Roho wa Mlungu ukamchea aighu kwake kwa ndighi mbaa, nao ukafunya wulodi aghadi kwawo.

¹¹ Wandu weremmanyireghe kiimbiri, wiendammbona ukifunya wulodi chiaimweri na walodi wikaghamba, “Mwana wa Kishi wawonieki ngawandu! Huwo Sauli nao moni ni umu wa walodi?”

¹² Mndumu wa ijo isanga ukatumbulia, “Ndee wawo nani?” Kwa huwo wandu wikazoya kutumia ikatanisho iji, “Huwo Sauli nao moni ni umu wa walodi?”

¹³ Nao iji Sauli wameria wulodi, ukajoka cha mghondinyi andu kotasira.

¹⁴ Awuye wake Sauli ukammbonanya chiaimweri na mdumiki wake ukawikotia, “Moendieghe hao?” Sauli ukatumbulia, “Dedeeka dikilola weke punda; nesi diendawisowa dikaghenda kwa Samueli.”

¹⁵ Awuye wake ukaghamba, “Tafadhali nighorie seji Samueli ukuzerie.”

¹⁶ Sauli ukamzera awuye, “Oredighorieghe worinyi kukaia weke punda wawonekie.” Ela ukamvisa agho malagho gha wuzuri oreghoreloghe ni Samueli.

Sauli kuzumilwa kwa kuwikwa mzuri

¹⁷ Nao Samueli ukawiwanga wandu, ukawikwanya imbiri ya BWANA aja Mispa;

¹⁸ ukawizera awo wandu, “BWANA, uo Mlungu wa Israeli waghamba huwu, ‘Neremfunyireghe kufuma Misri, ngamkira na makorongo gha Wamisri, na mawuzuri gherekoghe ghikimkoronga.

¹⁹ Ela idime iji mwanilegha ini Mlungu onyu uo umkiragha kufuma kwa ndengwa na wasi ghonyu m'baa; nenyo mwanilomba nimneke mzuri om'bonyera nguma. Ni nicha. Idana kwanyikenyi mmbeni imbiri kwapo kunughana na vichuku venyu na nyumba renyu.’”

²⁰ Samueli ukareda vichuku vose va Israeli kaavui, na kichuku cha Benjamini chikawadwa ni kura.

²¹ Nao ukareda kichuku cha Benjamini kaavui, kunughana na nyumba rawo, na nyumba ya Matiri ikawadwa ni kura. Kutua ukareda nyumba ya Matiri kaavui mundu kwa mundu, na Sauli mwana wa Kishi ukawadwa ni kura; ela iji werekoghe wikimlola nderedimieghe kuwoneka.

²² Niko wikamkotia BWANA sena wikighamba, “U mundu sena wacha aha?” BWANA ukatumbulia, “Sauli hoyo waakuvisa a misigonyi.”

²³ Niko wikaghenda na kumreda kufuma aho. Hata iji wakaia kimusi aghadi ya wandu, ukawoneka kukaia mlacha kuchumba wandu wose kufuma maongenyi kwake kwenda nokoighu.

²⁴ Samueli ukawizera wandu wose, “Mwawona umundu wasaghulwa ni BWANA? Ndekuwadie ungi uko sa uo aghadi ya wandu wose.” Nao wandu wose wikaghora kwa lwaka lubaa, “Mzuri ndeduo moyo luma!”

²⁵ Samueli ukawighoria wandu malagho gha hachi na kazi ra wuzuri, ukariandika andenyi ya chuo na kuchiwika imbiri ya BWANA. Niko Samueli ukawisigha kula mundu ughale cha mzinyi kwake.

²⁶ Wokoni Sauli ukaghala cha mzinyi kwake aja Gibea, ukaghendanya na wandu wiko mang'oni, awo Mlungu oreadadireghe ngolo rawo.

²⁷ Ela wandu wamu wa kisha-kisha wikaghamba, “Umundu udima wada kudikira?” Wikammenya hata ndeweremnekieghe zawadi ringi. Ela Sauli uo ukakaia na sere.