1 SAMUELI 1 - Biblia Ilagho Jiboie Kwa Wandu Wose

Elkana na wandu wake kughenda Shilo

¹ Korekoghe na mndumu uwangwaghwa Elkana, wa kichuku cha Efraimu, mundu wa isanga ja mighondinyi ja Efraimu, orekoghe ukikaia muzi ghwa Rama; nao ni mwana wa Jerohamu wawae Elihu mwana wa Tohu wawae Zufu.

² Orekoghe na waka wawi, nawo ni Hana na Penina. Penina orekoghe na wana, ela Hana nderekoghe na wana wangi.

³ Elkana orekoghe ukijoka Shilo kufuma mzinyi kwake kula mwaka, upate kumtasa BWANA wa majeshi, na kumfunyira kizongona andu wakohani wa BWANA, waja wana wawi wa Eli, Hofni na Finehasi werekoghe.

⁴ Ituku Elkana wafunya kizongona, orekoghe ukimmbaghia mkake Penina na wana wake wose wa womi na wa waka mafungu ghawo;

⁵ na Hana, hata ngera oremkundieghe, orekoghe ukimneka ifungu jimweri; kwa kukaia BWANA orekoghe wamfunga kifu chake useve wana.

⁶ Penina ukakaia ukisimana nao, ukimsua na kumjisha wasi; angu BWANA oremfungieghe useve wana.

⁷ Ilagho ijo jikakaia jikibonyeka mwaka hata mwaka; iji werekoghe wikijoka nyumbenyi kwa BWANA, Penina ukakaia ukimnyonyora Hana ngolo, hata ukakaia ukilila na kulemwa ni vindo.

⁸ Niko mumi wake Elkana ukamzera, “Wele Hana, kuliliaki? Kwaki kusejagha vindo? Ni wasi ghwa indoki kuko nagho ngolonyi kwako? Welee, ini sifwane kwako kuchumba wana wa womi ikumi anguwada?”

Hana na Eli

⁹ Hata iji wameria kuja na kunywa aho Shilo, Hana ukawuka. Na uja mkohani Eli orekoghe wasea kidombo kifumbinyi mbai na mbai ya mnyango ghwa Hekalu ya BWANA.

¹⁰ Hana orekoghe ukiwawa nandighi, ukalomba kwa BWANA ukilila na luwawo lubaa.

¹¹ Ukabonya ighemi ukighamba, “Ee BWANA wa majeshi, ngera loli kwadakumbuka na kughuzighana wasi ghwapo, hata kuseniliwe ini mdumiki wako, nao kunineke mwana wa womi, niko na ini nichamfunya na kukuneka oho BWANA matuku ghose gha irangi jake, nao ndechaarwa na shembe chongonyi kwake anduangi.”

¹² Hata iji Hana orekoghe ukimlomba BWANA, Eli ukakaia ukiizighana memu yake.

¹³ Hana orekoghe ukilomba ngolonyi kwake, ela memu yake erekoghe ikinyavura lwaka lwake lusesikirikagha; kwa huwo Eli ukamririkanya kukaia muka mmbongeri.

¹⁴ Niko Eli ukamzera, “Kudua mmbongeri hata lii? Tana na chofi yako.”

¹⁵ Ela Hana ukatumbulia, “Ii hata bwana wapo, ini ne muka niko na wasi m'baa; sinyue divei hata chofi anduangi, ela nedeeka ngimneka BWANA wasi ghwa ngolo yapo.

¹⁶ Kusakenigheshera ini mdumiki wako kukaia muka wa kisha kisha, kwa kukaia kufuma aho nedeeka ngilomba malagho gha bea yapo niko na kusirimika kubaa.”

¹⁷ Nao Eli ukaghamba, “Ghenda na sere, na uo Mlungu wa Israeli ndekuneke malombi ghako agho kwamlomba.”

¹⁸ Hana ukatumbulia, “Nalomba nirumirikie mesonyi kwako ini mdumiki wako.” Nao uo muka ukafuma ukaghenda chia yake hata nderewonekieghe kukaia na wasi ghungi sena anduangi.

Kuvalwa na kuwikwa wakfu kwa Samueli

¹⁹ Ituku ja kawi, Elkana na wandu wake wikawuka kokesho kio, wikamtasa BWANA na kuwuya cha mzinyi kwawo Rama. Nao ukammanya mkake Hana, na BWANA ukakumbuka malombi gha uo muka;

²⁰ ukapata kifu kwa ngelo yaro, nao ukava mwana wa womi, ukammbanga irina jake Samueli, angu oreghambieghe, “Uhu neemlomba kwa BWANA.”

²¹ Nao uo mundu Elkana na wandu wake wose wikajoka sena kufunya kizongona cha kula mwaka, na kulipa malipo gha ighemi jake.

²² Ela Hana nderejokieghe, angu oremzerieghe mumi wake, “Ngameria kumfunya umwana mariwa, niko nichaamghenja na kummbika imbiri ya BWANA, upate kukaia aho toe.”

²³ Mumi wake Elkana ukatumbulia, “Bonya sa iji koni kwawona nicha kumoni, weseria hata kwamfunya mwana mariwa; BWANA ndejikatishe ilagho jake.” Kwa huwo Hana ukasigharika mzinyi ukimlela mwana wake, hata ukameria kumsighisha mariwa.

²⁴ Uendamsighisha mariwa, ukamghenja Shilo, ukidwa njau ya miaka idadu, na kilo imweri ya mufu, na kiriba cha mrongo chichue divei; ukamreda uo mwana mtini nyumbenyi kwa BWANA, aho Shilo.

²⁵ Wikaibwagha ija njau na kumghenja uo mwana kwa Eli.

²⁶ Nao Hana ukaghamba, “Ee bwana wapo, sa iji koni kukaiagha moyo bwana wapo, ini ne uja muka nerekaieghe kimusi aha imbiri kwako ngimlomba BWANA;

²⁷ nedeeka ngimlomba umwana, na BWANA ukanitumbulia ilombi japo.

²⁸ Kwa huwo na ini namfunya kwa BWANA matuku ghake ghose uchaakaia moyo uchakaia wa BWANA.” Nawo wikamtasa BWANA aho.