1 PETRO 5 - Biblia Ilagho Jiboie Kwa Wandu WoseChagha cha Mlungu 1 Kwa wundu ugho, nawivoya waghosi wiko aghadi konyu, ini moni niko mghosi sa awo weni, na mshahidi wa matiriro gha Kristo, na mngara wa ghuja wubaa ghuchaafunukulwa. 2 Lishenyi chagha cha Mlungu chiko aisi ya wuzighaniri ghonyu. Si kwa kufungishwa ndighi anduangi, ela kwa kukunda; si kwa kulola fwaida isefwane, ela kwa ngolo ielie; 3 si sa wandu m'bonyagha nguma aighu ya awo wiko aisi yenyu, ela mkaie fwana kwa chagha. 4 Na iji Mlisha M'baa wa ng'ondi wawoneka, mchapata kirumbu cha wubaa chisesiagha anduangi. 5 Wokoni na inyo muko watini mkuwike aisi ya waghosi. Inyo mmbose mkaie na wumboa kula mundu na mmbao; angu, “Mlungu wawitangala wang'eti, ela wawineka mvono awo wiko na wumboa.” 6 Kwa huwo mkusere aisi ya mkonu ghwa Mlungu ghuko na kudima, eri upate kumjosa kwa ngelo yaro. 7 Mumkumbie uo wasi ghonyu ghose, angu wawuyamtala inyo. 8 Kaienyi na akili mchereshe. M'maiza onyu, uo Ibilisi, waawuyamara-mara sa shimba irurumagha ikimlola mndungi ipate kumja. 9 Mangenyi andenyi ya irumirio jenyu, mumtangale, mkimanya angu matiriro muko nagho, nigho gheni ghawuyakaia kwa wanyinyu wiko wurumwengunyi. 10 Nenyo, nyuma ya kutirirwa kwa ngelo ndini, uo Mlungu wa mvono ghose, ummbangie kwa wubaa ghwake ghwa kala na kala andenyi ya Kristo, uchamkatisha moni, na kummangisha, na kumneka ndighi. 11 Kwake uo, ndekukaie kuja kubonya nguma kwa kala na kala. Amen. Voro ra kutua 12 Namwandikia kwa wuvui, ngiteselwa ni Silvano, uo nimtalagha kukaia mwanidu mloli; ngimshashira na kummanyisha angu ughu nigho mvono ghwa loli ghwa Mlungu: mangenyi gi andenyi yaro. 13 Ijo ikanisa jiko Babuloni, jeresaghuloghe sa inyo, jamroghua; na mwanwapo Marko huwo koni wamroghua. 14 Roghuanenyi mmbeni na mmbeni kwa msusugho ghwa lukundo. Sere ndeikaie konyu mmbose muko andenyi ya Kristo. |