1 PETRO 4 - Biblia Ilagho Jiboie Kwa Wandu Wose

Kughaluka kwa marangi

¹ Kwa kukaia Kristo orepatireghe matiriro mumbinyi, nenyo mmbeni mkurushe maswagha gha nia iyo cheni; angu uo ose upatire matiriro gha mumbi, wamerie kusighana na kaung'a,

² eri kwa irangi jisigharikie, mseduo moyo kwa kunugha bea ra kidamu, ela mnughe lukundo lwa Mlungu.

³ Iyo ngelo iidie yakata ebonya seji awo wandu wa mbari zima wikundagha kubonya, wikighenda na irangi ja kulaka, bea rizamie, kuwongia, kubonya maseko, lwafuo, na kutasa milimu kuzamie na ndighi.

⁴ Awo wandu, waawuyashinika seji msewuenughana nawo andenyi ya iro maza ra kulaghasha, nawo wiamdukana;

⁵ ela wichafunya mtalo kwa Mlungu, uo uko tayari kuwitanya awo wiko moyo na awo wifue.

⁶ Na ihi niyo sababu ijo Ilagho Jiboie jiendechilwa hata kwa wandu wifue, eri hata ngera weretanyiroghe ingelo werekoghe mumbinyi sa wandu, wipate kukaia moyo kwa roho sa Mlungu.

Wazighaniri wecha wa manosi gha Mlungu

⁷ Uko kutua kwa maza rose kwalighisa; kwa huwo kaienyi na akili na kukumazira eri mpate kulomba Mlungu.

⁸ Na aighu ya rose, mduo na lukundo mmbeni na mmbeni lusesiagha, kwa kukaia lukundo lwafinikira wungi ghwa kaung'a.

⁹ Mkuzaisire kukaribishana mmbeni na mmbeni kuseko na mazughunuko.

¹⁰ Kula mundu ndetumie ijo inosi orejipatireghe kwa wundu ghwa fwaida ya mmbao, sa mzighaniri mucha wa mvono mzima-mzima ghwa Mlungu.

¹¹ Uo ose ughoragha, ndeghore sa mundu udedagha malagho gha Mlungu; na uo ose udumikagha, ndekaie sa mundu udumikagha kwa ndighi unekwagha ni Mlungu; eri Mlungu upate kukaswa kwa chia ya Jesu Kristo. Kwake uo, ghoko wubaa, na kubonya nguma kwa kala na kala. Amen.

Kutirirwa kwa kukaia Mkristo

¹² Wakundwa, msakeshinulwa ni agho matimo ghibirie ghawuyamchea kumtima, seji kuamba ni malagho gha kighenyi ghawuyabonyeka konyu.

¹³ Ela boilonyi kwa kukaia mwakaia wangara wa matiriro gha Kristo; eri mpate kuboilwa na kuzuma ngelo ya kufunukulwa kwa wubaa ghwake.

¹⁴ Mkadedelwa kiwiwi kwa wundu ghwa irina ja Kristo, mwarasimilwa; angu uo Roho wa wubaa, na wa Mlungu oko aighu konyu.

¹⁵ Ela mndungi onyu usetiriro kwa kukaia m'bwaghi-wandu, angu kitoi, angu m'bonyi kiwiwi, angu m'bonyi sheshe.

¹⁶ Ela mundu ukatirirwa kwa kukaia Mkristo, usefo waya; ela umkase Mlungu kwa irina ijo.

¹⁷ Angu ngelo yavika kutanywa kuzoe, nako kuazoya kwa wandu wa Mlungu weni; na ikakaia kwazoya nesi, kutua kwaro wandu wisesikiragha ijo Ilagho Jiboie ja Mlungu-lee, kuchakaia wada?

¹⁸ Na sena seji iandikilo, “Ikakaia mundu wa hachi uakia kwa wasi, uo mundu usemuobuagha Mlungu na mkaung'a wichawoneka hao?”

¹⁹ Kwa huwo, awo wandu witirirwagha kunughana na lukundo lwa Mlungu, ndewibonye nicha, na kuwika roho rawo mikonunyi kwake uo Muumbi mloli.