1 PETRO 3 - Biblia Ilagho Jiboie Kwa Wandu Wose

Waka na womi wawo

¹ Huwo koni inyo waka, mkuwike aisi ya womi wenyu; eri ngera weko wangi wisewuejisikira ijo ilagho ja Mlungu, wirudo kuseko na kujighora ijo ilagho;

² wikiriwona iro tabia renyu ra ishima na wueli.

³ Kukupamba konyu kusekaie kuja kwa shighadi koluka maridia, mapambo gha dhahabu, na kurwa nguwo rideghedekie;

⁴ ela kukaie kwa mundu uvisikie wa ngolonyi, uko na lulu isenonekagha ya roho ya wumboa, ihorie; nayo yawadie zoghori mbaa imbiri ya Mlungu.

⁵ Huwo niko waja waka wielie wa kala awo weremsuwirieghe Mlungu, werekoghe wikikupamba; nawo werekuwikieghe aisi ya womi wawo,

⁶ seji Sara orekoghe ukimsikira Abrahamu ukimmbanga bwana. Nenyo idana moko wana wake, ikakaia mwawuyabonya nicha mseobuagha kindo chingi.

⁷ Huwo koni inyo womi, mkaie na waka wenyu kwa wumboa; mkim'bonyera ishima muka, uo sa mundu uko mnyonge; kwa kukaia moko wangara wa ifwa ja mvono ghwa irangi, malombi ghenyu ghisecheghirilwa.

Matiriro kwa kubonya nicha

⁸ Kutua, inyo mmbose mkaie na wumweri ghwa roho, wughoma, lukundo lwa wanidu, ngolo inyoshere, na nia ya kukusera.

⁹ Msakelipiana kiwiwi kwa kiwiwi, angu masholio kwa masholio; ela wulalo ghwa agho, mrasimie; angu morewangiloghe mpate irasimio.

¹⁰ Angu, “Uo ujikundagha irangi na kukunda kuwona nicha, ulindie lumi lwake lusedede kiwiwi, na momu ghwake ghuseghore wukalo ghungi.

¹¹ Ndetane na kiwiwi, ubonye nicha; ndelole sere, na kuinugha na iseghe.

¹² Angu Bwana wadawizighana wandu wa hachi, nao wadasikira malombi ghawo. Ela Bwana ndewizighanagha awo wibonyagha kiwiwi.”

¹³ Idana nani udimagha kum'bonya kiwiwi, ikakaia inyo mwawuyafunga ndighi kwa kubonya nicha?

¹⁴ Ela hata ngera mwatirirwa kwa wundu ghwa hachi, mcharasimilwa. Msakewiobua, hata msakejawasi;

¹⁵ ela mumneke ishima Kristo ngolonyi konyu ukaie Bwana. Mkaie tayari ngelo rose, kumtumbulia mundu uo ose uchaamkotia malagho gha isuwirio muko najo andenyi konyu; ela tumbulienyi kwa wumboa na ishima,

¹⁶ mkikaia na nia ielie, eri iji mwadukanwa, awo wisholiagha tabia renyu riboie andenyi ya Kristo, wipate kufwa waya.

¹⁷ Angu ni nicha kutirirwa kwa kubonya nicha, ikakaia nilo lukundo lwa Mlungu; kuchumba kutirirwa kwa kubonya mawiwi.

¹⁸ Angu Kristo wori orefueghe kwa wundu ghwa kaung'a indo jimweri tua; mundu wa hachi, kwa wundu ghwa wandu wiseko na hachi; eri upate kudireda kwa Mlungu; mumbi ghukabwaghwa, ela roho ikakaishwa moyo.

¹⁹ Na kwa iyo, oreghendieghe ukarichilia roho rerekoghe kifungonyi,

²⁰ iro rereleghieghe kusikira aho imbiri, iji Mlungu orekoghe ukiwesera kwa kurumaghia ngelo Nuhu orekoghe ukiagha safina; andenyi yaro, wandu watini, nawo ni wandu wunyanya, werekiriloghe machinyi.

²¹ Ilagho ijo, jafwanana na wubaputizo ghwa idana ghumkiragha inyo; si sa kuja kuinja wuchafu ghwa mumbi anduangi, ela ni kuja kubonya malaghiro kwa Mlungu kwa nia ielie, kwa chia ya kuruka kwake Jesu Kristo;

²² uo umerie kughenda mlungunyi, nao oko chia ya mkonu ghwa kiwomi ghwa Mlungu; ukiwibonyera nguma weke malaika, na awo wibonyagha nguma na kudima.