1 PETRO 1 - Biblia Ilagho Jiboie Kwa Wandu Wose

¹ Ini Petro mdumi wa Jesu Kristo, nawiandikia awo wiwingilo na kusaghisika masanga gha Ponto, Galatia, Kapadokia, Asia, na Bithunia.

² Wandu wisaghulo na kuwikwa ni Mlungu uja Aba, na kueleshwa ni uo Roho, wipate kumsikira Jesu Kristo, na kueleshwa kwa bagha yake. Mvono na sere nderichurikie konyu.

Isuwirio jiko moyo

³ Mlungu ndekaso, uo Ndee Bwana odu Jesu Kristo. Kwa wughoma ghwake m'baa, isi derevaloghe wuwishi, dipate kukaia na isuwirio jiko moyo kwa chia ya uko kuruka kwa Jesu Kristo kufuma kwa wafu;

⁴ na kupata ifwa jisenonekagha, jiselushiro, jisesiagha, jiwikilo mlungunyi kwa wundu ghonyu

⁵ inyo mlindilwagha ni ndighi ra Mlungu, kwa chia ya irumirio; mpate kuvikia kukia kuko tayari kufunukulwa ngelo ya kutua.

⁶ Inyo mwaboilwa andenyi ya maza iri, hata ngera idana kwa ngelo vui, yadimika mtiriro kwa matimo mazima mazima,

⁷ eri wuloli ghwa irumirio jenyu jiko ja zoghori mbaa kuchumba dhahabu, iyo hata ngera ni etota, yadatimwa kwa modo; jipate kumredia kukaswa, na wubaa, na ishima, ngelo ya kufunukulwa kwa Jesu Kristo.

⁸ Inyo mwamkunde, hata ngera ndemumbonie; nenyo hata ngera ndemuwuemmbona idana, mwamrumiria kwa kuboilwa kubaa kuseghorekagha.

⁹ Na ijo irumirio jenyu, jiampatira kukia kwa roho renyu.

¹⁰ Awo walodi werelodieghe malagho gha ugho mvono ghochaakaia ghonyu, werelolieghe na kukotia-kotia malagho gha kukia uku.

¹¹ Wikakotia ngera ni mnduki, angu ni ngelo iao erewonyeroghe ni Roho wa Kristo orekoghe andenyi kwawo, iji werezoeghe kuwona uko kutirirwa kwa Kristo, na ugho wubaa ghuchaanugha nyuma.

¹² Nawo wikafunukuilwa angu ndewerekoghe wikikudumikia weni; ela ni inyo, kwa iro maza rimerie kuereshwa konyu ni awo weremchilieghe Ilagho Jiboie, kwa chia ya Roho Mweli uo oredumiloghe kufuma mlungunyi; na iro maza, weke malaika wakunda nandighi kurizighana.

Kuwangwa kwa kudua andenyi ya irangi jielie

¹³ Kwa huwu mkaie na nia riko tayari kubonya malagho. Mkaie na akili nicha, mkighusuwiria ghuja mvono ghuchaamchea ngelo ya kufunukulwa kwa Jesu Kristo.

¹⁴ Sa wana wisikiragha, msakekufwananisha na bea ra imbiri ra kusowa kumanya konyu.

¹⁵ Ela sa iji koni uo ummbangie uko uelie, nenyo wori mkaie muelie kwa tabia renyu rose;

¹⁶ kwa kukaia yaandikilo, “Mchakaia muelie, angu ini nielie.”

¹⁷ Na ikakaia mumlombagha Mlungu sa Aba, uo uwitanyagha wandu kula umu karakara na mabonyo ghake kuseko kutala mndungi, tumienyi ngelo yenyu isigharikie ekaia aha wughenyinyi kwa kumuobua.

¹⁸ Angu mwamanya morekombologhe kufuma kwa iro chia renyu ra wuduu ra kala, iro moreriwadieghe kufuma kwa weke ndeyo; si kwa vilambo vinonekagha sa feza angu dhahabu anduangi,

¹⁹ ela kwa bagha ya zoghori mbaa ya Kristo, sa ya mwana wa ng'ondi usewadie ikosa hata iboli jingi.

²⁰ Nao oresaghuloghe imbiri wurumwengu ghuseumbilo, ela oochawoneka worinyi ngelo ra kutua kwa wundu ghonyu.

²¹ Kwa chia yake uo, moko na irumirio kwa Mlungu, uo oremrukishireghe kufuma kwa wafu, na kumneka wubaa; eri irumirio jenyu, na isuwirio jenyu, jikaie kwa Mlungu.

²² Kwa kukaia mwamerie kujielesha irangi jenyu kwa kuisikira ija loli, na kupata lukundo lwa loli lowikunda wanidu, fungenyi ndighi kukundana mmbeni na mmbeni kwa ngolo.

²³ Mwamerie kuvalwa wuwishi, kwa chia ya ilagho ja Mlungu jiko moyo; si kwa mbeu iwoagha, ela kwa iyo isewoagha anduangi.

²⁴ Angu, “Mimbi yose ni sa nyasi, na wubaa ghwaro ghose ni sa mboi ya nyasi; nyasi radanyaya, na mboi raro radapotoka.

²⁵ Ela ilagho ja Bwana, jadadua kwa kala na kala.” Ijo ilagho, ni jija Ilagho Jiboie morechililoghe.