1 JOHANE 5 - Biblia Ilagho Jiboie Kwa Wandu Wose

Kughusima wurumwengu

¹ Kula mundu urumiriagha kukaia Jesu ni Kristo, ni mwana wa Mlungu; na kula mundu umkundagha muvi wadamkunda na mwana wori.

² Kwa ilagho iji damanya angu dawikunde wana wa Mlungu, iji damkunda Mlungu, na kuikatisha memu yake.

³ Angu ulu nilo lukundo lwa Mlungu, kukaia diiwadie memu yake. Na memu yake ndeikurie anduangi.

⁴ Kwa kukaia uo uvalo ni Mlungu, wadaghusima wurumwengu; nesi daghusima wurumwengu kwa chia ya irumirio jedu.

⁵ Nao nani udimagha kughusima wurumwengu, iseeka ni uo urumiriagha kukaia Jesu ni Mwana wa Mlungu?

Wushuhuda aighu ya Jesu Kristo

⁶ Jesu Kristo nuo orechieghe kwa machi na bagha; hata si kwa machi gheni ghiekeri anduangi, ela kwa machi na bagha.

⁷ Na Roho ni mshahidi, kwa kukaia Roho nuo loli.

⁸ Weko washahidi wadadu: Uja Roho, ghaja machi, na ija bagha; na awo wadadu, warumiriana.

⁹ Ikakaia daghurumiria wushuhuda ghwa wadamu, wushuhuda ghwa Mlungu ni m'baa kuchumba. Na ughu nigho wushuhuda ghwa Mlungu, kukaia, wamshuhudie Mwana wake.

¹⁰ Uo urumiriagha kwa Mwana wa Mlungu, oko na ugho wushuhuda andenyi kwake; ela uo usemrumiriagha Mlungu, wam'boya uo kukaia mtee; kwa kukaia ndeghurumirie ugho wushuhuda Mlungu oremshuhudieghe Mwana wake.

¹¹ Na ughu nigho wushuhuda, kukaia, Mlungu wadinekie irangi ja kala na kala; na ijo irangi jeko andenyi ya Mwana wake.

¹² Uo uko na uja Mwana, oko na irangi; uo useko na uja Mwana wa Mlungu, ndewadie irangi anduangi.

Irangi ja kala na kala

¹³ Namwandikia malagho agha, inyo mrumiriagha kwa irina ja Mwana wa Mlungu, eri mpate kumanya angu moko na irangi ja kala na kala.

¹⁴ Nesi deko na wuwana ughu andenyi kwake, kukaia, dikalomba kindo chingi karakara na lukundo lwake, wadisikira.

¹⁵ Angu diichi kukaia wadisikiragha kwa ijo jose dimlombagha, damanya angu dameria kupata agho dimlombie.

¹⁶ Mndungi ukammbona mruna ukibonya kaung'a iseko ya kifwa, uchalomba, na Mlungu uchamneka irangi uo ubonyere kaung'a iseko ya kifwa. Eko kaung'a ya kifwa; nani sighambagha wei mundu ulombe kwa iyo.

¹⁷ Mabonyo ghose ghiseko hachi ni kaung'a, ela eko kaung'a iseko ya kifwa.

¹⁸ Isi damanya angu mndungi uvalo ni Mlungu ndebonyagha kaung'a, kwa kukaia Mwana wa Mlungu wadamlindia; na Uja Mmbiwi ndem'bonyagha ilagho jingi anduangi.

¹⁹ Isi damanya angu de wa Mlungu, na wurumwengu ghose ghwadakaia aisi ya Uja Mmbiwi.

²⁰ Nesi damanya angu Mwana wa Mlungu wamerie kucha, na kudineka kutambukilwa, dipate kummanya Mlungu wa loli; nesi deko andenyi kwake uo Mlungu wa loli, andenyi ya Mwana wake Jesu Kristo. Uhu nuo Mlungu wa loli, na irangi ja kala na kala.

²¹ Wanake watini, mkulindie na milimu.