1 JOHANE 4 - Biblia Ilagho Jiboie Kwa Wandu Wose

Roho wa loli na wa tee

¹ Wakundwa, msakeirumiria kula Roho, ela muritime-time iro roho, mpate kuwona ngera ni ra Mlungu; angu walodi wa tee wengi wafumirikie, na kuwoneka wurumwengunyi.

² Inyo muchammanya Roho wa Mlungu kwa chia ihi: kula roho irumiriagha angu Jesu Kristo orechieghe ukawuya mdamu, ni ya Mlungu,

³ na kula roho isemrumiriagha Jesu si ya Mlungu anduangi. Iyo ni roho ya M'maiza wa Kristo, iyo moresikireghe angu iacha, na idana eko wurumwengunyi.

⁴ Wanake watini, inyo mo wa Mlungu, nenyo mwawisimie awo walodi wa tee, angu uo Roho uko andenyi konyu, ni m'baa kuchumba uo roho uko wurumwengunyi.

⁵ Awo ni wa wurumwengu, na agho wighoragha ni gha wurumwengu, na wurumwengu ghwadawisikira.

⁶ Isi de wa Mlungu. Uo ose ummanyagha Mlungu wadadisikira; na uo useko wa Mlungu ndeudisikiragha. Kwa chia ihi dammanya uo Roho wa loli, na uo roho wa tee.

Mlungu ni lukundo

⁷ Wakundwa, dikundane diweni na diweni, angu lukundo lwafuma kwa Mlungu; na uo uko na lukundo oovalwa ni Mlungu nao wamwichi Mlungu.

⁸ Uo usene lukundo, ndemwichi Mlungu, angu Mlungu ni lukundo.

⁹ Kwa chia ihi, lukundo lwa Mlungu lorewonekieghe worinyi aghadi kodu; kukaia, Mlungu oremdumieghe Mwana wake wa ititi wurumwengunyi, eri dipate kukaia moyo kwa chia yake uo.

¹⁰ Ulu nilo lukundo, si angu wei deremkundieghe Mlungu, ela uo nuo oredikundieghe, hata ukamduma Mwana wake upate kukaia wushano kwa wundu ghwa kaung'a redu.

¹¹ Wakundwa, ikakaia Mlungu oredikundieghe huwo, yadifwana na isi dikundane diweni na diweni.

¹² Ndekuwadie mndungi ummbonie Mlungu jingi; dikakundana diweni na diweni, Mlungu uchakaia andenyi kodu, na lukundo lwake luchakatia andenyi kodu.

¹³ Damanya angu isi deko andenyi ya Mlungu, nao moni oko andenyi kodu; kwa kukaia wadinekie Roho wake.

¹⁴ Nesi dawonie, sena dashuhudia, angu uja Aba oremdumieghe Mwana wake ukaie Mkiri wa wurumwengu.

¹⁵ Uo ose urumiriagha kukaia Jesu ni Mwana wa Mlungu, Mlungu wadakaia andenyi kwake, na uo wadakaia andenyi ya Mlungu.

¹⁶ Kwa wundu ugho daichi na kurumiria ulo lukundo Mlungu udikunde nalo. Mlungu ni lukundo, na uo ukaiagha andenyi ya lukundo, wadakaia andenyi ya Mlungu, na Mlungu wadakaia andenyi kwake.

¹⁷ Kwa ilagho iji, ulo lukundo lwa Mlungu lwakatishwa andenyi kodu, eri dipate kukaia na wuwana ijo Ituku ja Kutanywa; angu sa iji koni Kristo uko, niko koni na isi dikaiagha wurumwengunyi.

¹⁸ Andu lukundo luko, wowa ndeghuko; ela lukundo lukatie lwadainja wowa. Mundu uko na wowa, ndewadie lukundo lukate, angu adhabu yadaobolwa; na uo uobuagha, ndekatie kwa lukundo anduangi.

¹⁹ Deko na lukundo, angu Mlungu orezoeghe ukadikunda.

²⁰ Mndungi ukaghamba “Namkunde Mlungu,” nao uazamilwa ni mruna, mundu uo ni mtee. Angu uo uzamilwagha ni mruna ummbonagha, ndedimagha kumkunda Mlungu usemmbonagha anduangi.

²¹ Nesi dawadie momu ughu ghufumagha kwake, kukaia uo umkundagha Mlungu, yamfwana umkunde na mruna wori.