1 JOHANE 2 - Biblia Ilagho Jiboie Kwa Wandu Wose

Kristo, Mtesia odu

¹ Wana wapo watini, namuandikia agha eri msebonye kaung'a; ela ngera mndungi wabonya kaung'a, deko na mdederii kwa uja Aba, Jesu Kristo uja Mhachi,

² nao nuo wushano ghwa kaung'a redu; hata si kwa wundu ghwa kaung'a redu reni riekeri anduangi, ela na ra wurumwengu ghose wori.

³ Huwu niko didimagha kukaia na wuloli kukaia damwichi Mlungu, iji daiwadia memu yake.

⁴ Mndungi ukaghamba wei wamwichi, nao ndeisikiragha memu yake, ni mtee; na ija loli ndeiko andenyi kwake anduangi.

⁵ Ela uo ose ujiwadiagha ilagho jake, lukundo lwa Mlungu lwamerie kukatia andenyi kwake loli. Kwa chia ihi, dadima kukaia na wuloli angu deko andenyi kwake.

⁶ Uo ughambagha wei wadakaia andenyi ya Mlungu, yamfwana kughenda seji koni Jesu Kristo oreghendieghe.

Ugho momu mmbishi

⁷ Wakundwa wapo, ughu momu nimuandikiagha si mmbishi anduangi; ela ni momu ughoni ghwa kala morekoghe nagho kufuma kuzoya; nagho ni ijo ilagho morejisikireghe.

⁸ Ela sena namwandikia momu mmbishi ugho ghuko ghwa loli andenyi kwake, na andenyi konyu wori; kwa kukaia kira chaawuyaida, na mwengere ghwa loli ghwaawuyang'ala-ng'ala.

⁹ Umundu ughambagha oko mwengerenyi, nao uazamilwa ni mruna, waduagha kirenyi.

¹⁰ Uo umkundagha mruna, wadakaia andenyi ya ugho mwengere, na andenyi kwake, ndekuwadie kikuwaro chingi anduangi.

¹¹ Ela uo uzamilwaghwa ni mruna, wadakaia kirenyi, nao wadaghenda kirenyi, hata ndemanyagha andu ughendagha, angu kira chamerie kum'bwagha meso.

¹² Namuandikia inyo wanake watini, kwa kukaia mwamerie kufuilwa wughoma kaung'a renyu kwa wundu ghwa Kristo.

¹³ Namuandikia inyo weke aba, kwa kukaia mwamwichi uo orekoghe kufuma kuzoya. Namuandikia inyo wadawana, kwa kukaia mwamsimie Uja Mmbiwi. Namuandikia inyo wanake, kwa kukaia mwamwichi uja Aba.

¹⁴ Namuandikia inyo weke aba, kwa kukaia mwamwichi uo orekoghe kufuma kuzoya. Namuandikia inyo wadawana, kwa kukaia moko na ndighi, na ilagho ja Mlungu jadakaia andenyi konyu, nenyo mwamsimie Uja Mmbiwi.

¹⁵ Msakeghukunda wurumwengu, hata vilambo va wurumwengu; ngera mndungi waghukunda wurumwengu, kumkunda uja Aba ndekuko andenyi kwake anduangi.

¹⁶ Angu iro maza rose riko wurumwengunyi, bea ra mumbi, bea ra meso, na kukujosa kwa irangi, ndevifumagha kwa uja Aba anduangi, ela vadafuma wurumwengunyi.

¹⁷ Na wurumwengu ghuaida andwamweri na bea raro; ela uo ubonyagha lukundo lwa Mlungu uadua kwa kala.

M'maiza wa Kristo

¹⁸ Wanake, ni ngelo ya kutua; na seji koni msikire kukaia M'maiza wa Kristo uchacha, ni huwo koni idana wamaiza wa Kristo wengi wamerie kucha; niko isi damanya angu ni ngelo ya kutua.

¹⁹ Awo wandu werefumieghe kodu, ela ndewerekoghe wa kedu anduangi; ngera wedeeka wa kedu, kumangu waduanyagha nesi. Ela werefumieghe, eri wipate kuwoneka worinyi kukaia awo wose si wa kedu anduangi.

²⁰ Idana inyo mwamerie kuwikwa wakfu kwa kunekwa Roho Mweli ni Kristo, nenyo mwaichi maza rose.

²¹ Namuandikia, si angu wei ndemwichi iyo loli, ela ni kwa kukaia mwaiichi; nenyo mwamanya ndekuwadie tee ingi ifumagha kwa iyo loli anduangi.

²² Uo uko mtee nani, useeka ni uja mundu ukanagha kukaia Jesu ni Kristo? Mundu uo ni M'maiza wa Kristo, uo umkanagha uja Aba na uja Mwana.

²³ Ndekuwadie mndungi umkanagha uja Mwana, ima sena ukaie na uja Aba; uo ose umrumiriagha uja Mwana, oko na uja Aba wori.

²⁴ Sighenyi agho malagho moreghisikireghe kufuma imbiri ghikaie andenyi konyu. Kwa kukaia agho malagho ghikakaia andenyi konyu, niko inyo mchaakaia andenyi ya uja Mwana na andenyi ya uja Aba.

²⁵ Na ilaghiro jake udilaghirie ni irangi ja kala na kala.

²⁶ Namuandikia agha malagho aighu ya awo wandu wikundagha kumlaghasha.

²⁷ Ela inyo mwaduagha mmbikilo wakfu kwa kunekwa Roho Mweli, hata ndemne haja efundishwa ni mndungi; angu uo Roho Mweli mnekelo, wawuyamfundisha maza rose; nao ni wa loli, hata ndeghoragha tee anduangi; nenyo kaienyi andenyi kwake Kristo, sa iji koni umfundishire.

²⁸ Na idana wanake watini, kaienyi andenyi ya Kristo; eri iji wawoneka, dikaie na wuwana, hata disakewuya nanyuma kwa waya ngelo ya kucha kwake.

²⁹ Ikakaia mwaichi angu Kristo ni mhachi, mwadima kukaia na wuloli kukaia kula mundu ubonyagha hachi oovalwa ni Mlungu.