1 JOHANE 1 - Biblia Ilagho Jiboie Kwa Wandu Wose

Ijo Ilagho ja Irangi

¹ Agho malagho gherekoghe kufuma kuzoenyi, agho dereghisikireghe, agho dereghiwonieghe na meso ghedu, agho dereghizighanireghe na kughiadada na mikonu yedu; gha ijo Ilagho ja Irangi.

² Irangi ijo jerewonyeroghe worinyi, nesi dajiwonie, na kujishuhudia; najo damchilia inyo, ijo irangi ja kala na kala, jerekoghe andwamweri na uja Aba, na kuwoneka worinyi kodu.

³ Ijo Ilagho dijiwonie na kujisikira, damchilia inyo wori, eri mpate kukaia na wungara nesi. Na wungara ghodu, ni andwamweri na uja Aba, na Mwana wake Jesu Kristo.

⁴ Na idana daandika agha, eri kuboilwa kodu kupate kukatia.

Mlungu ni mwengere

⁵ Agha nigho malagho dereghisikireghe kufuma kwa Mwana wake; nesi damchilia inyo kukaia, Mlungu ni mwengere, na andenyi kwake ndekuwadie kira chingi anduangi.

⁶ Dikaghamba wei deko na wungara nao, sena diaghenda kirenyi, diaghora tee; hata ndediwadie iyo loli andenyi kodu anduangi.

⁷ Ela dikaghenda na mwengere, sa iji koni uo uko mwengerenyi, dichakaia na wungara diweni na diweni, na bagha ya Jesu Mwana wake, iadioghoshagha kaung'a rose.

⁸ Dikaghamba wei ndediwadie kaung'a ingi, diakukalia diweni, na iyo loli ndeiko andenyi kodu anduangi.

⁹ Dikarumiria kaung'a redu, Mlungu ni mloli na mhachi; nao uchadifuya wughoma kaung'a redu, na kudielesha wuwiwi ghodu ghose.

¹⁰ Dikaghamba angu ndedibonyere kaung'a ingi, diam'bonya Mlungu kukaia mtee; na ilagho jake ndejiko andenyi kodu anduangi.