Жугьдариз 9 - Гирами Китаб

Сабпи Йикьрарнаъ Аллагьдиз фици икрам апӀуруш

¹ Сабпи Йикьрарнаъ Аллагьдиз фици икрам апӀуруш ва жилиин гирами йишв фунуб вуш, улупна.

² Гирами Чадур гъапӀнийи. Душван сабпи хулаъ акв апӀру алат ва Гьаммишанурин улихь дивру уьлер али устул дивнайи – му йишваз „Гирамишв“ кӀуйи.

³ Кьюбпи хал сабпибдихьан чарчнахьди гьадабтӀнайи ва душваз „Лап Гирамишв“ кӀуйи.

⁴ Душваъ, ицци ниар хъайи ччимар ургру гъабсиб гъизилин саб алат ва варишварихъанди гъизилихьди дабалгнайи Гирами Йикьрарнан сундух айи. Сундхиъ, манна ади, гъизилин гъаб, кюкю адабшвуз кьюкьяр гъапӀу Гьарундин маргъ ва Гирами Йикьрар кайи гъвандин шибар айи.

⁵ Сундхин зиин гъаравларди дапӀнайи хлинццар кайидар алийи. Дурар адлувал улупурайидар ву. Дурарин хлинццар сундхин гъапагъ вуйибси „хил алдабгърушв“ кӀурайишвʼин гьатӀарццнайи. Хъа сабан ухьу дидкан вари хъайи-хъайиси пидархьа.

⁶ Гьамци ккабалгну дебкку вахтарихъанмина Аллагьдин гъуллугъчйир гагь-гагьнак гирами Чадрин сабпи хулаъ чпин гъуллугъ тамам апӀуз учӀври гъахьну.

⁷ Хъа кьюбпи хулаъ заан гъуллугъчийизтӀан учӀвуз ихтияр адарди гъабхьну, думура йисан саб ражари, чан ва вари халкьдин терефнаан, чпин аьгъдрувализ дилигну деетру гунгьарихъанди вуйи ифира хьади.

⁸ Гьамци вуйиган, Гирами Рюгьну сабан гьадму гирами Чадур имидикьан гагьди „Лап Гирамишвазди“ учӀврушв ачмишди даруб улупура.

⁹ Гьамдиъ а гьамусдин вахтназра кайи мисал: багъишарихьанна гъурбнарихьан Аллагьдиз икрам апӀурайирин намус-гъирʼят марцц апӀуз шлуб дар.

¹⁰ Думу къайдйир ипӀрубдизна убхърубдиз ва жара жюрейин жикӀбан аьдатаризтӀан кайидар дар. Мурар, цӀийи къайда дебккайиз кьувватнаъ гъузнайи, зиълан апӀурайи аьдатартӀан дар.

ЦӀийи Йикьрариинди Аллагьдин гъуллугънаъ фици шулуш

¹¹ Гьаму ражари ухьуз айи ужувларин заан Гъуллугъчи, Месигь, инсанарин хилари дарапӀу, гьадмугандиз айибтӀан лап заан ва тамам вуйи Чадриан, яни гьаму дюнʼяйин дарубдиантина удучӀвну.

¹² Думу душваъ кьунаринна кӀарарин ифи хьади, учӀвнадар; Думу, адмийирин гунгьарилан хил алдабгъувал гъазанмиш дапӀну, „Лап Гирамишваъ“ саб ражари ва гьаммишандиз Чан ифи хьади учӀвну.

¹³ Эгер кьунаринна жердарин ифи кибчруган ва жигьил хюни дубгну, дидкан гъабхьи рюкъ кабхьруган, чиркинвалари кацӀнайидар гьацдар аьдатариинди марцц гъахьи гьисаб апӀуйиш,

¹⁴ хъа Месигьдин Ифди фукьан ужуди марцц апӀур?! Гьаммишандин Рюгьнан кюмекниинди Дугъу Аллагьдиз Учв гьич саб тахсир ктру гъурбан вуди тувну. Ва Дугъан Ифди, ухьу чӀиви Аллагьдиз икрам апӀрудар хьузди, аьжалихъна гъахру ляхнарихьан ихь намус-гъирʼят марцц апӀуру!

¹⁵ Ари гьаддиз Месигьдилантина ЦӀийи Йикьрар, дих дапӀнайидариз тувнайи гафниинди гьаммишандиз вуйи ирс рубкьбан бадали, гъийитӀну. Дурариз думу ирс, гьеле сабпи Йикьрар кьувватнаъ имидитӀан гъапӀу чпин гунгьарилантина рубкьру аьжалихъанди Исайи Учв аьжализ тувиган, гъурубкьуб ву.

¹⁶ Эгер адмийи фукӀа дапӀнаш, васият гъапӀу адми гъакӀигантӀан думу васият чан кьувватнаъ абхъидар.

¹⁷ Васият дапӀнайир чӀивиди имбукьан гагьди, дугъан васият кьувват хъайиб дар. Васият кьувватнаъ, васият гъапӀур гъакӀиган, убчӀвра.

¹⁸ Гьаци сабпи Йикьрарра, ифи удудубзкьан гагьди, кьувватнаъ убчӀври гъабхьундар.

¹⁹ Гьадмуган Мусайи халкьдиз Къанундиъ айи табшуругъарикан ктибтбалан кьяляхъ, штук кибикьнайи кӀараринна кьунарин ифи, элвен хьана иссоп гьарин кюл гъадабгъну, Къанундин китабдикна вари халкьдик кибчру.

²⁰ Ва кӀуру: „Гирами Йикьрар худнаъ ирчрайи му ифи, Аллагьди ичв улихь, учву гьамци апӀбан бадали, дебккрайи аьдат ву“.

²¹ Дугъу гьацира гирами Чадрик ва душваъ айи Аллагьдин гъуллугъназ ишлетмиш апӀру вари алатарик ифи кибчнийи.

²² Къанунди вари ифдихьди марцц апӀуб тӀалаб апӀура ва, ифи удудубзди, хил алдабгъуб айиб дар.

²³ Аьршаринубдиз ухшар ади дапӀнайи вари жилинуб гьамциб жюрейиинди марцц дапӀну ккундийи, хъа аьршаринуб гьамрартӀан лап ужубсиб гъурбнихьдитӀан марцц дапӀну хай шулдар.

²⁴ Гьаддиз Месигь, инсанарин хилариинди дапӀнайи ва гьякь гирами Чадрин сиринтӀан дару жилин Чадриъ учӀвнадар, ваъ, Думу, Аллагьдин улихь ухьхъанди гаф кӀури, гьадму аьршариъ учӀвна.

²⁵ Думу аьршариъ, гьар йисан гьяйванатарин ифи хьади „Лап Гирамишваъ“ учӀврайи Аллагьдин заан гъуллугъчиси, гагь-гагьнак Учв гъурбан апӀуз кӀури, учӀвнадар.

²⁶ Гьамциб аьдатнахъди Месигьра гъушнийиш, Дугъаз дюнʼя арайиз гъабхихъанмина швнубсаб ражари аьзабарикк ккуркьуб алабхъидийи. Хъа Думу, Учв гъурбан дапӀну саб ражари ва гьаммишандиз гунгьихъди вуйиб ккудубкӀбан бадали, вахтарин аьхирихъна гьаммишандиз кӀури саб ражари гъафну.

²⁷ Фици гьарсар касдиз, саб ражари дукӀну, Суддин улихь дугъужвуб алабхъуруш,

²⁸ гьаци Месигьра, гизаф инсанарин гунгьарихъанди, саб ражари гъурбан гъахьну, ва Думу гьамус кьюбпи ражарира, сарун дюнʼяйин гунагь Чаина гъадабгъуз кӀури ваъ, хъа Чаз ккилигурайидар уьбхбан бадали гъиди.