Жугьдариз 7 - Гирами Китаб

Аллагьдин гъуллугъчи – Мелхиседек

¹ Гьадму Мелхиседек Салим шагьрин паччагь вуйи ва ВаритӀанзаану Аллагьдин гъуллугъчи вуйи. Дугъаз, дявйир дапӀну, паччгьариин гъалиб духьну гъюрайи Ибрагьим алахънийи ва Мелхиседекди дугъаз Аллагьдин ужувлакк ккахъриву, гъапнийи.

² Чахь хьайи варибдикан Ибрагьимди дугъаз йицӀубпи пай тувнийи. Сабпиб дугъан „Мелхиседек“ кӀуру ччвур „гьякьвалин паччагь“ кӀуру гаф ву. Хъа дугъан „Салимдин паччагь“ кӀури хъибшнайи ччвур „мясляаьтнан вая архаинвалин паччагь“ кӀуру гаф ву.

³ Дугъан адашдикан я дадайикан, дугъан ата-бабйирикан, я дугъан уьмур фици ккебгънуш ва ккудубкӀнуш мялум дар, хъа думу Аллагьдин Бализ ухшарди гьаммишандиз Аллагьдин гъуллугъчиди гъузра.

⁴ Лигай, думу фукьан зурба кас гъахьнуш. Гьеле ихь абйирин аба Ибрагьимдира кмиди дугъаз дявдиъ чав гъибису девлетнакан йицӀубпи пай тувнийи!

⁵ Къанундин бинайиин алди, Левийин насларикан Аллагьдин гъуллугънаъ гъахьидари чпин гъардшариланра кмиди хайирнан йицӀубпи пай, гьеле мурарра, гьатрарра Ибрагьимдин наслар вуйишра, бисуйи.

⁶ Хъа Мелхиседекди, учв Левийин тухмиан даршра, Ибрагьимдихьан йицӀубпи пай кьабул гъапӀнийи. Дугъу Мелхиседекдиз пай тувайиз улихьна, Аллагьди Ибрагьимдиз ужʼвал апӀуз гаф тувнайишра, Мелхиседекди дугъаз Аллагьдин ужувлакк ккахъриву, гъапнийи.

⁷ Исина вуйири, Аллагьдин ужувлакк ккахъриву, кӀуру гафар, зина вуйирихьан кьабул апӀуру. Му дигиш шлу мутму дар.

⁸ Хилиз гъюру хайирнан йицӀубпи пай, аьдат вуйиганси, аьжал хъайи адмийири кьабул апӀури шулу, хъа Мелхиседек чӀивиди а, кӀури, шагьидвал дапӀна.

⁹ Пуз шулу, чав, йицӀубпи пай кьабул апӀурайи Левийира кмиди Ибрагьимдиантина Мелхиседекдиз йицӀубпи пай тувну,

¹⁰ фици гъапиш, Мелхиседекдиз Ибрагьим алахъган, мегьел бабкан духьну адру Левий Ибрагьимдиъ тумси ади гъахьну.

Иса Месигь – Мелхиседекдиз ухшар Аллагьдин Гъуллугъчи ву

¹¹ Эгер Аллагьдин метлеб, халкьдиз тувнайи Къанундин бина вуйи Левитарин гъуллугъниинди кӀулиз удубчӀвуйиш, Гьарундиз ухшар адру, Мелхиседекдиз ухшар айи жара гъуллугъчи гьаз лазим вуйи?

¹² Аллагьдин гъуллугъчивал гьюдюхруган, дидихъди Къанунра гьюдюхюрайиб ву.

¹³ Гьаму ражари ихь ушвниин али Иса, гъурбнар ургрушваъ зат гъуллугъниин дархьи жара тухмикан ву.

¹⁴ Ихь Агъа Ягьудайин тухмиан вуйиб аьгъяхьуз, хъа Мусайилантина тувнайи Аллагьдин Къанундиъ гьадму тухмиан вуйи гъуллугъчйирикан гьич фукӀара дупнадар.

¹⁵ Мелхиседекдиз ухшар жара Аллагьдин гъуллугъчи арайиз удучӀвнайиган, гьаци вуйиб ухьуз ачухъди рябкъюрахьуз.

¹⁶ Думу, Аллагьдин гъуллугъчиди саб кадабгънайи тухмикан Къанунди дерккнайир дар, хъа гьаргандин уьмриъ айи кьувватну Дерккнайир ву.

¹⁷ Дугъкан гьамци дупна: „Уву гьаммишандиз Аллагьдин Гъуллугъчи, Мелхиседекдиз ухшар Гъуллугъчи вува“.

¹⁸ Мугагьназ айи къайда ккутӀна, фицики сарун дидин кьувват гъудубгну ва дидкан имбу мянфяаьт имдар.

¹⁹ Къанунди фукӀара гьубкӀуб арайиз гъабхиб адар. ДумутӀан ужуб умуд тувна. Диди ухьу Аллагьдихьна багахь апӀура.

²⁰ Дидин гьякьнаан Аллагьдира ху дапӀна. Имбу гъуллугъчйир Аллагьдин гъуллугънаъ гьич саб ху апӀувал адарди гъахьнийи,

²¹ хъа Месигь Чакан гьамци Гъапири ху апӀбиинди Аллагьдин Гъуллугъчи гъахьну: «Ху гъапӀну Агъайи ва Чан ху кьяляхъ апӀидар: Уву вува гьаргандиз вуйи Аллагьдин гъуллугъчи».

²² Гьадму ху апӀувализ дилигну, Иса мугагьназ айидартӀан лап ужуб Йикьрар кӀулиз адагъуз Чаина гъидису Агъа ву.

²³ Думугандин гъуллугъчйир гизаф вуйи, аьжали дурарихь чпин гъуллугъ кӀулиз адабгъуз гъитдайи,

²⁴ хъа Иса, гьаммишан яшамиш Шулайир ву ва Дугъан Аллагьдин гъуллугъра гьаммишандиз ву.

²⁵ Гьаддиз Дугъʼан, Чан кюмекниинди Аллагьдихьна гъюрудар гьуркӀну уьрхюз удукьуру. Думу Гьаммишанур ву ва Дугъу гьарган дурарихъанди гафра йивура.

²⁶ Ари гьамци гирами, гьич саб тахсир ктру, марцци, гунагькрариккан асиллу дару ва аьршартӀанна заан вуйи заан Гъуллугъчи ухьуз лазимра вухьуз.

²⁷ Дугъан, жара гъуллугъчйиринси, сифте чпин, хъа вари халкьдин гунгьарихъанди гьар йигъан гъурбнар хуб гьазкӀа дар. Дугъу, Чав Учв, гъурбан гъапӀу вахтна варидарихъанди гьаргандиз саб ражари гъурбан гъапӀну.

²⁸ Гъуллугъчйирди Къанунди гьудруркӀу аьдати адмийир дерккри гъахьну, хъа Къанун дебккбалан кьяляхъ, ху дапӀнайивализ дилигну, заан Гъуллугъчиди Бай дерккну. Думу гьаргандиз ГьуркӀур ву.