Жугьдариз 4 - Гирами Китаб

Аллагьди рягьятвалин йишв Чан халкьдиз тувди

¹ Сабан кьан дубхьнадар, ва Аллагьди тувнайи гаф – рягьятвал туврушваъ учӀвуз шлувал – кьувватнаъ ими, гьадму рягьятвал дурубкьди гъудрузбан бадали, гъачай гизаф дикъатлуди гъузурхьа.

² Ухьузра, гьадму гъалабулугъ гъитӀибккрударизси, рягьятвалин Ужувлан хабар ктибтнийи, хъа думу Хабарнакан дурариз хайир гъабхьундар, гьаз гъапиш дурари думу хъугъувалиинди кьабул гъапӀундар.

³ Хъа ухьу, гьадму Хабарнахъ хъугъдар, Дугъу рягьятвал туврушваъ учӀврахьа. Хъа хътругърударикан Аллагьди гъапну: «Гьаддиз Узук хъял кмиди гьамци ху гъапӀунза: дурар чпиз Узу рягьятвал туврушваъ учӀвидар». Дугъу мици, гьеле Чан ляхин дюнʼя арайиз хайиз ккудубкӀну айивализ дилигди, гъапнийи.

⁴ Жара йишваъ Дугъу ургудпи йигъкан гьамци дупна: «Ургуд гъапи йигъан Аллагь, Чан вари ляхнар ккудукӀну, саламат гъахьнийи».

⁵ Аммаки зиихъ: «Дурар чпиз Узу рягьятвал туврушваъ учӀвидар» – дупнайи гафар кӀваинди гъитай.

⁶ Гьамусра Дугъу рягьятвал туврушваъ аърувалин гаф кьувватнаъ ими. Хъа Ужувлан хабар ухди деебхьнайидарихьан, чпин хъпебехъувализ лигну, душваъ учӀвуз дархьиган,

⁷ Аллагьди, ичӀи чюлиъ гъахьи гьядисйирихъан лап кьанди, хъана саб йигъ улупну – «Гъи». Дидкан, зиихъ гъапиганси, Давуд паччагьдиланмина хабар дебккна: «Гъи, эгер учвуз Дугъан дих ебхьураш, ичв юкӀвар мючӀюркьянай».

⁸ Эгер мушваъ дурариз Ешуайи туву рягьятвалин йишвкан, яни Ханаандин жиликан улхури айиш, сарун Аллагь дидин кьялхъян саб жара йигъкан улхидайи.

⁹ Гьаддиз Аллагьдин халкьдиз рягьятвал гьамус рябкъюз ккимбуб ву.

¹⁰ Аллагьди рягьятвал туврушваъ учӀвури, Аллагьди Чан ляхнарихъан фици рягьятвал гъадабгъураш, гьаци рягьятвал гъадабгъиди.

¹¹ Гьаддиз гьадрарси, чпин хъпебехърувалилантина фужкӀа алдадакбан бадали ва гьадму рягьятвал туврушваъ учӀвбан бадали, ухьʼан удукьруб вари апӀидихьа.

¹² Фицики Аллагьдин гаф яшамиш шула ва либхура. Думу гаф кьюбиб мурзарра учӀру дапӀнайи ханжалтӀан учӀруб ву. Думу гаф, ихь инсанвалин варитӀан деринариз: юкӀвна рюгь, йиккна кӀураб жара шлушвариз ва кӀурбарин мааризкьан гъябгъюру. Гьадму Гафну фикраринна кӀван хияларин суд апӀуру.

¹³ Халкь дапӀнайи вари дюнʼяйиъ Аллагьдин улихь гьитӀибкӀнайиб гьич фукӀара адар. Дугъан улихь вари ачухъди ву. Дугъан улариз вари рябкъюру. Ари Гьадгъан улихь ухьу жавабра тувдихьа.

Иса Месигь – Аллагьдин заан Гъуллугъчи ву

¹⁴ Ухьухъ зурба вуйи Аллагьдин заан Гъуллугъчи хъахьухъ – аьршариз Гъушур. Думу – Аллагьдин Бай, Иса ву. Гьаддиз гъачай, хъугъну, учу ктибтурайи гьякьʼвалихъан ижмиди хъичӀихну гъуздихьа.

¹⁵ Ихь заан Гъуллугъчи ихь камиваларин гъавриъ адрахърударикан дар. Думура, ухьуси, гунгьариъ ктарди, вари аьзаб-аьзиятариъ Ахъур ву.

¹⁶ Гьаддиз ухьхьан, саб гучӀ адарди, ухьуз рягьим апӀуз ва лазим вахтназ кюмек бадали ухьуз ужʼвал тувуз, Ужувлан тахтнахьна гъюз шулухьхьан.