Жугьдариз 3 - Гирами Китаб

Иса Месигь МусатӀанра зиина ву

¹ Гирами гъардшар, учвузра Аллагьди дих дапӀна. Гьаддиз учу хъугърайибдин ва ктибтурайибдин заан Гъуллугъчи – Аллагьди гьаънайи Исайиз лигай.

² Аллагьди Чан гъуллугънаъ хьуб Гьадгъан ихтиярназ тувну. Дугъу думу Гъуллугъ, чан вахтна Мусайи чан хилиз тувнайи Аллагьдин халкьдин зиин фици гъуллугъ гъабхуйиш, гьациб хъуркьувалиинди кӀулиз адабгъура.

³ Аммаки Муса пайгъамбартӀан Иса, хуларизтӀан хулар диврайи устайиз артухъ гьюрмат апӀруси, заан адлувализ артухъ лайикь гъахьну.

⁴ Гьарсар хулариз чан уста айиб ву, хъа Аллагь варибдин Уста ву.

⁵ Мусайи Аллагьдин вари халкьдин гъуллугъниин дугъриди ляхин апӀури гъахьну, ва дугъан думу гъуллугъну саб фила-вуш хабар дебккуз ккайибдикан улупури гъабхьну.

⁶ Хъа Месигьди, дугъри Балиси, Аллагьдин вари Хулʼин аьхювал гъабхура. Ари гьадму Дугъан Хал, эгер ухьу аьхиризкьан ухьу тяриф апӀурайибдиз кӀубанди ва гьаддик миж кади гъузиш, ухьу вухьа.

«Дурар Узу рягьятвал туврушваъ учӀвидар»

⁷ Гьаддиз Гирами Рюгьну кӀурайиси: «Гъи, эгер учвуз Дугъан дих ебхьураш,

⁸ учву ичӀи чюлиъ читинвалар алахьган, гъалабулугъ гъитӀибккруганси, ичв юкӀвар мючӀюркьянай.

⁹ Душвариъ ичв абйири гьеле дурариз 40 йисан арайиъ Йиз ляхнар гъяркънушра, Узу ахтармиш апӀуйи ва дюз вуш-дарш лигуйи.

¹⁰ Гьаддиз Узуз думу насликан хъял гъафунзуз ва гъапунза: дурарин юкӀвар гьаммишан улдугура, дурариз Йиз рякъяр аьгъдар.

¹¹ Гьаддиз, Узук хъял кмиди, гьамци ху гъапӀунза: дурар, чпиз Узу рягьятвал туврушваъ учӀвидар».

¹² Гъардшар, ичв саринкьан юкӀв пис даршлуси, вафалуди гъузруси, чӀиви Аллагьдихьан гьидидицруси, ихтият йихьай.

¹³ Гьар йигъан, гунгьи чахъинди дизригуз ва учвкан фужкӀа дючӀюркьну гъидритуз, гьадму «гъи» гафну ухьуз сабан дих апӀури имидикьан гагьди, чиб-чпик юкӀв капӀри гъузай.

¹⁴ Эгер сифте кӀулариъ ухьуз айибсиб ихь ижми хъугъувал ухьу аьхиризкьан гъюбхиш, Месигьдиз айи варибдикан ухьузра пай хьибдихьуз.

¹⁵ Мидкан гьамци дупна: «Гъи, эгер учвуз Дугъан дих ебхьураш, учву гъалабулугъ гъитӀибккруганси, ичв юкӀвар мючӀюркьянай».

¹⁶ Дих деебхьну, гъалабулугъ гъитӀибккдар фужар вуди гъахьну? Дурар Мусайи Египетдиан адау вари дайинхъа?

¹⁷ ЯгъчӀвур йисандин арайиъ Аллагьдиз фужарикан хъял гъюйи? Дурар гунагь апӀрудар ва чпин жанар ичӀи чюлиъ дийихну дахьдар дайинхъа?

¹⁸ Аллагьди, рягьятвал туврушваъ учӀвидарчва кӀури, фужариз ху гъапӀну? Чахъ хъпебехърудариз дайин?

¹⁹ Ари ухьуз, чпин хътругърувализ дилигну, дурар душваъ учӀвуз дархьувал рябкъюрахьуз.