Жугьдариз 12 - Гирами Китаб

«Аллагь учвуз Чан баяризси лигури шулу»

¹ Лигай, ухьлан, дифаркьан, шагьидар илтӀикӀна! Гьаддиз гъачай, ухьлан ухьуз гьергуз машат апӀурайиб ва гьацира ухьу алдакуз гъитрайи гунагь вари илдипурхьа ва сабурлуди ухьуз кадабтӀнайи манзил ккадапӀурхьа.

² Зат ктӀатӀарццди Исайиз лигури гъузурхьа. Думу, ихь хъугъувалин ккергъубра ва ккудукӀубра ву. Дугъу, гъюз ккайи шадвал бадали, беябурваликкди хачриин аьзиятар аьгь гъапӀну ва гьамус Думу, Аллагьдин тахтнан арччул терефнахъинди деъна.

³ Гьамциб даккнивал гунагькрарин терефнаан аьгь ГъапӀурикан сацӀиб фикир апӀинай. Миди учвуз, ичв юкӀв-рюгь усалвалиъ адрабхъуз ва рюгь дурубгуз кюмек апӀидичвуз.

Аллагь Адашдиз ухшар ву

⁴ Учвуз сабан гунгьихъди ифи ктипайиз элегуб алабхъундарчвуз.

⁵ Учвуз Жвуван веледаризси дупнайи аьшкь капӀру гьамцдар гафар кӀваълан гьархначвуз: «Йиз бай, Аллагьди увуз жаза адабтӀурайивал ибак апӀури апӀин, Думу увуз хъжагъруган, мукуцухан.

⁶ Фицики Аллагьди жаза Чан юкӀв алидариз адабтӀури шулу ва Чан байди кьабул дапӀнайириз йивури шулу».

⁷ Учву аьгь апӀурайи жазйир учву вердиш апӀурайивалин саб пай ву. Аллагь учвуз Чан баяризси лигури шулу. Адашди жаза тутрувру бай шлуб вуйин?

⁸ Эгер учвуз жаза адабтӀури гъахьундарш, – хъа гьарсариз жаза адабтӀури шулу, – учву бичди гъахьидар вучва, гьякь баяр дарчва.

⁹ Ухьухъ варидарихъ му жилиин жаза адабтӀу адшар гъахьунхьухъ, ва дурарин ухьу гьюрмат уьбхюйхьа. Хъа яшамиш хьуз, фукьан артухъ ухьу ихь рюгьярин Адашдихъ хъпехърудар духьну ккунду!

¹⁰ Ихь адшари ухьу саб вахтназтӀан вердиш гъапӀундар – думура ккабхъубси. Хъа Аллагьди, ухьура Чан гирамивалин иштиракчйир хьпан бадали, ухьуз ужʼвал ибшри, кӀури, вердиш апӀурахьу.

¹¹ Ухьуз фициб жюре жаза вушра, шадвал хруси ваъ, хъа иццрушназ вуйибси гьугъубжвурахьуз. Хъасин, жазайиинди вердиш дапӀнайири, дугъривалинна мясляаьтнан бегьер ккадабцӀури шулу.

¹² Гьаддиз амансуз хилар ва зяиф кьамкьар ижми апӀинай.

¹³ Дюз рякъюъди, ликуриз зиян шлуси ваъ, хъа сагъ шлуси, гъарахай.

Аллагьдихьан ярхла махьанай

¹⁴ Вари адмийирихъди мясляаьт ади яшамиш хьуз ва гирамидар хьуз ял апӀинай – гирамивал адарди, гьич сарихьанра Агъа рякъюз хьидар.

¹⁵ Лигайки, гьич сарра Аллагьдин ужувлахъ мягьрум даришри ва кьутӀкьли кьаблиси зарар-зиян тувруси дарибшри, гьацдарилантина чиркин даришри.

¹⁶ Лигай, учвкан сарира кьяппавал мапӀанай ва, саб гъаб ипӀрубдихъ хизандиъ аьхю бализ айи ихтиярар масу туву Исавси, Аллагьдихьан гьадмукьан ярхлади махьанай.

¹⁷ Учвуз аьгъячвуз, хъасин Исавдиз чан ихтиярар кьяляхъ апӀуз ккун гъабхьнийи, аммаки думу тина гъапӀнийи. Дугъхьан, чпин адашди гьял гъапӀуб, гьеле уларилан рубзури гьаддикан ккун гъапӀнийишра, дигиш апӀуз гъабхьундайи.

¹⁸ Учву хил кучуз даршлу ва цӀа алабхъну убгурайи дагъдихьна, мучӀувалихьна, пашманвалихьна ва тӀурфнахьна дуфнадарчва.

¹⁹ Зурнайин сеснахьна ва улхурайи дихнахьна дуфнадарчва. Думу дих гъеебхьдари чпикди улхуб давам дарапӀуз миннат апӀуйи.

²⁰ Инсанарихьан чпиз дебкку гьамциб табшуругъ аьгь апӀуз шулдайи: «Эгер гьяйванат гьаму дагъдик кубкьиш, думу, йивури гъванар, йибкӀну ккунду».

²¹ Думу шиклихьан гьадмукьан гучӀ айики, гьеле Мусайира кмиди гьамци гъапнийи: «Узу гукӀнишин кабхъну йикӀуразу».

²² Ваъ! Учву Сион дагъдихьна, чӀиви Аллагьдин шагьрихьна, Аьршарин Ерусалимдихьна дуфначва! Учву шадвалин мяракайиз уч духьнайи агъзрариинди малайикарихьна дуфначва.

²³ Учву, аьршариъ ччвурар дидикӀнайи, сарпидар вуди бабкан гъашидарин мяракайиз дуфначва. Учву вари халкьарин суд апӀру Аллагьдихьна ва гьуркӀу дугъридарин рюгьярихьна дуфначва.

²⁴ Учву, Исайихьна, ЦӀийи Йикьрар Дерккурихьна, Авелин ифитӀан ужуди улхурайи кибчру Дугъан ифдихьна дуфначва.

²⁵ Лигай, учвухьна илтӀикӀурайи Аллагь тина мапӀанай. Израиларихьан гьаму жилиин гафар апӀурайирихъ хъпебехъган гьадабтӀу жазайиккан кӀул ккадабгъуз дархьиган, дидлан артухъ аьршариан гафар АпӀурайирихьан гьудучӀвиш, ухьхьанра кӀул ккадабгъуз хьибдар.

²⁶ Думуган Дугъан дихну жилар тӀурччвуйи, хъа гьамус Дугъу гаф тувна: «Узу саб ражарисана жилар тӀурччвидиза, неинки жилар, хъа гьацира аьршарра».

²⁷ «Саб ражарисана» кӀуру му гафар: вари халкь дапӀнайибдикан вари ккадабшвруб ва саб вахтназтӀан даруб дубгди, хъа ккадабшвуз даршлуб гъубзди, кӀурайидар ву.

²⁸ Гьаци вуйиган ухьуз ккадабшвуз даршлу Паччагьлугъ рубкьурайиган, чухсагъул кӀури гъуздихьа, гьюрматлудина гукӀунди Аллагьдиз икрам апӀури гъуздихьа,

²⁹ гьаз гъапиш ихь Аллагь – вари хътӀюбкьру цӀа ву.