Жугьдариз 10 - Гирами Китаб

Иса Месигь гьаммишандиз кьувватнаъ гъубзрайи саб гъурбан ву

¹ Къанун адмийириз гъюз имбу уьмриъ ккилигурайи ужувларин сиринтӀан дар. Ваъ, Къанун – думу ужувлар дар. Гьаддиз Къанундихьан, йисʼан-йисаз гьаммишан саб жюрейин гъурбнар хуру кӀури, адмийир Аллагьдин улихь гьякь апӀуз шлуб дар.

² Эгер Къанундихьан гьаци апӀуз удубкьуйиш, дурари чпин гъурбнар апӀуб ккутӀидайинхъа? Икрам апӀрудар саб ражари ва гьаргандиз марцц дапӀну ахьидийи, ва, чпин гунгьариз дилигну, дурариз чпик тахсир кади гьибгъдайи.

³ Хъа му гъурбнар, йисʼан-йисаз чпи апӀурайи гунгьар кӀваин алауз кӀури вуйидар ву,

⁴ гьаз гъапиш, жердаринна кьунарин ифдихьан гунгьар ккутӀуз шлуб дар.

⁵ Гьаддиз гьаму дюнʼяйиъ учӀву Месигьди Аллагьдиз гъапну: «Увуз ккун гъахьундайвуз я гъурбнар, я багъишар, хъа Уву, Узуз кӀури, беден гьязур гъапӀнийва.

⁶ Сагъди гъургу гъурбнари, я гунгьарихъанди апӀру гъурбнари Уву шад апӀдар.

⁷ Гьадмуган Узу гъапунза: „Магьа, Узкан Къанундиъ дибикӀнайиси, Узу Яв ният тамам апӀуз гъягъюраза, жан Аллагь!“»

⁸ Гьаци вуйиган, сифте Дугъу гьамци гъапну: «Увуз ккун гъахьундайвуз я гъурбнар, я багъишар, я сагъди гъургу гъурбнар, я гунгьарихъанди апӀру гъурбнар, дурари Уву шад гъапӀундар». Дугъу мици, Къанундин тӀалабариинди вуйиб вушра, Чаз кьабул дархьиди гъапиб вуйи.

⁹ Хъасин Дугъу давам гъапӀнийи: «Магьа, Узу Яв ният тамам апӀуз гъягъюраза». Месигьди, гъурбнар апӀбарин йирси къайдйир арайиан адаъну, фу-вуш цӀийиб кьувватнаъ ипру.

¹⁰ Дугъу Аллагьдин ният тамам гъапӀган, ухьу саб ражари ва гьаргандиз, Иса Месигьдин беден гъурбан апӀбиинди, гирами гъахьунхьа.

¹¹ Гьарсар Аллагьдин гъуллугъчийи чан гъуллугъ, гунагь ярхла апӀуз даршлу гьадму садар гъурбнар хури, йигъʼан-йигъаз тамам апӀура.

¹² Хъа му Гъуллугъчи, гунгьарихъанди гьаммишандиз кьувватнаъ гъубзрайи саб гъурбан дубхну, Аллагьдин арччул терефнахъинди деъну.

¹³ Гьаддихъанмина Думу, Чан душмнар духну, Чан ликарикк ккахьру вахт улубкьайизкьан, ккилигури гъузна.

¹⁴ Саб ражари гъурбан хубʼинди Дугъу гирами шулайидар Аллагьдин улихь гьякь гъапӀну.

¹⁵ Мидкан ухьуз Гирами Рюгьнура шагьидвал апӀура. Дугъу сифте кӀура:

¹⁶ «Магьа, гьадму йигъарихъан Узу дурарихъди гьацдар Йикьрар йитӀидиза, – кӀура Агъайи, – Йиз къайдйир дурарин юкӀвариъ тӀаъдиза ва дурарин фагьмик дикӀидиза».

¹⁷ Хъасин Дугъу давам апӀура: „Дурарин гунгьар ва гьюкумсуз ляхнар Узу гьич зат кӀваин алаидарза“.

¹⁸ Гунгьарилан хил алдабгънайиган, гунгьарихъанди гъурбан апӀуб сарун лазимди гъубзрадар.

Аллагьдиз багахь улучӀвай

¹⁹ Гъардшар, Исайин ифдин кюмекниинди гьамус ухьхьан дирбашди «Лап Гирамишваъ» учӀвуз шулухьхьан.

²⁰ Дугъу ухьуз душваз рякъ абццну, цӀийиб, уьмур хруб, чарчнаантина вуйи рякъ, яни Чан бедендиантина вуйи рякъ.

²¹ Ухьуз, Аллагьдин хулан аьхювал апӀурайи зурба вуйи Гъуллугъчи ахьуз.

²² Гьаци вуйиган гъачай Дугъахьна, гьубкӀу хъугъувалиинди, ифи кибчбиинди юкӀвар чӀуру нефснахьан марцц ва ихь жанар марцци штуʼан дапӀну, ачухъ юкӀвар ади гъюхьа.

²³ Хъугъну, учу ктибтурайи умуднахъан мюгькамди хъчӀихидихьа, гьаз гъапиш гаф Тувнайир, хъугъувал Алир ву.

²⁴ Сар-сарихьна масанди гъузруси ва ужувлан ляхнар апӀруси, чиб-чпин гъайгъу зигури хьидихьа.

²⁵ Сакьюдарин, хъугърудар уч шлуган дина дяргърувал аьдати ляхин дубхьна. Хъа ухьу дицдарихъан дубгъидархьа, иллагьки, сарун Агъа гъюру вахт багахь шулайиб фикирназ гъадабгъну, чиб-чпик юкӀв капӀри апӀидихьа.

Гьякьʼвал аьгъяди, гунгьар апӀруриз – жаза

²⁶ Гьаз гъапиш, ухьу, гьякьʼвал аьгъю дубхьну, хъана аьгъя-аьгъяди гунгьар апӀуруш, гунгьар сарун гьич саб жюрейин гъурбнарихьан марцц апӀуз хьибдар,

²⁷ хъа Суддиз ва Аллагьдин душмнар итӀру гъизгъин цӀиз гукӀунди ккилигуб хьибди.

²⁸ Мусайиланмина ухьуз тувнайи Аллагьдин Къанун шли чӀюбгъюйиш, кьюр вая шубур шагьиддин гафариинди гъючӀюбгъюриз, саб инсаф адарди, аьжал гьадабтӀуйи.

²⁹ Хъа ичв фикриинди, Аллагьдин Бай ликриккан апӀруриз, Йикьрар гъийитӀу Гирами ифи фукӀа дарубси гьисаб апӀруриз ва ужувлан Рюгь беябур апӀруриз фукьан аьхю жаза гьадабтӀур?

³⁰ Ухьуз: „Кьисас алдабгъуз Узухьди гъитай, лазим жаваб Узу тувдиза!“ – гъапир Фуж вуш, аьгъяхьуз. Дугъу гьамцира гъапну: „Чан халкьдин суд Агъайи апӀиди“.

³¹ ЧӀиви Аллагьдин хиларигъ гъяхъюб – мутӀан аьхю гучӀ адар!

Учвухъ хъергруганра мюгькамди гъузай

³² Гъушу вахтар кӀваин алаай, думуган, учвуз аьгъюваларикан аьгъю гъабхьи вахтна, учву гъагъи аьзабариан кӀул адабгъунчва.

³³ Вахт-вахтарик учвʼин аьлхъюз гъитри шуйи ва хъергри шуйи, хъа саспи вахтари гьамцдар аьзабар аьгь гъапӀдарин багахь дийигъну гъахьунчва.

³⁴ Учву дустгъариъ айидарин язухъ зигури гъахьунчва, ичв шейъ-шюйъ тадабгъруган, учву шад шули гъахьунчва, гьаз гъапиш учвуз думутӀан ужуб шейъ, гьаммишандиз вуйи Шейъ айиб аьгъяйчвуз.

³⁵ Гьаци вуйиган, ичв кӀубанвал мудубганай – ужуб пешкеш хьибдичвуз.

³⁶ Аммаки Аллагьдин ният тамам апӀбан бадали ва Дугъу тувурза гъапиб рубкьбан бадали учвуз ккундайиб – аьгь апӀуб ву.

³⁷ Сарун сацӀибтӀан вахт имдар, ва «Дуфну Ккунир, кьан дарапӀди, гъиди.

³⁸ Йиз улихь гьякь вуйир чан хъугъувалиинди яшамиш хьиди, хъа дицир Узухъ хъугънайивалихьан гьудучӀвиш, Узу дугъкан рази хьидарза».

³⁹ Амма ухьу, кьяляхъ йиврударикан ва йикӀрударикан дархьа, ваъ, хъугъурхьа, ва уьрхювалра хьибдихьуз!